1 kuThimothewu 2 - IsiZulu 2020

Imithetho Yenkonzo Yebandla

¹ Ngakho-ke okokuqala nje, ngigqugquzela ukuba ukunxusa, ukukhuleka, ukucela nokubonga kwenzelwe abantu bonke;

² amakhosi nazo zonke iziphathimandla, ukuze sihlale kahle ngokuthula, ngokwesaba uNkulunkulu, nangakho konke ukuhlonipheka.

³ Lokhu kuhle, futhi kwamukelekile emehlweni kaNkulunkulu uMsindisi wethu,

⁴ othanda ukuba bonke abantu basindiswe, bafinyelele ekulazini iqiniso.

⁵ Ngokuba munye uNkulunkulu, munye nomlamuleli phakathi kukaNkulunkulu nabantu, ngumuntu uKhristu uJesu,

⁶ owazinikela ukuba abe yinhlawulo yabo bonke, kube ngubufakazi besikhathi esifaneleyo.

⁷ Ngamiselwa mina ukuba ngibe ngummemezeli nomphostoli walokho; ngikhuluma iqiniso, angisengi ezimithiyo; yebo, umfundisi wabezizwe ekukholweni naseqinisweni.

⁸ Ngalokho ngithanda ukuba amadoda akhuleke ezindaweni zonke, ephakamise izandla ezingcwele, engenalulaka nakuphikisana.

Okuqondene Nabesifazane Ebandleni

⁹ Kanjalo-ke nabesifazane mabagqoke izingubo ezifaneleyo, bahlobe ngokuhlakanipha nokuqonda, kungabi ngezinwele ezelukiweyo, ngegolide, ngamapharele noma ngezembatho ezibizayo.

¹⁰ Kepha okufanele abesifazane abathi bayamesaba uNkulunkulu, ukuba bahlobe ngemisebenzi emihle.

¹¹ Owesifazane makafunde ukuthula nokuthobeka konke.

¹² Angimvumeli owesifazane ukuba afundise, noma abe negunya phezu kwendoda, kodwa makathule.

¹³ Ngokuba u-Adamu wabunjwa kuqala, kwase kulandela u-Eva,

¹⁴ futhi u-Adamu akakhohliswanga, kodwa owesifazane okwathi esekhohlisiwe, waphambuka.

¹⁵ Kepha uyakusindiswa ngokuzala abantwana, uma behlala ekukholweni, othandweni, nasebungcweleni, futhi bezithoba.