1 AmaKhosi 22 - IsiZulu 2020

U-Ahabi Uhlangana NoJehoshafathi Uyokulwa NeRamothi Gileyadi

¹ Kwaba yiminyaka emithathu kungekho ukulwa phakathi kwe-Aramu no-Israyeli.

² Kwathi ngonyaka wesithathu, uJehoshafathi inkosi yakwaJuda, wehlela enkosini yakwa-Israyeli.

³ Inkosi yakwa-Israyeli yathi ezincekwini zayo: “Niyazi nje ukuthi iRamothi Gileyadi lingelethu, na? Kepha asenzi lutho ukuba silithathe esandleni senkosi yase-Aramu.”

⁴ Yathi kuJehoshafathi: “Uzohamba yini nami ukuyolwa neRamothi Gileyadi na?” UJehoshafathi wathi enkosini yakwa-Israyeli: “Mina ngifana nawe, abantu bami banjengabantu bakho, namahhashi ami anjengamahhashi akho.”

⁵ UJehoshafathi nokho wathi enkosini yakwa-Israyeli: “Ake ubuze namuhla izwi likaSimakade.”

⁶ Inkosi yakwa-Israyeli yayisiqoqa abaphrofethi abathi ababe ngama-400, yathi kubo: “Ngihambe yini ngiyokulwa neRamothi Gileyadi, noma ngiliyeke na?” Bathi: “Yenyuka, ngokuba uSimakade uyakulinikela esandleni senkosi.”

⁷ Kepha uJehoshafathi wathi: “Akekho yini umphrofethi kaSimakade lapha ukuba sibuze kuye na?”

⁸ Inkosi yakwa-Israyeli yathi kuJehoshafathi: “Kusekhona umuntu oyedwa esingabuza kuSimakade ngaye kodwa ngiyamzonda ngokuba akaphrofethi okuhle ngami kodwa okubi; nguMikhaya, indodana kaJimila.” UJehoshafathi wathi: “Inkosi mayingakusho lokho.”

⁹ Inkosi yakwa-Israyeli yayisibiza induna, yathi kuyo: “Landa masinyane uMikhaya, indodana kaJimila.”

¹⁰ Inkosi yakwa-Israyeli noJehoshafathi, inkosi yakwaJuda, babehleli, kuyilowo nalowo esihlalweni sakhe sobukhosi. Babembethe izembatho zabo, besesibuyeni ngasesangweni eSamariya. Bonke abaphrofethi babephrofetha phambi kwabo.

¹¹ UZedekiya, indodana kaKhenahana, wazenzela izimpondo zensimbi, wathi: “Usho kanje uSimakade, uthi: ‘Ngalezi zimpondo uyakuqhubukusha ama-Aramu, uze uwabhubhise.’ ”

¹² Bonke abaphrofethi babephrofetha kanje, bethi: “Yenyukela eRamothi Gileyadi, ube nempumelelo, ngokuba uSimakade uzolinikela esandleni senkosi.”

¹³ Isithunywa esasithunywe ukuyolanda uMikhaya, sathi kuye: “Bheka, bonke abaphrofethi baphrofethe kahle, basho ngazwi linye enkosini; ngakho-ke nawe izwi lakho malibe njengezwi lomunye wabo, ukhulume okuhle.”

¹⁴ Kepha uMikhaya wathi: “Ngiyafunga phambi kuSimakade, lokhu uSimakade akushoyo kimi, yikhona engizokukhuluma.”

¹⁵ Esefikile enkosini, inkosi yathi kuye: “Mikhaya, sihambe yini ukuyolwa neRamothi Gileyadi, noma siliyeke na?” Wathi kuyo: “Yenyuka, ube nempumelelo. USimakade uyakulinikela esandleni senkosi.”

¹⁶ Yayisithi kuye inkosi: “Kuyoze kube kangaki ngikufungisa ukuba ungakhulumi lutho kimi ngaphandle kweqiniso egameni likaSimakade na?”

¹⁷ Wayesethi: “Ngabona wonke u-Israyeli ehlakazekile ezintabeni njengezimvu ezingenamelusi. USimakade wayesethi: ‘Laba abasenankosi. Mababuyele, kube yilowo nalowo endlini yakhe ngokuthula.’ ”

¹⁸ Yayisithi inkosi yakwa-Israyeli kuJehoshafathi: “Angishongo yini kuwe ukuthi akaphrofethi okuhle ngami, kodwa okubi kuphela na?”

¹⁹ UMikhaya wathi: “Ngakho-ke yizwa izwi likaSimakade: ngambona uSimakade ehleli esihlalweni sakhe sobukhosi; nebandla lonke lasezulwini limi ngakuye, kwesokunene nangakwesokhohlo sakhe.

²⁰ USimakade, wathi: ‘Ngubani oyakuyenga u-Ahabi ukuba enyuke afele eRamothi Gileyadi na?’ “Omunye washo komunye.

²¹ Kwase kuvela umoya, wema phambi kukaSimakade, wathi: ‘Mina ngizomyenga.’ “USimakade wathi kuwo umoya: ‘Kanjani na?’

²² “Wathi: ‘Ngizophuma ngibe ngumoya wamanga emilonyeni yabo bonke abaphrofethi bakhe.’ “Wayesethi: ‘Uyakumyenga, futhi umehlule. Hamba wenze kanjalo.’

²³ “Ngakho-ke uSimakade ubeke umoya wamanga emilonyeni yabo bonke abaphrofethi bakho; uSimakade ukhulume okubi kodwa ngawe.”

²⁴ UZedekiya, indodana kaKhenahara, wasondela, wamshaya uMikhaya esihlathini, wathi: “UMoya kaSimakade wasuka nini kimi ukuba akhulume kuwe na?”

²⁵ Wathi uMikhaya: “Bheka, uyakukubona lokho ngosuku oyongena uphuma ngalo emakamelweni ngamakamelo, ucasha.”

²⁶ Inkosi yakwa-Israyeli yathi: “Mthathe uMikhaya, umbuyisele ku-Amoni, umbusi womuzi, nakuJowashi, indodana yenkosi,

²⁷ uyakuthi kubo: ‘Isho kanje inkosi, ithi: fakani lo ejele, nimuphe isinkwa sokuhlupheka namanzi okuhlupheka, ngize ngibuye ngiphephile.’ ”

²⁸ Wayesethi uMikhaya: “Uma uyobuya ngempela uphephile, uyakube engakhulumanga ngami uSimakade.” Wathi futhi: “Yizwani nina bantu bonke.”

Ukubulawa Kuka-Ahabi ERamothi Gileyadi

²⁹ Inkosi yakwa-Israyeli noJehoshafathi, inkosi yakwaJuda, base benyukela eRamothi Gileyadi.

³⁰ Inkosi yakwa-Israyeli yathi kuJehoshafathi: “Mina ngizozifihla uma sekuliwa, kepha wena ubokwembatha izembatho zakho.” Inkosi yakwa-Israyeli yayisizifihla, yahamba yayolwa.

³¹ Inkosi yase-Aramu yayizidonse ngendlebe izinduna zayo ezingama-32, yathi: “Ningalwi namuntu noma ngomncane noma ngomdala, kodwa nenkosi yakwa-Israyeli kuphela.”

³² Kwathi lapho izinduna zezinqola sezimbonile uJehoshafathi, zathi: “Impela lo yinkosi yakwa-Israyeli.” Zaphambuka zalwa nayo, kodwa uJehoshafathi wamemeza.

³³ Kwathi sezibonile izinduna zezinqola ukuthi akasiyo inkosi yakwa-Israyeli, zabuya ekumlandeleni.

³⁴ Kepha umuntu othile wansala umnsalo wakhe ngokungazelele nje, wayihlaba inkosi yakwa-Israyeli lapho kuhlangana khona ibhantshi lensimbi eliyisivikelo sayo, yathi kumshayeli wenqola yayo: “Phenduka, ungikhiphe empini, ngokuba sengilinyaziwe.”

³⁵ Impi yashisa ngalolo lusuku. Inkosi bayibeka enqoleni yayo maqondana ne-Aramu, kwathi kusihlwa yakhothama. Igazi elaphuma enxebeni layo lagobhozela phansi enqoleni.

³⁶ Selishonile ilanga, kwedluliswa enkanjini isimemezelo sokuthi: “Yilowo nalowo makabuyele emzini wakubo, ezweni lakubo.”

³⁷ Yakhothama-ke inkosi, yase iyiswa eSamariya; bayimbela eSamariya.

³⁸ Sebeyihlanza inqola echibini eSamariya, kwaba njengalokhu uSimakade ayeshilo ukuthi izinja ziyakuxhapha igazi lakhe, nezifebe zigeze ngalo.

³⁹ Ezinye izindaba zika-Ahabi, konke akwenzayo, indlu yezimpondo zendlovu ayakhayo, nayo yonke imizi ayakhayo, akulotshiwe yini encwadini yezindaba zemihla ngemihla yamakhosi akwa-Israyeli na?

⁴⁰ U-Ahabi walaliswa kokhokho bakhe; u-Ahaziya, indodana yakhe, waba yinkosi esikhundleni sakhe.

Ukubusa KukaJehoshafathi KwaJuda

⁴¹ UJehoshafathi, indodana ka-Asa, waba yinkosi kwaJuda ngonyaka wesine wokubusa kuka-Ahabi, inkosi yakwa-Israyeli.

⁴² UJehoshafathi waqala ukubusa eneminyaka engama-35; wabusa iminyaka engama-25 eJerusalema. Igama likanina kwakungu-Azubha, indodakazi kaShilekhi.

⁴³ Wahamba ngezindlela zonke zika-Asa, uyise, kaphambukanga kuzo, wenza okulungile emehlweni kaSimakade. Kepha izindawo eziphakemeyo azisuswanga; abantu babesanikela, beshisa impepho ezindaweni eziphakemeyo.

⁴⁴ UJehoshafathi wadala ukuthula nenkosi yakwa-Israyeli.

⁴⁵ Ezinye izindaba zikaJehoshafathi, amandla awabonakalisa, nokulwa kwakhe, akulotshiwe yini encwadini yezindaba zemihla ngemihla yamakhosi akwaJuda na?

⁴⁶ Insali yomkhuba wobufebe basethempelini, eyayisele emihleni kayise, u-Asa wayibhubhisa ezweni.

⁴⁷ Kwakungekho nkosi kwa-Edomi; kwakubusa ibambela.

⁴⁸ UJehoshafathi walungisa imikhumbi yaseTharishishi ukuba iye e-Ofiri ukuyolanda igolide, kodwa ayihambanga, ngokuba imikhumbi yephukela e-Eziyoni Gebheri.

⁴⁹ U-Ahaziya, indodana ka-Ahabi, wathi kuJehoshafathi: “Izinceku zami mazihambe nezinceku zakho ngemikhumbi.” Kepha uJehoshafathi akavumanga.

⁵⁰ UJehoshafathi walaliswa kokhokho bakhe, wembelwa kokhokho emzini kaDavide, ukhokho wakhe; uJehoramu, indodana yakhe, waba yinkosi esikhundleni sakhe.

Ukubusa Kuka-Ahaziya Kwa-Israyeli

⁵¹ U-Ahaziya, indodana ka-Ahabi, waqala ukubusa kwa-Israyeli eSamariya ngonyaka we-17 wokubusa kukaJehoshafathi, inkosi yakwaJuda, wabusa iminyaka emibili kwa-Israyeli.

⁵² Wenza okubi phambi kukaSimakade, wahamba ngendlela kayise, ngekanina, nangekaJerobhowamu, indodana kaNebhathi, onisa ngayo u-Israyeli.

⁵³ Wakhonza uBhali, wakhuleka kuye, wamcunula uSimakade uNkulunkulu ka-Israyeli, njengakho konke ayekwenzile uyise.