Лукастар 5 - Біблія про закарпатцько романо чіб

Сікаде худен бут мача

¹ Єкгвар Ісус тердьолас пажо озеро Генісарет, а нийпос іскікіндяпес машкар Лесте і шунелас Девлескєро лав.

² І дикгля Ов дуй шіфі, со тердьонас пажо брегос. Галаса, саве авле андал пескєре шіфі, блійтиненас сіткі.

³ Сар заґейля андре єкг шіфа, кай есас Сімоноскєрі, Ісус манґля лес те одландьон надур ле брегостар. Паліш Ов бешля і андал е шіфа кєздиндя те сікавен ле нийпос.

⁴ А кана Ов преачіля те вакєрен, пгендя ле Сімоноскє: — Преландю, кай баро пані, і зачів тийрі сітка, гой те худен е мачі.

⁵ Сімон отпгендя: — Танітов, цейло раті амен пгарес кєрагас, та те авка ніч на хундям. Та пал Тийро лав ме зачівава е сітка.

⁶ А кана кєрде ода, оне хунде айці бут мача, кай ленґєрі сітка чіндьолас.

⁷ Оне кєздинде те сікавен ле вастенца баратенґє андал авер шіфа, гой мі авен те поможінен ленґє. Оне подланділе і пгердярде дуй шіфі авка, гой шіфі кєздинде те ташльон.

⁸ Сар дикгля ода о Сімон Петро, пейля ко піндре Ісусоскєре і пгендя: — Мук ман, Раєя, бо ме сом бійношно мануш!

⁹ Ов пгендя авка важ ода, бо іґєн даранділя. І саворе, ко есас лега, предарадепес одалестар, кай оне хунде айці бут мача.

¹⁰ А лега даранділе те лескєре барата: Яков те Іоанн, о чаве Зеведєйоскєре. Ісус пгендя ле Сімоноскє: — На дара, адале дівесестар ту худега ле манушен.

¹¹ Сар цірдне про брегос о шіфі, оне мукле саворо і ґейле пало Ісус.

Ісус сасарел прокажоне манушес

¹² Єкгвар, кана Ов есас андро єкг фоврос, єкг мануш, саво есас прокажоно, дикгля ле Ісус, пейля про муй і іґєн манґєлас Лес: — Раєя! Те Ту камес, Ту шай ман жувжарес!

¹³ Ісус прецірдня о васт, тгодя пре лесте і пгендя: — Камав, ав жувжо! І єкгваресте проказа ґейля лестар тейле.

¹⁴ Акор Ісус диня аврі одале манушескє нікаскє те на вакєрел пал када, а федер пгендя: — Джя і сікавпес ле рашаєскє. А важ ода, кай обжувжардялпес, ан е жертва, авка, сар пгендя Моїсєй, ленґє про свідєтєльство.

¹⁵ О вакєрібе пало Ісус розґейляпес минґ дуредер, і бут нийпос авенас те шунен Лес і те сасарен пескєро насвалібе.

¹⁶ А Ов джялас андро біманушенґєро тган і одя модлінеласпес.

Ісус сасарел ле паралізіме манушес

¹⁷ Єкгвар, кана Ов сікавелас, бешенас оде фарісєї а те танітова Законоскєре, саве авле пал саворе Галілєякєре те Іудєякєре фовра, а те андал Єрусалім. І зор ле Раєскєрі есас про Ісус, і Ов сасарелас насвале манушен.

¹⁸ Акор паруджяне мануша анде про тган ле манушес, саво на бійрінелас пега те чалавен. Оне іґєн фес каменас те заліджян лес андро кгєр і те тговен лес анґлал Ісус.

¹⁹ А сар на аракгле, катар те заліджян лес, бо бут есас мануша оде, вазднепес про падос, розкінде черепіца, і пріґ падос мукле лес ле тганега машкар мануша анґлал Ісус.

²⁰ Кана Ісус дикгля ленґєро патябе, пгендя одале манушескє: — Манушея, одмукєнпес тукє тийре бійні!

²¹ А танітова Законоскєре і фарісєї подуміненде андре песте: «Ко Ов айсо, кай вакєрел айсе бійношне лава? Ко шай одмукєл о бійне, те на чак єкг о Дейл?»

²² Ісус джянелас, со ленґє гін пре ґовді, і важ ода пгендя: — Пал состе думінен андре тумаре їле?

²³ Со ловкєдер те пгенен: «Одмукєнпес тукє тийре бійне», або те пгенен: «Уші те пгір»?

²⁴ Но тумен маїнен те джянен, гой ко Ча ле Манушенґєро гін влада пре пгув те одмукєн о бійне. Акор Ов пгендя насвалескє: — Тукє пгенав: уші, ле тийро тган і джя андро тийро кгєр.

²⁵ Ов єкгваресте ушіля анґлал ленде, іля ода, пре состе пашльолас, те ґейля, ашаріпнага ле Девлес, андро пескєро кгєр.

²⁶ Саворе чудаліненаспес і кєздинде те ашарен ле Девлес. Ле бара даратар оне вакєренас: — Дадіве амен дикглям ода, со наший айсо ейл.

Ісус вічінел ле Матфіюс те совґалінен

²⁷ Пало ода Ісус ґейля одарік і дикгля ле манушес, саво іскіделас налогі, про нав Лєвій, саво бешелас про тган, кай іскіден налогі, і пгендя лескє: — Ав пал Манде.

²⁸ Ов ушіля, мукля саворо і ґейля пал Лесте.

²⁹ Паліш о Лєвій кєрдя андро пескєро кгєр баро дийлос прекал Ісус. Оде есас бут мануша, саве іскіденас налогі, а те авер мануша, саве есас ленца пажо скамін.

³⁰ А танітова Законоскєре те о фарісєї дудріненас про Ісусоскєре сікаден і вакєренас: — Соске тумен хан те пієн ле манушенца, саве іскіден налогі, а те ле бійношненца?

³¹ Ісус ленґє отпгендя: — На ле састенґє кампел докторіс, а насваленґє.

³² Ме авльом те звічінен на чачібнаскєрен, а ле бійношнен, гой те розвісаренпес ле бійнендар.

Пгучен Лестар пало постос

³³ Акор оне пгенде ле Ісусоскє: — Соске Іоанноскєре сікаде бутвар гіне андро постос і міндик модліненпес, авка те о фарісєєнґєре, а Тийре хан те пієн?

³⁴ Та Ісус отпгендя ленґє: — Чі шай тумен заставінен ле манушен те лікєрен постос, кана гіне про біяв, адик ленца гіно о терно?

³⁵ Та авена айсе дівеса, кана залелапес лендар о терно, акор андро одала дівеса і лікєрена о постос.

³⁶ І розвакєрдя Ов ленґє єкг вакєрібе: — Ніко, сар отчінел, на пресівел о котор андал нейве голмі ко пгуране, бо акор те нейве голмі чінґєрсальона, і ко пгурано на подджял нейво котор.

³⁷ І ніко на чорел терні мол андро пгуране ґовне, бо акор чіндьона о ґовне ле терня молятар. І акор саворо чуляла аврі, а о ґовне проперена.

³⁸ Терні мол кампел те зачорен андре нейве ґовне.

³⁹ Та ніко, ко пробаліндя пгурані мол, на закамела нейві, бо пгенела: «Пгурані мол федер».