Жохан 8 - Zhana Osiet

¹ Иса зәйтүн тауына қарай кетті.

² Ол таңертең ерте ғибадатханаға қайтып келді, сол жерде отырып, Өзіне келген халықтың бәріне тәлім берді.

³ Сол кезде Таурат Заңын зерттеушілер мен фарисейлер неке адалдығын бұзып жатқан жерінен ұсталған бір әйелді алып келді, оны ортаға тұрғызып қойып,

⁴ Оған: -Ұстаз, мына әйел неке адалдығын бұзып жатқан сәтте ұсталды!

⁵ Мұсаға берілген Заңда осындайларды таспен атқылап ұруды бұйырған, ал Сен бұған не айтасың? - деді.

⁶ Олар Оны әдейі айыптап, сынау үшін осылай деді. Иса төмен қарап, еңкейген күйі жерге саусағымен жазып отыра берді.

⁷ Олар бұл туралы Исадан сұрап қоймаған соң, Ол бір кезде басын көтеріп: -Араларыңдағы біреуің ешқандай күнәсіз болса, сол бірінші болып осы әйелге тас лақтырсын, -деді.

⁸ Сосын Ол қайтадан төмен қарап, жерге жаза бастады.

⁹ Осы сөзді естігеннен кейін олар үлкендерінен бастап, бірінен соң бірі сыртқа шығып кетті. Ақырында тек Исаның Өзі қалды, ал ортада болған әйел сол қалпында тұра берді.

¹⁰ Сонда Иса басын көтеріп, әлгі әйелге: -Оу, әйел! Әлгілер қайда кетті? Олардың ешқайсысы саған айып таққан жоқ па? - деді.

¹¹ -Ешқайсысы да, Ием! -деді әйел. Иса оған: -Онда Мен де саған айып тақпаймын, енді бұдан былай күнә жасаушы болма! - деді.

¹² Осыдан кейін Иса оларға (халыққа) тағы да мынаны айтты: -Мен Осы әлемге жарықпын, Менің артымнан кім ерсе, сол қараңғыда жүрмейді, керісінше, оның өмірі жарық болады, - деді.

¹³ Оған фарисейлер: -Сенің берген куәлігің тек Өзің туралы ғана айтады, сондықтан Сенің куәлігің шындыққа сай келмейді, - деді.

¹⁴ Сонда Иса оларға: -Егер де Мен куәлікті тек Өзіме байланысты айтып тұрсам, онда Менің куәлігім -шындық, өйткені Мен қайдан келгенімді де, қайда баратынымды да білемін, ал сендер Менің қайдан келгенімді де, қайда баратынымды да білмейсіңдер.

¹⁵ Сендер тек тәндік көзқараспен соттап тұрсыңдар, ал Мен ешкімді соттамаймын.

¹⁶ Егер де Мен соттайтын болсам, онда менің сотым шынайы болады, себебі Мен жалғыз емеспін, Мен Өзімді жіберген Әкеммен* біргемін.

¹⁷ Негізінде, сендердің Заңдарыңда екі адам бірігіп куәлік берсе, сол нағыз шындыққа жатады деп жазылған.

¹⁸ Менің Өзіме берген куәлігіммен қатар, Мені жіберген Әкенің де Мен туралы беретін куәлігі бар, - деді.

¹⁹ Сонда олар Исаға: -Сенің сол Әкең қайда жүр? -десті. Иса оларға: -Сендер Мені де, Менің Әкемді де білмейсіңдер, егер де сендер Мені білген болсаңдар, онда Менің Әкемді де білер едіңдер, - деді.

²⁰ Иса осы сөздерді оларға ғибадатхананың қазына қоймасының жанында тұрып, тәлім берген кезінде айтқан болатын. Алайда Оны ешкім ұстап алуға тырыспады, өйткені Оның уақыты әлі келген жоқ болатын.

²¹ Сол кезде Иса оларға тағы да: -Мен кетемін, сендер Мені іздейсіңдер және сендер өз күнәларыңды өздерің арқалап өлесіңдер. Сендер Мен баратын жаққа келе алмайсыңдар, - деді.

²² Сонда яһудейлер: «Мен баратын жаққа сендер келе алмайсыңдар», -дегені қалай? -Сонда Ол Өзін-Өзі өлтірме ме? - десті.

²³ Иса оларға: -Сендер -төмендегі жерденсіңдер, Мен -жоғарыдағы Көктенмін. Сендер осы әлемнен боласыңдар, Мен осы әлемнен емеспін.

²⁴ Міне, сондықтан Мен: «Сендер өз күнәларыңды өздерің арқалап жүріп өлесіңдер», -деп айтқан болатынмын. Егер де сендер Менің нағыз Сол екеніме сенбесеңдер, онда сендер күнәларыңды арқалап өлесіңдер, - деді.

²⁵ Олар Исаға: -Сен Өзің кімсің? -деді. Сонда Иса оларға былай деді: -Сендерге ең басында сол туралы айтпадым ба?

²⁶ Мен сендер жайында көп нәрсе айта аламын және соттасам да болады. Алайда Мені Жіберген-нағыз шындықтың Өзі, сондықтан Мен Одан не естісем, Мен соны осы әлемге айтып жүрмін.

²⁷ Алайда олар Исаның Өзінің Әкесі туралы айтып тұрғанын білген жоқ.

²⁸ Иса сонда да оларға: -Адамның Ұлын жоғары тік көтеріп қойған кезде, Менің нағыз Соның Өзі екенімді және Менің Өздігімнен еш нәрсе істемейтінімді, Әке Мені қалай үйретсе, соны ғана айтып жүргенімді білетін боласыңдар.

²⁹ Мені Жіберген Менімен бірге, Ол Мені жалғыз қалдырған жоқ, өйткені Мен әрқашан да Оның ұнатқан нәрсесін істеп жүрмін, - деді.

³⁰ Иса осыны айтқан кезде, Оған көпшілігі сенді.

³¹ Өзіне сенген яһудейлерге Иса: -Егер Менің сөзімді ұстанып, сонымен жүретін болсаңдар, онда сендер Менің шынайы шәкірттерім болғандарың.

³² Енді шындықты танып -білетін болсаңдар, сол шындық сендерді азат ететін болады, - деді.

³³ Олар Исаға: -Біз-Ыбырайымның ұрпағымыз және ешкімге еш уақытта құл болған емеспіз! Сен бізге неден «азат боласыңдар» деп айтып тұрсың? - деді.

³⁴ Иса оларға: -Сендерге шындықты айтайын: кім күнә жасаса, сол - күнәнің құлы.

³⁵ Ал құл үйде мәңгі қалмайды, үйде тек ұл ғана мәңгі қалады.

³⁶ Сондықтан сендерді тек Ұл азат етсе ғана азаттыққа шығасыңдар.

³⁷ Сендердің Ыбырайымның ұрпағы екендеріңді білемін. Алайда сендер Мені өлтірмек болып, сол үшін іздеп жүрсіңдер. Оның себебі сендер Менің айтқан сөздеріме жүректеріңнен орын бермедіңдер.

³⁸ Мен тек Әкеден көргенімді айтып жүрмін, сендер де Әкеден не естісеңдер, дәл солай істеңдер, -деп жауап берді.

³⁹ Олар Исаға: -Бізге тек Ыбырайым ғана Әке болған, -деді. Иса оларға: -Егер сендер Ыбырайымның балалары болсаңдар, онда Ыбырайымның жасағандарын істер едіңдер.

⁴⁰ Бірақ сендер Құдайдан естіген шындықты өздеріңе айтып жеткізген мына Мені өлтірмек болып іздеп жүрсіңдер. Мұндай нәрсені Ыбырайым істеген жоқ.

⁴¹ Сендер тек өз әкелеріңнің жасаған істерін ғана орындап жүрсіңдер, -деді. -Біз некесіз туғандар емеспіз! -деді олар Оған. - Біздің бір ғана Әкеміз бар, Ол-Құдай!

⁴² Сонда Иса оларға: -Егер Құдай сендердің Әкелерің болса, онда сендер мына Мені сүйер едіңдер, себебі Құдайдан шыққан да, келген де-Мен, Мен Өз бетіммен келген жоқпын, Мені жіберген - Соның Өзі.

⁴³ Сендер Менің сөздерімді не үшін түсіне алмай тұрсыңдар? Өйткені сендер Менің сөздерімді ден қойып, тыңдамадыңдар.

⁴⁴ Сендердің әкелерің -сайтан. Міне, сондықтан сендер сол әкелеріңнің қалауын орындағыларың келеді. Ал ол болса, әуел бастан адам өлтіруші болған әрі шындыққа да тұрақты емес, өйткені онда шындық деген жоқ. Ол айтатын өтіріктерін әрқашан өзіне лайықты етіп жеткізеді, сондықтан ол-нағыз өтірікші және өтіріктің әкесі.

⁴⁵ Мен тек шындықты айтамын, сонда да Маған сенбейсіңдер.

⁴⁶ Араларыңдағы кім Мені күнә жасадың деп әшкерелей алады? Егер де Менің айтқанымды шындық деп қабылдасаңдар, онда не үшін Маған сенбейсіңдер?

⁴⁷ Кім Құдайдан болса, сол Құдайдың айтқанын тыңдайды. Ал сендер Құдайдан емессіңдер, сондықтан сендер тыңдай алмайсыңдар.

⁴⁸ Сонда яһудейлер Оған: -Сен -самариялықсың және бойыңда сайтаның бар деп айтқанымыз дұрыс емес пе? -деді.

⁴⁹ Иса былай деп жауап қатты: -Менде сайтан жоқ. Бірақ Мен Өз Әкемді құрметтеймін, сендер Мені қорлап, абыройымды төктіңдер.

⁵⁰ Мен Өз даңқымды Өзім іздемеймін, алайда Іздеушім де Соттаушым да - Сол.

⁵¹ Сендерге шындықты айтып тұрмын: кімде-кім Менің сөзімді сақтайтын болса, сол өлімнің дәмін татпай, мәңгілік өмірге өтеді, - деді.

⁵² Сонда яһудейлер Оған: -Сенде сайтанның бар екенін енді білдік. Ыбырайым да өлді, пайғамбарлар да өлді. Сен: «Егер де кімде-кім Менің сөзімді сақтайтын болса, сол өлімнің дәмін татпай, мәңгілікке өтеді», - дейсің.

⁵³ Сен сонда өліп болған біздің әкеміз Ыбырайымнан да үлкенсің бе? Пайғамбарлар да өліп қалған. Сонда Сен Өзіңді кіммін деп санап тұрсың? - деді.

⁵⁴ Иса оларға былай деп жауап берді: -Егер де Мен Өз даңқыма Өзімді бөлейтін болсам, онда Менің даңқым түкке тұрғысыз болар еді. Менің Әкем бар, Мені даңққа бөлейтін -Сол. Ал сендер Оны: «Біздің Құдайымыз», -деп айтасыңдар.

⁵⁵ Алайда сендер Оны не танымайсыңдар, не білмейсіңдер. Мен Оны білемін. Егер де Мен Оны білмеймін десем, онда Мен сендер сияқты өтірікші болар едім. Бірақ Мен Оны білемін, сондықтан да Мен Оның сөзін орындап, сақтап жүрмін.

⁵⁶ Сендердің әкелерің -Ыбырайым Менің осы күнімді көргісі келген, сол үшін ол шаттанған еді, міне, ол сол күнді көрді, қуанды.

⁵⁷ Сонда яһудейлер Оған: -Жасың әлі елуге де келген жоқ, сонда Сен Ыбырайымды өз көзіңмен көрдің бе? -деді.

⁵⁸ Иса оларға: -Сендерге шындықты, тек шындықты айтамын: Ыбырайым әлі тумай тұрып, Мен бар болатынмын! -деді.

⁵⁹ Сонда олар тас алып, Исаға лақтырмақ болғанда, Ол көзге көрінбей, ғибадатханадан шығып кетті.