Жохан 6 - Zhana Osiet

¹ Осыдан кейін Иса Ғалилея көлінің арғы бетіндегі Тиберияға барды.

² Исаның ауруларды сауықтырып, жасаған кереметтерін көргендер Оның соңынан қалмай, ілесіп отырды.

³ Иса тауға көтеріліп, Өз шәкірттерінің қасына барып отырды.

⁴ Бұл кездері яһудилердің Құтқарылу мейрамы (яғни пасха) жақындап қалған болатын.

⁵ Иса жан-жағына көз салғанда, көптеген халықтың Өзіне қарай келе жатқанын көріп, Філіпке: -Мыналарға жейтін нанды қайдан сатып алсақ болады? - деді.

⁶ Иса мұны оны сынау үшін ғана айтқан болатын, алайда Ол не істеу керек екенін Өзі білді.

⁷ -Екі жүз *динарийге нан сатып алып, олардың әрқайсысына соны кішкенеден үзіп бергеннің өзінде де жетпейді! - деп жауап берді Філіп.

⁸ Сонда Исаның шәкірттерінің бірі Шимон Петірдің бауыры Әндір:

⁹ -Осында жүрген бір баланың бес арпа наны мен екі балығы бар, бірақ осыншама көп халыққа ол не болады? - деді.

¹⁰ Иса оларға: -Адамдарды ыңғайластырып отырғызыңдар, - деді. Сол жердің шөбі өте қалың болатын, бес мыңдай ер адам соған жайғасып отырды.

¹¹ Иса нанды алып, алғыс айтып, ризашылығын білдірген соң, отырғандарға таратып берді, дәл солай балықтарды да қалауынша таратты.

¹² Халық әбден тойып болған соң, Иса шәкірттеріне: -Енді бекерге ысырап болмас үшін, артылып қалғандарын жинап алыңдар, - деді.

¹³ Олар жеп болған соң, артылғандарын жинап алғанда, бес арпа наннан қалғаны он екі себет болды.

¹⁴ Исаның осы жасаған кереметтерін көрген адамдар: -Бұл әлемге келуге тиіс шынайы пайғамбар Осының Өзі болар! - десті.

¹⁵ Олардың Өзін ұстап алып, патша етіп қойғысы келетінін және олардың соған дайындалып жүргенін біліп қойған Иса жалғыз Өзі тау жаққа кетіп қалды.

¹⁶ Кеш батқан кезде Оның шәкірттері көлге қарай төмен түсті де,

¹⁷ қайыққа мініп, көлдің арғы бетіндегі Қапарнаум қаласына бет алды. Сол кезде қараңғылық та түсе бастаған еді, бірақ Иса оларға әлі келмеген болатын.

¹⁸ Қатты соққан желден теңіз алай-түлей күйге түсті.

¹⁹ Ескекті есіп, жиырма бес-отыз стадий жүргеннен кейін, олар көлдің бетімен қайыққа қарай жақындап келе жатқан Исаны көрген кезде, шошып кетті.

²⁰ Иса оларға: - Бұл-Мен, қорықпаңдар, - деді.

²¹ Олар Исаны қайыққа отырғызып алғылары келді, қайық та сол сәтте өздері бағыт алып келе жатқан жағаға келіп тоқтады.

²² Келесі күні көлдің арғы бетінде жиналған халық сол жерде тек бір қайықтан басқа ешбір қайықтың болмағанын әрі Исаның Өзі шәкірттері мінген қайыққа отырмағанын, сол қайықпен тек қана Оның шәкірттерінің өздері ғана кеткенін көрген болатын.

²³ Сол жерде Тіберия жақтан келген басқа қайықтар да болды. Олар да Иеміз алғыс айтып, ризашылықпен нан жегізген жерге жақын келіп тоқтап жатты.

²⁴ Осы сәтте әлгі жиналған халық Исаның және Оның шәкіттерінің сол жерде жоқ екенінін көріп, қайықтарына қайта отырып, Исаны іздеп Қапарнаумға келді.

²⁵ Олар Оны көлдің арғы бетінен тауып алып, Оған: -Ұстаз! (Равви) Сен мұнда қашан келіп алдың? - деді.

²⁶ Иса оларға: -Сендерге шындықты, тек шындықты айтайын: сендер Мені тек кереметтерді көргендіктен емес, керісінше, жеген нандарыңа бола, яғни, нан жеп, тойып алған соң ғана іздеп жүрсіңдер.

²⁷ Бұзылып, жоқ болатын сол бір тамақ үшін емес, қайта, өздеріңе мәңгілік өмірдің азығы болатын, сендерге Адам Ұлы беретін тамақ үшін еңбектеніңдер, өйткені Құдай Әке Оған мөрін басты, - деді.

²⁸ Олар Исадан: -Құдайдың ісін атқару үшін, біздің не істеуіміз қажет? - деп сұрады.

²⁹ Иса оларға: -Құдайдың ісін атқару деген мынау: Ол Кімді Жіберген болса, Соған сеніңдер, - деп жауап берді.

³⁰ Бірақ олар: -Сонымен, бізді Өзіңе сендіретін қандай кереметтер көрсетпексің? Оны қалай жасайсың? -деді Оған.

³¹ Біздің ата-бабаларымыз шөл далада жүріп нан (манна) жеген, бұл Жазбада қалай жазылған болса, солай орындалды. «Құдай оларға жейтін нанды (маннаны) көктен түсіріп берді», - делінген Жазбада.

³² Иса оларға: -Сендерге шындықты, тек шындықты айтамын: сендерге көктен нан берген Мұса емес, шынайы нанды көктен беріп тұрған Менің Әкем болатын.

³³ Себебі көктен түскен Ол-Құдайдың «наны» және осы әлемге өмір беретеін де-Сол, - деді.

³⁴ Олар Исадан: -Ием, әрдайым сол нанды бізге беріп тұршы! - деп сұрады Одан.

³⁵ Иса оларға: -Сол өмір наны мына Мен боламын! Маған келген аштық көрмейді және Маған сенген (әркім) ешқашан шөлдемейтін болады, - деді.

³⁶ Алайда Мен сендерге: «Сендер Мені көріп тұрсыңдар, сонда да сендер Маған сенбейсіңдер», -деген болатынмын.

³⁷ Әкем Маған кімді берсе, олардың бәрі Маған келетін болады, Маған келгенді Мен сыртқа қумаймын.

³⁸ Өйткені Мен Өз еркімді орындау үшін емес, тек Мені Жібергеннің еркін орындау үшін көктен түстім.

³⁹ Бұл Мені Жібергеннің еркіне сай болып тұр, сондықтан Ол Маған бергендердің бәрін Мен жоғалтып алмауым үшін, Мен соңғы күні солардың бәрін қайта тірілтіп аламын.

⁴⁰ Өйткені бұл Менің Әкемнің еркіне сай, себебі Оның Ұлын көріп, Оған сенген әркім мәңгілік өмірге ие болуы үшін, соңғы күні Мен оны қайта тірілтетін боламын, -деді.

⁴¹ Яһудейлер Оның: «Мен Көктен түскен «нан» боламын», -деген сөзіне күңкілдей бастады.

⁴² Сонда олар былай десті: -Біз мұның әкесін де, шешесін де білеміз, бұл әлгі Жүсіптің ұлы Иса емес пе? Ендеше Ол: «Көктен түскен нам Мен боламын», -деп қалай айтып жүр?

⁴³ Иса оларға: - Бір - біріңмен дауласпай-ақ қойыңдар!

⁴⁴ Мені Жіберген Әкем Өзіне біреуді жақындатып тартпаса, ешкім де Маған келе алмайды, тек сонда Мен оны соңғы күні тірілтіп аламын.

⁴⁵ Ал пайғамбарлар Жазбасында: «Бәрі Құдайдан тәлім алып, Одан үйренетін болады», -деп жазылған. Сондықтан Әкеден естігенді үйренгісі келетіндер енді Маған келетін болады.

⁴⁶ Өйткені Құдайдың нақты бар екенін Әкемен бірге Болғаннан басқа ешкім де көрген емес, Әкені тек Сол ғана көрген.

⁴⁷ Сендерге шындықты, тек шындықты айтамын: кім Оған сенсе, сол мәңгілік өмірге ие болады.

⁴⁸ Себебі өмір беретін «нан» мына Мен боламын.

⁴⁹ Сендердің ата-бабаларың шөл далада нан (манна) жесе де, олар өлімге душар болды.

⁵⁰ Ал осы көктен түскен нанның қасиеті мынау: кім одан жесе, сол өлмейді.

⁵¹ Сондықтан өмір беру үшін көктен түскен нан -мына Мен, егер кімде-кім сол наннан жейтін болса, ол мәңгі өмір сүретін болады. Өйткені Мен Өз тәнімді қиып, оны осы әлемге өмір наны ретінде беремін.

⁵² Яһудейлер болса, осы сөзге бола бір-бірімен айтысып: - Ол Өзінің денесін бізге қалай беріп, қалай жегізгелі тұр? -десті.

⁵³ Сонда Иса оларға: -Сендерге шындықты, тек шындықты айтамын: егер сендер Адам Ұлының «денесін жемесеңдер», Оның «қанынан ішпесеңдер» онда сендер өз өмірлеріңе өздерің ие бола алмайсыңдар.

⁵⁴ Кім Менің «тәнімді жеп» және Менің «қанымды ішсе», сол мәңгілік өмірге ие болады, Мен оны ақырғы күні қайта тірілтіп аламын.

⁵⁵ Сондықтан шынайы тамақ -ол «Менің денем», ал шынайы сусын - ол «Менің қаным».

⁵⁶ Менің «тәнімді жеп» және Менің «қанымды ішкен» әркім *Менде өмір сүретін болады, Мен онымен бірге боламын.

⁵⁷ Мені жіберген Әке тірі, сондықтан Мен де сол Әкем арқылы өмір сүремін, сол секілді Мені *жеген әркім Мен арқылы өмір сүретін болады.

⁵⁸ Бұл Көктен түскен нан сендердің ата-бабаларыңның жеген нанына ұқсамайды, олардың бәрі де қайтыс болды. Бірақ мына нанды кім жесе, сол мәңгі өмір сүреді.

⁵⁹ Иса мұны Қапарнаумдағы синагогада тәлім беріп тұрған кезінде айтқан болатын.

⁶⁰ Осыны естігеннен кейін, Оның шәкіртерінің көбі: -Мұндай қатал айтылған сөзді кім тыңдайды? - десті.

⁶¹ Иса шәкірттерінің осы туралы өзара күңкілдесіп тұрғанын біліп, оларға: -Осы (айтылған сөз) сендердің жандарыңа батып тұр ма? - деді.

⁶² Егер де Адам Ұлының бұрынғы Өзі тұрған жеріне көтеріліп бара жатқанын көрсендер, не болады?

⁶³ Тек Рух қана тірілте алады, тәннің оған ешқандай да қатысы жоқ. Менің сендерге айтып тұрған сөзімде Рух та, өмір де бар.

⁶⁴ Алайда сендердің араларыңдағы кейбіреулерің әлі де сенбейсіңдер, -деді. Өйткені Иса бас кезінен-ақ олардың кейбіреулерінің сенбей жүргенін және кімнің Өзін сатып кетуге дайын екенін білетін.

⁶⁵ Ол тағы да былай деді: -Сол үшін де Мен сендерге: «Егер де Менің Әкемнен оған берілмесе, Маған ешкім де келе алмайды», - деп айтқан болатынмын.

⁶⁶ Осы кезден бастап, Оның шәкірттерінің көбі кері қайтып кетті, содан кейін Оған жақындаған жоқ.

⁶⁷ Исаның қасында Оның тек он екі шәкірті ғана қалды, сонда Иса оларға: -Сендердің де кеткілерің келе ме? -деп сұрады.

⁶⁸ Сонда Петр Оған: -Ием, біз кімге барамыз? Сенің айтқан сөздеріңде мәңгілік өмір бар.

⁶⁹ Біз соған сенеміз және Құдайдан келген Киелі тек Сенің Өзің екеніңді білдік, - деді.

⁷⁰ Иса оларға: -Осы он екіңді Мен таңдап алған едім, алайда араларыңдағы біреуің сайтанның жетегінде жүрген жоқ па? - деді.

⁷¹ Ол Шимон ұлы Яһуда Исқариот туралы айтқан еді, ол Оның он екі шәкіртінің бірі болса да, Исаны ұстап беруге дайындалып жүрді.