Жохан 5 - Zhana Osiet

¹ Осыдан кейін яһудейлердің мейрамы басталды. Сонда Иса Ерусәлімге келді.

² Ерусәлімдегі Қой қақпасына жақын орналасқан, төбесі жабық бес хауыз бар болатын, оны еврейше Бетезда деп атайтын,

³ сол жерге әр түрлі аурумен ауыратындар, соқырлар мен ақсақтар, сал болып қалғандар келіп жататын.

⁴ (Осылай олар судың қозғалғанын аңдитын, *өйткені Құдайдың періштесі анда-санда келіп, суды қозғайтын, су қозғалған кезде оған бірінші болып түскен адам қандай ауруы болсын жазылып кететін)

⁵ Міне, солардың арасында отыз сегіз жыл бойы ауырып жүрген бір адам бар болатын.

⁶ Иса оның сол жерде жатқанын көргенде, оның көптен бері ауырып жүргенін білді де, оған: -Сауыққың келе ме? - деді.

⁷ Ауру адам: -Мырза, су қозғалып толқи бастағанда, мені апарып сол хауызға түсіретін адам болмай тұр. Ал мен (тырысып) сонда келіп жетемін дегенше, менен бұрын басқа біреу барып түсіп қояды, - деді Оған.

⁸ Иса оған: -Тұр! Төсек -орныңды өзіңмен бірге ал да, жүре бер! - деді.

⁹ Әлгі ауру адам сол сәтте ауруынан сауығып, өзімен бірге төсенішін алды да, жүріп кетті. Бұл сенбі күні болған жағдай еді.

¹⁰ Яһудейлер ауруынан сауығып кеткен сол адамға: -Бүгін сенбі, сондықтан өзіңмен бірге төсек-орныңды алып жүруге саған рұқсат етілмеген, - деді.

¹¹ Сонда ол былай деп жауап берді: -Мені сауықтырған Адамның Өзі: «Төсек-орныңды өзіңмен бірге ал да, жүре бер», - деді. Олар:

¹² -Саған: «Төсек-орныңды ал да, жүре бер», -деп айтқан Сол Адам Кім? - деп одан сұрады.

¹³ Бірақ әлгі ауруынан сауыққан адам Оның Кім екенін білмейтін, өйткені Иса сол жерде тұрған халықтың арасына көрінбей кіріп кеткен болатын.

¹⁴ Осыдан кейін Иса оны ғибадатханадан тауып алды да: -Сауыққаныңды өзің де көріп тұрсың, енді бұдан да қиын жағдайға душар болғың келмесе, енді күнә жасама! -деді оған.

¹⁵ Осыдан кейін әлгі адам яһудейлерге барып, оны сауықтырған Адамның Иса екенін айтып берді.

¹⁶ Яһудейлер осы үшін Исаның ізіне түсіп, қудалай бастады, себебі Ол мұны сенбі күні істеген болатын.

¹⁷ Сонда Иса оларға: -Менің Әкем Өз ісін осы уақытқа дейін атқаруда, сол секілді Мен де Өз ісімді солай атқарып жүрмін, - деп жауап берді.

¹⁸ Осыдан кейін яһудейлер Оны өлтірудің жолдарын жанталаса іздеп, жанжақты қарастыра бастады. Өйткені олардың ойынша Иса тек сенбі күнінің тәртібін ғана бұзып қойған жоқ, сонымен қатар, Ол Құдайды Әкем деп, Өзін Құдаймен теңестірді.

¹⁹ Сонда олардың бұл істеріне Иса: -Сендерге шындықты, тек шындықты айтайын: егер де Ұлы Әкесінің жасаған істерін көрмесе, Ұл да өздігінен еш нәрсе істей алмайды. Өйткені Әке қалай істесе, Ұлы да істерін Соған ұқсатып жасауы тиіс. Әке қалай істеген болса, Ұлы да іс-әрекетін Оған ұқсатып жасауы тиіс.

²⁰ Себебі Әкесі Ұлын жақсы көреді, сондықтан Оған Өзі жасаған істерінің бәрін көрсетіп отырды, ал сендерді таңғалдыру үшін, Ол Ұлына бұдан да ұлы істерді көрсетеді.

²¹ Әкесі өлгендерді өлімнен қалай тірілткен болса, Ұлының қалауы да сол, яғни, өлгендерді қайта тірілтетін болады. Әкесі өлгендерді өлімнен қалай тірілткен болса, Ұлдың да қалауы - өлгендерді қайта тірілту.

²² Сонымен қатар, Әке енді ешкімді соттамайды, өйткені Ол соттың бәрін Ұлына беріп қойды.

²³ Мұндағы мақсат: Әке қалай құрметтелсе, Ұлы да солай құрметтелуі тиіс. Сонымен, егер Ұл құрметке бөленбесе, онда Оны жіберген Әкенің де құметтелмегені.

²⁴ Мен сендерге шындықты, тек шындықты айтып тұрмын: егер Менің сөзімді естіп, Мені Жіберген Әкеге сенетін болса, сол мәңгілік өмірге ие болады әрі ол сотқа тартылмайды, өйткені ол өлімнен шынайы өмірге өтіп кетті.

²⁵ Сендерге шындықты, тағы да шындықты айтайын: өлгендер де Құдайдың Ұлының даусын еститін уақыт келеді және келіп те қойды, Оның даусын еститіндер өлімнен тірілетін болады.

²⁶ Өйткені өмір Әкенің Өзінен бастау алады, дәл солай өмірдің бастауы болуды Ол Өзінің Ұлына берді.

²⁷ Сонымен қатар, Оған сот жүргізетін билік те берілді, себебі Ол-Адамның Ұлы.

²⁸ Қабірде жатқандардың бәрі де Оның даусын еститін уақыт келеді, сондықтан сендер бұған таңғалмаңдар.

²⁹ Сол кезде жақсылық жасағандар өмірге қайта тірілу үшін, ал зұлымдық жасағандар сотталу үшін қайта тірілетін болады.

³⁰ Мен Өздігімнен еш нәрсе де жасай алмаймын. Маған қалай айтылған болса, солай соттайтын боламын, Менің сотым әділетті себебі Мен Өз еркімді емес, Мені Жібергеннің еркін орындаймын.

³¹ Егер де Мен Өзім туралы куәлік беретін болсам, Менің куәлігім шындыққа сай болмай қалады.

³² Алайда Мен туралы куәлік беретін басқа Біреу бар, Мен туралы Оның берген куәлігінің шындық екенін Мен білемін.

³³ Сендер Жақияға (адамдарды) жібергенде, ол шындық туралы куәлік берген болатын.

³⁴ Мен адамның куәлігіне сүйенбеймін, бірақ мұны Мен сендер құтқарылсын деп айтып тұрмын.

³⁵ Жақия жарқырап жанып тұрған шам болатын, ал сендер аз уақыт болса да, Оның сол жанған жарығында шаттанып алғыларың келді.

³⁶ Ал Менде сол Жақиянікінен де үлкен куәлік бар. Әкемнің Маған ақырына дейін жеткізіп, аяқтауға тапсырған істерінің өзі Әкенің Мені жібергенін дәлелдеп, Мен үшін куәлік болып тұр.

³⁷ Сонымен, Мені жіберген Әке Мен туралы дәлелді куәлік беріп тұр. Оның даусын сендер ешқашан естімедіңдер және Оның бейнесін көрмедіңдер.

³⁸ Сендер Оның Сөзінің өздеріңмен бірге болғанын қаламадыңдар, өйткені сендерге жіберілген Соның Өзі болатын, сендер Оған да сенбей тұрсыңдар.

³⁹ Жазбаларды зерттеп, сол арқылы мәңгілік өмірге ие боламыз деп ойлайсыңдар, алайда сол Жазбалар тек Мен туралы куәлік береді.

⁴⁰ Сендер сол өмірге ие болу үшін, Маған келгілерің де келмейді.

⁴¹ Адамдардың атынан берілетін даңқты қабылдамаймын,

⁴² бірақ сендердің жүректеріңде Құдайға деген сүйіспеншілі ктің жоқ е кенін білдім.

⁴³ Мен Өз Әкемнің атынан келіп тұрсам да, Мені қабылдаған жоқсыңдар. Ал басқа біреу өзінің атынан келетін болса, сендер оны қабылдайсыңдар.

⁴⁴ Егер де сендер атақ-даңқты тек бір-бірлеріңнен ғана қабылдап, жалғыз Құдайдан келетін даңқты іздемейтін болсаңдар, онда сендер қалайша сенімге ие болмақсыңдар?

⁴⁵ Мен сендерді Әкенің алдында айыптайды деп ойламаңдар, сендерді өздерің үміт артқан Мұса айыптайтын болады.

⁴⁶ Егер де сендер сол Мұсаға сенсеңдер, онда Маған да сенім артар едіңдер, өйткені ол Мен туралы жазып кеткен болатын.

⁴⁷ Оның жазғанына сенбесеңдер, онда Менің сөзіме қалай сенесіңдер? - деді.