Жохан 4 - Zhana Osiet

¹ Жақияға қарағанда Исаның дайындаған шәкірттері адамдарды көбірек суға батырып шомылдырудан өткізіпті деген сыбыстың фарисейлерге жеткенін Иса білді.

² Негізінде, суға батырып шомылдыруды Исаның Өзі өткізген жоқ, Оның шәкірттері істеген болатын.

³ Иса Яһудеяны тастап, қайтадан Ғалилея жеріне бармақшы болды.

⁴ Бірақ Оның Самария аймағы арқылы өтуіне тура келді.

⁵ Сөйтіп, Ол Самария еліндегі Сихар деген қалаға келді, Жақыптың бір кездері өз ұлы Жүсіпке берген жері де осы қалаға жақын болатын және

⁶ сол жерде Жақыптың құдығы бар еді. Иса жолдан шаршап, сол құдықтың басына келіп отырды. Уақыт мөлшері алтының кезі болатын.

⁷ Сол кезде бір самариялық әйел құдыққа су алуға келді. Сонда Иса әлгі әйелге: - Маған ішетін су берші, - деді.

⁸ Бұл кезде Оның шәкірттері тамақ сатып алу үшін, қалаға кеткен болатын.

⁹ Сонда әлгі самариялық әйел Исаға: -Сен Өзің яһудей бола тұра, мына мен секілді самариялық әйелден қалайша су сұрап тұрсың? -деді. (Себебі яһудейлер мен самариялықтар бір-бірімен араласпайтын).

¹⁰ Иса әлгі әйелге жауап қатып: -Егер де сен Құдайдың сыйын әрі: «Маған су берші», -деп тұрғанның Кім екенін білген болсаң, өзің Одан су сұрар едің, сонда Ол саған «тірі суды» беруші еді, - деді.

¹¹ Әлгі әйел Исаға: - Мырза, су алатын ыдысың да жоқ, ал құдық болса терең, сол тірі суды қайдан аласың?

¹² Әлде Сенің мәртебең осы құдықты бізге беріп кеткен, одан өзі де, оның ұлдары мен малдары да су ішкен әкеміз Жақыптан да өте жоғары ма? - деді.

¹³ Сонда Иса әлгі әйелге: -Мына судан ішкен әркімнің шөлі қанбай, шөлдей беретін болады,

¹⁴ ал Мен беретін судан ішкен әркімнің шөлі қанып, ол мәңгілік шөлдемейтін болады. Себебі Мен берген су оның бойында ағып жататын мәңгілік өмірдің қайнар көзі әрі бастауы болмақ, - деді.

¹⁵ Сол кезде әлгі әйел Оған: -Мырза, онда маған да сол судан берші, мен де шөлімді қандырып, енді су алу үшін осында келмейтін болайын, - деді.

¹⁶ Иса әйелге: -Онда бар да, күйеуіңді шақыр, содан кейін өзің осында қайтып кел, - деді.

¹⁷ Сонда әлгі әйел: -Менің күйеуім жоқ, -деп жауап берді. Иса оған: - Күйеуім жоқ, - дегенің дұрыс.

¹⁸ Негізінде, бес рет күйеуге шықтың, қазір қасыңда жүрген ол да күйеуің емес, бұл айтқаның шындық, -деді.

¹⁹ Содан кейін әйел Исаға: -Мырза, Сенің пайғамбар екеніңді көріп тұрмын,

²⁰ біздің ата-бабаларымыз мына таудың басына келіп табынатын, алайда сіздер табынуға арналған орын тек Иерусалимде орналасқан дейсіздер, - деді.

²¹ Иса әйелге: -Әйел, сендердің Әкеге мына тауда немесе Иерусалимде табынбайтын уақыттарың келеді, Маған сен, -деді.

²² Сендер кімге табынып жүргендеріңді білмейсіңдер, ал біз Кімге табынып жүргенімізді білеміз, өйткені құтқарылудың тек яһудейлер жағынан келетіні айдан анық болып тұр.

²³ Себебі шынайы табынушылардың уақыты, міне, енді келді және сол сәт басталып та кетті, табынатындар енді Әкеге тек Рухпен және шындықпен ғана табынатын болады, Әке Өзіне тек осылай табынатындарды ғана іздейді.

²⁴ Құдай-Ол Рух, ондықтан Оған табынатындардың Рух пен шындықта табынғандары аса қажет болып тұр, -деді.

²⁵ Сол кезде әйел Исаға: -«Мәсіх» деп аталатын «Құтқарушының» келуге тиіс екенін білемін. Ол келген кезде, бізге бәрін ашып айтып береді, - деді.

²⁶ Сонда Иса: -Сенімен сөйлесіп тұрған мына Мен -нақ Соның Өзімін, - деді әйелге.

²⁷ Осы кезде Оның шәкірттері де келді, олар Оның әйелмен сөйлесіп тұрғанын көріп, аң-таң болды. Алайда олардың ешқайсысы: «Не іздеп жүрсің?» немесе «Неге Ол әйелмен сөйлесіп тұрсың?» - деп сұраған жоқ.

²⁸ Әйел өзінің су алып жүрген ыдысын сол жерде қалдырды да, қаладағы адамдарға барып:

²⁹ -Менің барлық істеген істерім жайында айтып берген Адамды барып көріңдер! Сол Мәсіх емес пе екен? - деді.

³⁰ Олар қаладан шығып, Оны көруге сонда келді.

³¹ Сол арада шәкірттері Оған: -Ұстаз, (Равви) тамақтанып ал, - деп Оған өтініш білдірді.

³² Иса оларға: -Менің жейтін «азығымды» сендер білмейсіңдер, - деді.

³³ Ал шәкірттері бір-біріне: -Біреу Оған тамақ әкеліп берген бе? - десті.

³⁴ Сонда Иса оларға: -Мені Жібергеннің еркін орындап, Оның Маған тапсырған ісін ақырына дейін жеткізіп, оны аяқтау сол маған «азық» болады.

³⁵ Сендер: «Астық жинау науқанына әлі төрт ай бар», -деп айтасыңдар. Мен сендерге былай деймін: -Көздеріңді ашып, жердегі егіндікке қараңдар, олар пісіп тұр және оруға дайын тұр!

³⁶ Міне, орақшы ақысын алып, мәңгілік өмірдің жемістерін жинап жатыр, сондықтан егуші мен орып алушы екеуі бірге қуануы тиіс.

³⁷ «Біреу сепсе, біреу орады» деген сөздің шындығы осында жатыр.

³⁸ Мен сендерді өздеріңнің еңбектерің сіңбеген нәрсені орып алуға жібердім, ал басқалардың еңбегі бұған сіңген еді, алайда сендер олардың атқарған еңбектеріне қатыстыңдар, - деді.

³⁹ Сол қаладағы көптеген самариялықтар әлгі әйелдің: «Менің жасаған істерім туралы айтып берді», -деген куәлігі арқылы Оған сенді.

⁴⁰ Самариялықтар Исаға келген кезде, олар Оның өздерімен бірге қалуын өтініп сұрады, сондықтан Иса сол жерде тағы да екі күнге қалды.

⁴¹ Сөйтіп, Исаның айтқан сөздері арқылы сол жердегі көптеген халық сенімді қабылдады.

⁴² Олар әлгі әйелге: -Біздер тек сенің айтқан сөзіңе бола сеніп тұрған жоқпыз, өзіміз де Оны естідік, енді біз Бұл Адамның осы әлемге келген Құтқарушы екенін білеміз, -десті.

⁴³ Екі күн өткен соң, Иса сол жерден шығып, Ғалилея жаққа кетті.

⁴⁴ Исаның Өзі алдында:«Пайғамбар өз ата-мекенінде қадірлі болмайды», - деп куәлік айтқан болатын.

⁴⁵ Дегенмен, Ол Ғалилеяға келген кезде, ғалилеялықтар Оны жылы қабылдады, өйткені олар да мейрам кезінде Иерусалимге барып, Исаның сол мейрамда жасаған істерінің бәрін көрген болатын.

⁴⁶ Сосын Ол Өзі суды шарапқа айналдырған Ғалилея жеріндегі Кана қаласына тағы да қайтып келді. Қапарнаумда патшаның бір қызметкері болды, оның баласы ауырып жатқан болатын.

⁴⁷ Сол адам Исаның Яһудеядан Ғалилеяға қайтып келгенін естіген соң, Оған келіп, өзінің ұлы өлім аузында жатқанын, Одан сауықтырып беруін өтінді.

⁴⁸ Сонда Иса оған: -Сендер арнайы бір белгілер мен кереметтерді көрмесеңдер, сенгілерің келмейді, - деді.

⁴⁹ Патшаның қызметкері: -Мырза, менің балам өліп қалмай тұрған кезде келіңізші, - деп өтінді.

⁵⁰ Иса оған: -Сенің ұлың тірі, бара бер, -деді. Ол Исаның айтқан сөзіне сеніп, кетіп қалды.

⁵¹ Патшаның сол қызметкері қайтып келе жатқанда, жолда оның құлдары кездесіп, оның баласының тірі екенін айтады.

⁵² Ол әлгі құлдарынан баласының жағдайы қай уақыттан бастап жақсара бастағанын сұрағанда, олар: -Кеше кешкі сағат жетінің кезінде ыстығы басылды, -деп жауап берді.

⁵³ Сонда әлгі ұлдың әкесі сол уақыт Исаның: «Сенің ұлың тірі», -деп оған айтқан кез екенін білді. Осыдан кейін оның өзі және бүкіл үй іші сенімге ие болды.

⁵⁴ Бұл Исаның Яһудеядан Ғалилея өлкесіне келген кезде жасаған екінші кереметі еді.