Жохан 20 - Zhana Osiet

¹ Аптаның бірінші күні болатын. Таң әлі ата қоймаған кез, дала қараңғы. Міне, сол кезде мағдалалық Мариям қабірге келді. Ол қабірдің бетіндегі тастың орнынан алынып тасталғанын көрді.

² Содан соң ол Шимон Петр мен Исаның Өзі жақсы көретін (басқа бір) шәкіртіне жүгіріп келіп, оларға: -Қабірден Иемізді алып кетіпті. Оны қайда апарып қойғанын да білмейміз, - деді.

³ Сонда Петр мен сол (басқа бір) шәкірт қабірге бармақ болды, сыртқа шығып,

⁴ екеуі жүгіре жөнелді. Сол (басқа) шәкірт жылдам жүгіріп, қабірге Петірден бұрын жетті.

⁵ Ол төмен еңкейіп қарап, тек жатқан маталарды көрді, алайда ішіне кірмеді.

⁶ Оның соңынан еріп келген Петр келе сала қабірге кірді, ол да тек сол жерде жатқан маталарды ғана көрді.

⁷ Исаның басын ораған орамалдың маталардан бөлек басқа жерге бүктеп қойылғанын көзі шалды.

⁸ Сол кезде Петірден бұрын келген әлгі басқа шәкірт те қабірге кірді. Ол да соны көріп, сенді.

⁹ Дегенмен, Оның өлімнен қайта тіріліп кетуінің Жазбаға сай болғанын олар әлі де білмейтін еді.

¹⁰ Шәкірттер қайтып келіп, қалған шәкірттерге қосылды.

¹¹ Мәриям қабірдің сыртында жылап тұрды. Ол жылаған күйі төмен еңкейіп, қабірге қараған кезде,

¹² бірі Иса жатқан жердің бас жағында, екіншісі аяқ жағында отырған, үстеріңде аппақ киімдері бар екі періштені көреді.

¹³ Сонда олар Мәриямға: -Әйел, неге жылап тұрсың? -деді. Мәриям Оларға: -Менің Иемді алып кетіпті, мен Оны қайда апарып қойғанын білмеймін, - деді.

¹⁴ Мәриям осылай деп, арт жағына бұрылғанда, өзінің артында тұрған Исаны көрді, алайда Оның Исаның Өзі екенін білген жоқ.

¹⁵ Сонда Иса оған: -Әйел, неге жылап тұрсың? Кімді іздеп жүрсің? -деді. Ал Мәриям Оны бағбан екен деп ойлап, Одан: -Мырза, егер де Сен Оны басқа бір жерге апарып қойған болсаң, Оны қайда қойғаныңды маған айтшы. Мен Оны өзіммен бірге алып кетейін, - деді.

¹⁶ Иса оған: -Мәриям! -деді. Сонда Мәриям Оған бұрылып: -Ұстаз! -деді. (Бұл еврейше «Раввуни», яғни, «Ұстаз» дегенді білдіретін еді).

¹⁷ Иса Мәриямға: -Қолыңды Маған тигізбе, өйткені Мен әлі Әкеме көтерілген жоқпын. Сен одан да Менің бауырларыма барып, енді Менің Әкеме және Сендердің де Әкелеріңе, Менің Құдайыма және Сендердің де Құдайларыңа көтеріліп кететінімді айт! - деді.

¹⁸ Осыдан кейін мағдалалық Мәриям (шәкірттерге) келіп: -Мен Иемді көрдім! -деп, Мәриямға Иса не айтқан болса, соның бәрін Исаның шәкірттеріне айтып берді.

¹⁹ Сол аптаның сенбі күні және кешкі мезгіл болатын. Яһудейлерден қорыққан шәкірттері есіктерді жауып алып отырған кезде, Иса келді, олардың орталарына тұра қалып, оларға: * -Сендерде амандық пен бейбіт тыныштық болсын! - деді.

²⁰ Иса осылай деген соң, оларға Өзінің қолдары мен бүйірін көрсетті. Сонда шәкірттері Иесін көріп, қуанып кетті.

²¹ Иса оларға тағы да: -Сендерде амандық пен бейбіт тыныштық болсын! Мені Әкем қалай жіберсе, Мен де сендерді солай жіберіп тұрмын, - деді.

²² Иса осыны айтты да, Өзінің демін оларға үрлеп: -Киелі Рухты қабылдаңдар! - деді.

²³ Кімдерді кешірсеңдер, сендердің де күнәларың кешіріледі, ал кімдерді кешірмейтін болсаңдар, (күнәні) қалдырсаңдар, онда сендердің де күнәларың кешірілмейді, өздеріңде қалады, - деді.

²⁴ Иса келген кезде, Оның он екі шәкіртінің бірі және егіздің сыңары аталып кеткен Тома оларман бірге болмаған еді.

²⁵ Басқа шәкірттері оған келіп: -Біз Иемізді көрдік! -деді. Тома оларға: -Егер де Оның қолындағы шегелердің іздерін өз саусағыммен, ал Оның бүйірін өз қолыммен ұстап көрмесем, мен сенбеймін, - деген болатын.

²⁶ Осы оқиғадан кейін сегіз күн өткенде, Исаның шәкірттері үйде тағы да өздері жиналды. Тома да олармен бірге болатын. Есіктер іштен жабық болатын, сол кезде Иса ішке кіріп келіп, олардың орталарына тұра қалды да: -Сендерге амандық пен бейбіт тыныштық болсын! - деді.

²⁷ Содан кейін Томаға: -Саусағыңды бері әкел де, Менің қолдарыма қара. Қолыңды Менің бүйіріме қой, сенімсіз болма, керісінше, сенетін бол! - деді.

²⁸ Сонда Тома Оған: -Бұл -Менің Ием, Менің Құдайым! -деп жауап берді.

²⁹ Иса оған: -Сонымен, сен тек Мені көргеннен кейін ғана сеніп тұрсың ба? Ал Мені көрмесе де, Маған сенетіндер бақытты! - деді.

³⁰ Иса Өзінің шәкірттерінің алдында бұл кітапқа жазылмаған бұдан басқа да көп кереметтерді жасады.

³¹ Мәсіх Исаның Құдайдың Ұлы екеніне сендердің күмән келтірмей сеніп жүрулерің үшін және сендер Оның атымен аталған мәңгілік өмірге сенім арқылы қол жеткізсін деген мақсатпен осы кітап жазылды.