Жохан 2 - Zhana Osiet

¹ Үшінші күні Ғалилея аймағындағы Кана атты қалада үйлену тойы болды, сол жерге Исаның анасы да барды.

² Үйлену тойына Исаның Өзі де, сонымен қатар, Оның шәкірттері де шақырылды.

³ Бір мезгілде олардың шараптары таусылып қалды, сонда Исаның анасы Оған: -Шараптары таусылып қалды, -деді.

⁴ Сонда Иса анасына: -Анашым, мұның Маған және саған қатысы бар ма? Менің уақытым әлі келген жоқ, -деді.

⁵ Алайда Исаның анасы сондағы қызметшілерге: -Ол сендерге не айтса, соны орындаңдар! - деді.

⁶ Сол жерде яһудейлер өздерінің салт-дәстүрлеріне байланысты тазару рәсіміне арнайы қолданатын, әрқайсысына кем дегенде екі-үш мөлшердей су сиятын алты тас күбі тұрған болатын.

⁷ Сонда Иса оларға: -Мына күбілерді суға толтырыңдар! -деді. Олар сол күбілерді жоғарғы ернеулеріне дейін толтырды.

⁸ Одан кейін Иса оларға: -Енді ыдысты күбіге батырып алып, той басқарушыға апарып беріңдер, -деді. Олар солай істеді де, апарып берді.

⁹ Той басқарушы шарапқа айналған судың дәмін татып көреді, бірақ бұл шараптың қалай, неден жасалғанын білмейтін, оны тек ыдысты батырып алып, толтырған қызметшілер ғана білетін. Сонда той басқарушысы күйеу жігітті өзіне шақыртып алады.

¹⁰ Содан кейін оған: -Кез-келген адам ең алдымен жақсы шарабын қояды, ал қонақтар масайған кезде шараптың нашарын береді. Сен болсаң, жақсы шарапты осы кезге дейін сақтап қойыпсың, - деді.

¹¹ Бұл Исаның Ғалилеяның Кана қаласында жасаған алғашқы кереметтерінің бірі болатын, осы арқылы Ол Өзінің даңқын көрсетті, ал шәкірттері Оған сенді.

¹² Осыдан кейін Иса өзінің анасымен, бауырларымен және шәкірттерімен бірге Қапарнаумға келді, сол жерде олар бірнеше күнге қалатын болды.

¹³ Яһудейлердің құтқарылу мейрамы жақындап қалғандықтан, Иса төменнен жоғары көтеріліп, Иерусалимге келді.

¹⁴ Содан кейін Ол ғибадатханаға кірді, Ол сол жерде өгіздері мен қойларын, көгершіндерін сатып, ақша айырбастап отырғандарды көрді.

¹⁵ Сонда Ол жіптен (арқаннан) қамшы жасап алды да, қой, өгіздерімен бірге олардың бәрін ғибадатханадан қуып шықты. Ақша айырбастаушылардың ұсақ ақшаларын шашып, олардың үстелдерін төңкеріп тастады.

¹⁶ Сол жерде көгершін сатып отырғандарға: -Мыналарыңды бұл жерден алып кетіңдер! Менің Әкемнің үйін сауда орнына айналдырмаңдар! - деді.

¹⁷ «Сенің үйіңе қатысты қызғаныштан Мен жапа шегемін», -деген Жазбадағы сөз сол сәтте шәкірттерінің есіне түседі.

¹⁸ Яһудейлер Одан: -Мұны не үшін істедің? Осы ісіңмен бізге қандай белгі көрсетіп тұрсың? - деп сұрады.

¹⁹ Иса оларға: -Мына киелі үйді бұзыңдар! Ал Мен оны үш күннің ішінде қайта тұрғызамын, - деді.

²⁰ -Осы киелі үйді қырық алты жыл бойы салды, Сен оны үш күнде қайта тұрғызбақсың ба? -деді яhудейлер Оған.

²¹ Алайда Иса «киелі үй» деп, Өзінің денесі туралы айтқан болатын.

²² Ол өлімнен қайта тірілген кезде, Оның осы айтқандарының бәрін шәкірттері естеріне түсіріп, Жазбада жазылғанға да, Исаның айтқан сөздеріне де сенді.

²³ Иса Иерусалимде болған Құтқарылу мейрамы кезінде, көптеген кереметтер жасады, соны көргендердің көбі Оған сенді.

²⁴ Бірақ Исаның Өзі оларға сенім артпады, өйткені Ол адамдарды өте жақсы білетін.

²⁵ Сондықтан адам жайында ешкімнің Өзіне куәлік беруіне Ол мұқтаж емес еді, себебі адамның ішкі жан дүниесінде не барын Ол өте жақсы білетін.