Жохан 16 - Zhana Osiet

¹ Мен мұны сендер сенімнен таймасын деп айтып тұрмын.

² Себебі олар сендерді синагогаларынан қуып шығып, өлімге қияды, тіпті, олардың әрқайсысы Құдайға осылайша қызмет етіп жатырмыз деген ойда болады.

³ Олар бұл іс-әрекетті не Әкені, не Мені білмегендіктен істейді.

⁴ Мен мұны сендерге осы уақыт келген кезде, Менің айтқандарымды естеріңе түсіру үшін айтып тұрмын. Ең басында Мен өздеріңмен бірге болғандықтан, сендерге бұл жайында айтпадым.

⁵ Мен енді Өзімді Жібергенге бармақпын. Сендердің ешқайсыларың Менен: «Сен қайда бара жатырсың?» -деп сұраған жоқсыңдар.

⁶ Себебі Мен осы жайтты сендерге айтқан кезде, сендердің жүректерің қайғыға толып кетті.

⁷ Алайда Мен сендерге шындықты айтып тұрмын: Менің кеткенім сендерге пайдалы болады. Егер де Мен кетпейтін болсам, онда сендерге Қамқоршы келмейді. Мен Оны тек сол жаққа барғанда ғана сендерге жіберемін.

⁸ Ол келген соң, осы әлемді әшкерелеу үшін, күнә туралы, әділдік туралы және сот туралы Ол айтып жеткізетін болады.

⁹ Енді күнә туралы айтсақ, олардың күнәсі -Маған сенбегені.

¹⁰ Ал әділдікке келсек, Мен Әкеге барамын, енді бұдан былай сендер Мені көрмейсіңдер.

¹¹ Енді сот туралы айтсақ, осы әлемнің билеушісі сотталды.

¹² Сендерге айтарым әлі де көп, алайда сендер қазір оны көтере алмайсыңдар.

¹³ Ал келетін Рух -Ол шындықтың Рухы, міне, сол Рух келгеннен кейін, сендердің әрбіреуіңді шындыққа жетелейді. Өйткені Ол Өз атынан сөйлемейді, керісінше, Ол нені естісе, тек соны айтады және Ол алдағы болатын жайттарды ашып, жариялап тұрады.

¹⁴ Мені даңққа бөлейтін -Сол, себебі Ол Менен алғанды сендерге жариялап отырады.

¹⁵ Әкемде бардың бәрі -Менікі, сондықтан Мен сендерге, ал Ол Менен алып, сендерге жариялайды деп айттым.

¹⁶ Енді біраз уақыттан кейін Мені көрмейсіңдер, алайда біраз уақыт өткен соң, Мені қайтадан көретін боласыңдар, -деді.

¹⁷ Сонда Оның шәкірттері бір-біріне былай деді: «Біраз уақыттан кейін Мені көрмейсіңдер, алайда біраз уақыттан кейін Мені қайтадан көресіңдер», «Мен Әкеме барамын», -деп бізге неге айтып тұр?

¹⁸ Олар: -«Біраз уақыттан кейін» дегені нені білдіреді? Оның не жайында айтқанын түсінбедік, - деп жатты.

¹⁹ Иса олардың Өзінен не жайында сұрағысы келіп тұрғандарын біліп, оларға: -Менің сендерге: «Біраз уақыттан кейін Мені көрмейсіңдер, алайда біраз уақыттан кейін Мені қайтадан көретін боласыңдар», -деп айтқаным туралы бір-біріңнен сұрастырып, соған жауап іздеп жатырсыңдар ма?

²⁰ Сендерге шындықты, тек шындықты айтамын: сендер жылап және жоқтау айтатын боласыңдар. Бұған осы әлем қуанатын болады, ал сендер қайғыда боласыңдар, бірақ сендердің қайғыларың қуанышқа айналады.

²¹ Әйел босанатын кезде қайғыра бастайды, өйткені оның сондай күйге түсетін уақыты келді. Ал нәрестесін туып, босанғаннан кейін, осы әлемге адам келді деген қуаныштың арқасында, ол әлгі қиналған кезін есіне де алмайды.

²² Міне, сендер де дәл сондай қайғылы күйде тұрсыңдар, ал Мен өздеріңмен қайтадан көрісіп, қауышқан сәтте сендердің жүректерің қуанышты күйде болады. Сендердің сол қуанышты сәттеріңді ешкім сендерден тартып ала алмайды.

²³ Сол күн келгенге дейін сендер Менен еш нәрсе де сұрамайсыңдар. Сендерге шындықты, тек шындықты айтайын: Әкеден не сұрасаңдар, оны тек Менің атымнан сұраңдар, сонда сол сендерге берілетін болады.

²⁴ Осы уақытқа дейін сендер Менің атыммен еш нәрсе де сұраған жоқсыңдар, ал енді сендердің қуанышты сәттерің толық болу үшін, сұраңдар, сонда аласыңдар.

²⁵ Мен сендерге мұны астарлап айттым, алайда енді сендерге астарлап емес, Әкем туралы сендерге ашық айтатын уақыт келді.

²⁶ Сол күннен бастап, Менің атымнан сұрайтын боласыңдар. Әкеден Мен сендер жайында өтініп сұрамаймын деп айтпаймын.

²⁷ Әкенің Өзі сендерді өте қатты жақсы көреді, өйткені сендер де Мені жақсы көрдіңдер және Менің Құдайдан осында келгеніме сендер сендіңдер.

²⁸ Мен Әкеден осы әлемге келдім. Енді, міне, Мен осы әлемді қалдырып, Әкеме бара жатырмын, - деді.

²⁹ Сонда Оның шәкірттері: -Міне, енді еш нәрсені бүкпей, ашық айтып тұрсың.

³⁰ Сенің бәрін де білетініңді енді біз түсінеміз. Саған біреуден бір нәрсе туралы сұраудың да қажеті жоқ. Сондықтан Сенің Құдайдан осында келгеніңе біз сеніп тұрмыз, - деді.

³¹ Иса оларға: - Енді сенесіңдер ме? - деді.

³² Міне, енді сендердің әрқайсысың жан -жаққа бытырап кетіп, Мені жападан-жалғыз қалдыратын уақыттарың да келді. Бірақ Мен жалғыз болмаймын, өйткені Менің Әкем бар, Ол Менімен бірге болады.

³³ Мен мұны сендер Мендегі тыныштыққа ие болсын деп айтып тұрмын. Осы әлемнен зорлық -зомбылық көресіңдер, алайда батыл болыңдар! Мен осы әлемді жеңдім! - деді.