Жохан 15 - Zhana Osiet

¹ Мен -шынайы жүзім бұтасымын, Менің Әкем -жүзім өсіруші.

² Ол Менде өсіп, бірақ өзі жеміс бермейтін әрбір сабақты кесіп тастайды. Ал жеміс әкелетін әрбір сабақты Ол тазартып отырады, сонда ол мол жеміс беретін болады.

³ Енді сендер Мен өздеріңе айтқан сөз арқылы таза болдыңдар.

⁴ Сондықтан Менде болыңдар, Мен сендерде боламын. Жүзім бұтасының сабағы өздігінен жеміс бере алмайтыны секілді сендер Менде болмасаңдар, жеміс әкеле алмайсыңдар.

⁵ Мен -жүзім бұтасымын, сендер сабақтарым боласыңдар. Кім Менімен қалса, Мен де сонымен қаламын, сонда ол көп жеміс әкеледі. Сендер Менсіз еш нәрсе жасай алмайсыңдар.

⁶ Менде қалмайтын әркім жарамсыз сабақ сияқты сыртқа лақтырылып тасталады, ол қураған соң, жинап алып, өртеп жібереді.

⁷ Егер де сендер Менде қалсаңдар, онда Менің сөздерім де сендерде қалады. Сонда өздеріңе не қаласаңдар, сол орындалатын болады.

⁸ Сонымен, егер сендер Менің шәкіртім болсаңдар ғана мол өнім әкеле аласыңдар, осы арқылы Менің Әкем даңққа бөленіп, *Оның аты мадақталатын болады.

⁹ Әкем Мені қалай сүйсе, Мен де сендерді солай сүйемін. Менің сүйіспеншілігімде қалыңдар.

¹⁰ Егер сендер Менің өсиеттерімді сақтайтын болсаңдар, онда Менің сүйіспеншілігімде қаласыңдар. Сондайақ Мен де Әкемнің өсиеттерін сақтап, Мен де Оның сүйіспеншілігенде қалдым.

¹¹ Мен мұны Менің қуанышымның сендерде болғанын және сол қуанышқа сендердің де толығымен кенелгендеріңді қалағандықтан айтып тұрмын.

¹² Менің сендерге беретін өсиетім бар, ол мынау: Мен сендерді қалай сүйсем, сендер де бір-біріңді солай сүйіңдер!

¹³ Дәл осындай үлкен сүйіспеншілік өзі жақсы көретіндері үшін өз өмірін қиятыннан басқада әлі ешқашан ешкімде болған емес.

¹⁴ Егер де сендер Менің өздеріңе берген өсиеттерімді орындайтын болсаңдар, сендер Менің достарым боласыңдар.

¹⁵ Енді Мен сендерді құлсыңдар деп айтпаймын, өйткені құл иесінің не істеп жүргенін білмейді. Мен сендерді достарым деп атадым, өйткені Мен Әкемнен не естісем, соның бәрін сендерге жеткіздім.

¹⁶ Мені таңдаған сендер емес, қайта, Мен сендерді таңдадым, сендер жеміс берсін әрі сол жемістерің тұрақты болсын деген мақсатпен таңдап алдым. Енді сендер Менің атымнан Әкеден не сұрасаңдар Ол сендерге соны беретін болады.

¹⁷ Менің сендерге беретін өсиетім мынау: бір-біріңді сүйіңдер!

¹⁸ Егер де осы әлем сендерді жеккөрсе, оның сендерден бұрын мына Мені жеккөретінін біліңдер.

¹⁹ Егер де сендер осы әлемнен болсаңдар, онда осы әлем сендерді жақсы көруші еді, алайда сендер осы әлемнен емессіңдер. Ал Мен сендерді осы әлемнен таңдап алдым, сондықтан да осы әлем сендерді жеккөреді.

²⁰ «Құл өз қожайынынан жоғары болмайды», -деп Менің бір кезде айтқан сөзім естеріңде болсын. Егер де Мені қудаласа, олар сендерді де қудалайтын болады. Егер де олар Менің сөзімді ұстанса, онда олар сендердікін де ұстанатын болады.

²¹ Алайда осының бәрін олар сендерге тек Менің атыма бола істейді, себебі олар Мені жібергенді білмейді. Алайда сендерге (қарсыластарың) осының бәрін тек Менің атыма бола істейді, себебі олар Мені Жібергенді білмейді.

²² Егер де Мен осы әлемге келмесем әрі оларға осы туралы жариялап айтпасам, оларда күнә болмас еді, бұдан былай олар біз күнәсізбіз деп еш сылтау айта алмайды.

²³ Кім Мені жеккөрсе, сол Менің Әкемді де жеккөреді.

²⁴ Егер де Мен бұған дейін ешкім жасамағанды істемесем, онда олардың күнәсі болмас еді. Бірақ олар сол істерді көрді, соның өзінде олар Мені де, Әкемді де жеккөруде.

²⁵ «Олар Мені ешқандай себепсіз жеккөрді», -деп олардың Заңдарында жазылған сөз осылай орындалуы тиіс.

²⁶ Мен сендерге Әкеден сұрап, жіберетін Қамқоршы келген кезде, Ол Мен туралы куәлік береді және Әкеден шыққан Ол сендерге келеді.

²⁷ Мына сендер басынан бері Менімен бірге болғандықтан, енді сендер де Менің істеріме куәлік бересіңдер.