Жохан 14 - Zhana Osiet

¹ Жүректерің толқымасын! Құдайға сеніңдер және Маған да сеніңдер!

² Менің Әкемнің үйінде тұратын орын өте көп, егер солай болмаса, Мен сендерге орын дайындауға бара жатырмын деп айтар ма едім?

³ Мен сонда барып, сендерге орын дайындаған соң, Мен тағы да қайтып келемін, сонда Өзіммен бірге сендерді алып кетемін, өйткені Мен қайда болсам, сендер де сонда болуға тиіссіңдер.

⁴ Менің қайда баратынымды да және сонда апратын жолды да білесіңдер, - деді.

⁵ Сонда Тома Оған: -Ием, біз Сенің қайда бара жатқаныңды білмейміз, онда баратын жолды қалай білеміз? - деді.

⁶ Иса оған: -Жол да, шындық та, өмір де -Мен. Мен арқылы болмаса, ешкім де Әкеге бара алмайды.

⁷ Егерде сендер Мені білсеңдер, онда сендер Менің Әкемді де білгендерің. Міне, енді осы сәттен бастап Оны білесіңдер, өйткені сендер Оны көрдіңдер.

⁸ -Ием, бізге тек Әкені көрсетсең болды, сол да бізге жеткілікті, - деді Філіп Оған.

⁹ Иса оған: -Мен сендермен қанша уақыт бірге болдым, сонда да Мені танымадың ба, Філіп? Мені көрген Әкені де көреді. Ал сен қалайша бізге Әкені көрсет деп айтып тұрсың?

¹⁰ Әлде сен Менің Әкеде екенімді, ал Әкенің Менде екеніне сенбейсің бе? Сендерге айтқан сөздерді Мен Өз атымнан айтқан жоқпын, Менің бойымда Әке өмір сүріп жатыр, сондықтан атқарылған істің бәрі Соның ісі.

¹¹ Менің Әкемен бірге екеніме, ал Әкенің Менімен бірге екеніне сендер де сеніңдер, тым болмаса, мынау жасалып жатқан істер арқылы Маған сеніңдер.

¹² Сендерге шындықты, тағы да шындықты айтамын: Мен жасап жүрген осы істерді Маған сенген де істей алады және ол бұдан да зор нәрселерді істейтін болады, себебі Мен қайтадан Әкеге бара жатырмын.

¹³ Әкенің даңқы Оның Ұлы арқылы мадақталуы үшін, сендер Менен не сұрасаңдар, Мен соны істеймін.

¹⁴ Сендер Менің атымнан не сұрасаңдар, Мен соны орындаймын.

¹⁵ Егер де сендер Мені сүйсеңдер, онда Менің өсиетімді орындаңдар.

¹⁶ Мен Әкеден сендермен мәңгі бірге болатын басқа бір Қамқоршыны жіберуін өтініп сұрадым.

¹⁷ Ол -шындықтың Рухы, мына әлем сол үшін Оны қабылдай алмайды, себебі олар Оны не көрмейді, не білмейді. Ал сендер Оны білесіңдер, өйткені Ол осы жерде қалады және сендермен бірге болады.

¹⁸ Мен сендерді жетімсіретіп тастап кетпеймін, сендерге қайтып келемін.

¹⁹ Енді біраз уақыттан кейін бұл әлем Мені көрмейтін болады. Ал сендер Мені көресіңдер, өйткені Мен сендермен бірге өмір сүретін боламын және сендер де Менімен бірге өмір сүретін боласыңдар.

²⁰ Сол күн келген сәтте сендер Менің Өзімнің Әкеммен бірге екенімді, ал сендер Менімен, Менің сендермен бірге екенімді білетін боласыңдар.

²¹ Кім Менің өсиеттерімді қабылдап, соларды орындайтын болса, онда ол Мені сүйеді. Кім Мені сүйсе, сол Менің Әкемнің сүйіспеншілігіне бөленеді. Мен де оны сүйіспеншілікке бөлеп, Мен оған Өзімді көрсететін боламын, - деді.

²² Сонда Яһуда (Исқариот емес): -Ием, Өзіңді осы әлемге емес, бізге көрсетуге дайындалғаның не? - деді.

²³ -Кімде-кім Мені сүйсе әрі Менің сөзімді орындайтын болса, онда ол Менің Әкемнің сүйіспеншілігіне бөленеді, сонда Біз оған келіп, оны Өзіміз тұратын мекен жасаймыз, -деп Иса оған жауап берді.

²⁴ Кім Мені сүймейтін болса, сол Менің сөзімді орындамайды. Сендер естіген бұл сөз Менікі емес, ол Мені Жіберген Әкенің сөзі болатын.

²⁵ Мен өздеріңмен бірге болған кезімде, сендерге сол сөзді айтып жеткіздім.

²⁶ Келетін Киелі Рух -Ол Қамқоршы, Менің Әкем Оны Менің атымнан жібереді. Енді тек Сол ғана сендерді барлығына үйретіп, тек Сол ғана Менің айтқандарымды сендердің естеріңе түгел салып отыратын болады.

²⁷ Мен сендерге Өзімнің бейбіт тыныштығымды қалдырамын, өйткені сол бейбіт тыныштық Өзімдікі, сондықтан оны сендерге бердім. Менің беріп тұрғаным осы әлемнің беретін нәрсесіне ұқсамайды. Сондықтан, сендердің жүректерің енді не қайғырмасын, не қорықпасын!

²⁸ Менің өздеріңе: «Сендерден кетемін және өздеріңе қайтып келемін», -деп айтқанымды сендер естідіңдер. Егер де сендер Мені сүйсеңдер, онда сендер Менің Әкеме бара жатқаным үшін қуанар едіңдер, себебі Менің Әкемнің мәртебесі Менен де жоғары.

²⁹ Осы нәрселер іске асып, орындалған кезде, сендердің сенімге ие болуларың үшін, сендерге қазір және алдын ала айтуымның себебі осында.

³⁰ Енді сендермен көп сөйлесе алмаймын, өйткені, міне, осы әлемнің әміршісі келе жатыр, алайда оның Маған ешқандай да үстемдігі жүрмейді.

³¹ Бірақ осы әлемге Әкемді қалай сүйетінімді білдіру үшін, Әке Маған қалай бұйырған болса, Мен бәрін солай істедім. Тұрыңдар, бұл жерден кетейік! - деді.