Жохан 11 - Zhana Osiet

¹ Бір кезде Елазар есімді адам науқастанып қалды. Ол Мәриям мен Марта тұратын Бетания ауылында еді.

² Елазар кезінде Иемізді мира (иіс) майымен майлап, Оның аяғын өзінің шашымен сүртіп құрғатқан Мәриямның туған ағасы болатын.

³ Оның әпкесі мен сіңлісі: -Ием, Сен жақсы көретін адам ауырып қалды, оның хал -жағдайын келіп көрші, -деп Оған хабар жіберді.

⁴ Мұны естіген Иса: -Бұл ауру өлімге апаратын ауру емес, алайда бұл Құдайды даңққа бөлеп, осы арқылы Құдайдың Ұлы мадақталатын болады, - деді.

⁵ Иса Мартаны да, оның сіңлісін де, Елезарды да жақсы көретін.

⁶ Иса оның ауырып қалғанын естісе де, Өзі болған сол жерде тағы да екі күнге қалып қойды.

⁷ Тек содан кейін шәкірттеріне: -Қайтадан Яһудея жеріне барайық, жүріңдер! - деді.

⁸ Сонда шәкірттері Оған: -Ұстаз, (Равви) сол яһудейлер жақында ғана Сені таспан атқыламақ болып, Сені іздеп еді ғой, енді сол жаққа тағы да барайын деп тұрсың ба? -деді.

⁹ Иса оларға: -Күндізгі уақытта он екі сағат бар емес пе? Егер де кімде-кім күндіз жүретін болса, сол сүрінбейді, өйткені осы әлемдегі жарықты ол көре алады, -деп жауап берді.

¹⁰ Кімде-кім түнде жүретін болса, сол сүрінеді, өйткені түнде жарық болмайды, - деді.

¹¹ Осылай деген соң Иса: -Біздің досымыз Елазар ұйықтап жатыр, Мен оны ояту үшін сол жаққа барамын, -деді оларға.

¹² -Ием, егер де ол ұйықтап жатса, ол сауығып кетеді, -деді шәкірттері Оған.

¹³ Алайда Иса оларға оның өлгені жайында айтқан болатын. Шәкірттері Ол әдеттегі ұйқы жайында айтып тұр деп ойлады.

¹⁴ Сол кезде Иса оларға: -Елезар өліп қалды, -деп ашығын айтты.

¹⁵ Мен сендерде сенімнің пайда болғанына қуанып тұрмын, Мен әлі ол жерде болмадым, енді сол жаққа барайық, жүріңдер - деді.

¹⁶ Сонда егіздің сыңары аталып кеткен Тома: -Біз де Онымен бірге барып, бірге өлейік, жүріңдер -деді ол сол арадағы өзі сияқты шәкірттерге.

¹⁷ Иса сол жерге келген кезде, Елазардың қабірде жатқанына төрт күн болғанын білді.

¹⁸ Бетания Иерусалимге шамамен он бес стадий (екі жарым-үш шақырым) жақын орналасқан болатын.

¹⁹ Сол себепті көптеген яһудейлер келіп, бауырынан айырылған Марта мен Мәриямға жұбату сөздерін айтып жатты.

²⁰ Марта Исаның келе жатқанын ести сала, Оны қарсы алу үшін, алдынан шықты, Мәриям үйде отырып қалды.

²¹ Марта Исаға: -Ием, егер де Сен осы жерде болсаң, менің бауырым өлмес еді!

²² Алайда Сен қазір Құдайдан не сұрасаң, соны Құдай Саған беретінін білемін, - деді.

²³ -Сенің бауырың өлімнен қайта тіріледі, -деп Иса оған жауап берді.

²⁴ -Қайта тірілу ақырғы күні болады, оның өлімнен қайта тірілетіні де сол кезде болатынын білемін, -деді Марта.

²⁵ Иса оған: -Өлімнен қайта тірілтетін де, өмір де -Мен. Ал Маған сенген адам өліп қалса да, өмір сүре береді.

²⁶ Кімде-кім Маған сеніп өмір сүретін болса, сол мәңгі өлмейтін болады. Осыған сенесің бе? - деді.

²⁷ Сол кезде: -Иә, Ием! -деді Марта, -осы әлемге келген Құдайдың Ұлы Мәсіх -Сенсің! Мен соған сенемін! -деді Оған.

²⁸ Осылай деген соң, Марта сіңлісі Мәриямды жеке шақырып алып: -Ұстаз осында, Ол сені шақырып жатыр, -деді.

²⁹ Сонда Мәриям орнынан тез тұрып, Исаға барды (Исаның алдынан шықты).

³⁰ Бірақ Иса әлі ауылға келмеген еді, Ол әлі де Өзін Марта қарсы алған сол жерде болатын.

³¹ Мәриямның қасында үйде қалып, оған жұбату айтқан яһудейлер Мәриямның орнынан жылдам тұрып, шығып бара жатқанын көргенде, ол енді қабірдің басына барып жылап, жоқтайтын шығар деп ойлады.

³² Мәриям Иса тұрған жерге келді де, Оны көріп, Оның аяғына жығылып: -Ием, егер де Сен осы жерде болсаң, менің бауырым өлмес еді, - деді.

³³ Иса оның жылағанын және онымен бірге еріп келген яһудейлердің де жылап тұрғанын көргенде, Оның Өзі де толқып, рухында қайғырып тұрып:

³⁴ -Оны қай жерге қойдыңдар? -деді. -Ием, барсаң, Өзің көресің, - деді Оған.

³⁵ Сонда Исаның көзіне жас толды.

³⁶ Яһудейлер: -Ол оны қалай жақсы көрген, қараңдаршы, -десті.

³⁷ Сол кезде кейбіреулері: -Егер соқырдың көзін ашқан Осы болса, онда Ол неге мынаның өліп қалуына жол берді? - десті.

³⁸ Иса қайғырған күйі қабір басына келді. Қабір бір үңгірде болғандықтан, беті таспен жабылған еді.

³⁹ -Тасты алып тастаңдар! -деді Иса. Сонда қайтыс болған адамның әпкесі Марта: -Ием, ол иістеніп барады, оның жатқанына, міне, төрт күн болды, - деді.

⁴⁰ Иса оған былай деді: -Егер де маған сенсең, Құдайдың даңқын көретін боласың, - деп саған айтпап па едім?

⁴¹ Олар тасты алып тастады. Иса көзін көкке қадап тұрып: -Әке, Сен Мені естіп тұрсың, сол үшін Мен Саған алғысымды білдіремін.

⁴² Сенің Мені әрқашан естіп тұратыныңды Мен білемін. Дегенмен, Мені жан-жағымнан қоршап тұрған мына халықты Сенің Мені жібергеніңе сендіру үшін осылай айтып тұрмын, - деді.

⁴³ Иса осылай деген соң: -Елазар, шық бері! -деп бар дауыспен айқайлап жіберді.

⁴⁴ Сол кезде аяқ-қолы кебінмен матап байланған, бетаузы оралған өлген адам сыртқа шықты. Иса оларға: -Оның үстіндегілерін шешіп, оған жүре алатын мүмкіндік беріңдер, - деді.

⁴⁵ Мәриямға көңіл айтуға келген яһудейлердің көбі Оның осы істерін көрген кезде, Оған сенгендерін білдірді.

⁴⁶ Бірақ олардың кейбіреулері фарисейлерге барып, Исаның істеген осы істері туралы айтып берді.

⁴⁷ Осыдан кейін бірінші бас қызметкер мен фарисейлер синедерионды (кеңесшілер алқасын) жинап алып: -Мына Адам көптеген кереметтер жасап жүр, соған не істесек болады?

⁴⁸ Егер де біз Оны осылай қалдыратын болсақ, бәрі тек Соған ғана сенетін болады. Сонда римдіктер келіп, осы тұрған жерімізді де, халқымызды да бізден алып қояды, -деді.

⁴⁹ Олардың арасында сол жылы бірінші аға бас қызметкер болған Қаяфа атты бір адам болды. Сол оларға былай деді: -Сендер еш нәрсе де білмейді екенсіңдер.

⁵⁰ Өздеріңе ненің пайда әкелетінін де ұғып тұрған жоқсыңдар. Негізінде, бүкіл халықты құртып жібергеннен гөрі, олардың орнына бір Адамның өлгені дұрыс болады, -деді.

⁵¹ Ол мұны өз атынан айтқан жоқ, себебі ол сол жылы бірінші аға бас қызметкер болып тұрса да, бұл Исаның халық үшін өлуге дайындалып жүргені жайында айтылған пайғамбарлық сөз болатын.

⁵² Алайда бұл жердегі басты мақсат тек бір халықты ғана емес, керісінше, жан-жаққа шашырап кеткен Құдайдың балаларының басын қосып, біріктіріп жинау болатын.

⁵³ Сол күннен бастап, олар Оны өлтірмек болып шешім қабылдады.

⁵⁴ Сол себепті Иса енді яһудейлердің арасында ашық жүрмейтін болды. Осыдан кейін Ол сол аймаққа және шөл далаға жақынырақ орналасқан Ефрайм атты қалаға барып, шәкірттерімен бірге сол жерде қалып қойды.

⁵⁵ Осы кезде яһудейлердің Құтқарылу (пасха) мейрамының болатын мерзімі жақындап қалған болатын. Сол Құтқарылу майрамы қарсаңында тазалану рәсімінен алдын ала өту үшін, көптеген халық Иерусалимге қарай өрлеп бара жатты.

⁵⁶ Ғибадатханадағы яһудейлер Исаны іздеп, бір -біріне: -Сендер қалай ойлайсыңдар? Ол мейрамға келер ме екен? -десті.

⁵⁷ Оны ұстап алғысы келген бас қызметкерлер мен фарисейлер: «Егер де кімде-кім Оның қайда жүргенін білсе, хабар берсін!» - деп бұйрық беріп қойды.