Жохан 10 - Zhana Osiet

¹ Сендерге шындықты, тек шындықты айтамын: егер де кім қой қораға есіктен емес, басқа жақтан кірсе, онда ол-ұры әрі қарақшы.

² Ал кім қой қораға есіктен кірсе, тек сол ғана нағыз бағушы бола алады.

³ Күзетші де есікті тек оған ғана ашып береді, қойлары Оның даусын естиді. Себебі отардың Иесі өз қойларының атын атап шақырып, оларды сыртқа ертіп шығады.

⁴ Ол қойларын шығарған соң, олардың алдында жүріп отырады. Қойлар тек оның ғана соңынан ереді, өйткені қойлар оның даусын таниды.

⁵ Олар бөтен біреудің соңынан ермейді, керісінше, одан қашып кетеді, өйткені бөтен дауысты олар танымайды, -деді.

⁶ Иса оларға осы бір астарлы әңгімені айтып берді. Алайда олар Оның не жайында айтқанын түсінбеді.

⁷ Осыдан кейін Иса оларға тағы да: -Сендерге шындықты, тек шындықты айтамын: Мына Мен-қойлар кіретін «есікпін».

⁸ Ал Маған дейінгі келгендердің бәрі ұрылар мен қарақшылар болатын, сондықтан қойлар оларды естіген жоқ.

⁹ Мен -«есікпін». Кімде-кім Мен арқылы кірсе, сол құтқарылады және кіріп - шығып, жайылым табады.

¹⁰ Ұры қойларды тек ұрлап, оларды сойып, құрту үшін келеді. Ал Мен олар өмірге ие болсын және олардың өмірі ағыл-тегіл мол болсын, - деп келдім.

¹¹ Мен -ізгі бағушымын, себебі тек ізгі бағушы ғана өзінің қойлары үшін жанын (өлімге) қияды.

¹² Жалданушы бағушы бола алмайды, ол қойлардың иесі емес. Ол қойға қасқырдың жақындап келгенін көрген сәтте-ақ, оларды тастап, қашып кетеді. Сонда қасқыр қойларға шауып, оларды бытыратып жібереді.

¹³ Өйткені ол жалданушы болғандықтан, қойлардың қамын ойламайды.

¹⁴ Мен-ізгі бағушымын, Мен өз қойларымды білемін, олар Мені біледі.

¹⁵ Әке Мені қалай білетін болса, Мен де дәл солай Әкені білемін. Мен сол қойлар үшін жанымды қиямын.

¹⁶ Бұл қораға қатысы жоқ басқа да қойларым бар. Мен оларды алып келуге тиіспін, олар да Менің даусымды еститін болады, сонда бәрі бір бағушыға тиісті отарға айналады.

¹⁷ Мен Өзіме қайтадан қайтарып алу үшін, жанымды қиямын, сол үшін де Әкем Мені сүйеді.

¹⁸ Оны Менен ешкім де тартып ала алмайды, алайда Мен оны Өз еркіммен қиямын. Менде оны қиятын да, оны қайтадан қайтарып алатын да билік бар. Бұл өсиетті Мен Өзімнің Әкемнен алдым, - деді.

¹⁹ Осы сөздерден кейін яһудейлердің арасында тағы да дау туды. Көп адамдар былай деді:

²⁰ -Оны сайтан билеп тұр, Оны неге тыңдайсыңдар? -десе, басқалары:

²¹ -Мұндай сөздерді сайтанның билігінде жүргендер айта алмайды. Соқырдың көзін сайтан аша ала ма? - десті.

²² Осы кезде Иерусалимде Жаңару мейрамы өтіп жатқан болатын, бұл қыс мезгілі еді.

²³ Бұл кезде Иса Сүлейменнің ғибадатханасына кіретін жерде орналасқан төбесі жабық алаңда жүрген болатын.

²⁴ Міне, сол жерде яһудейлер Исаны қоршап алды да, Оған: -Сен қашанға дейін біздің жанымызды қинайсың? Егер Сен Мәсіх болсаң, бізге оның ашығын айт! - деді.

²⁵ Иса оларға: -Мен сендерге айттым, сендер сенбедіңдер. Мен жасап жүрген істерімді Әкемнің атынан орындап жүрмін, осы істер Менің Кім екенімді растап, дәлеледейді.

²⁶ Бірақ сендер Маған сенбейсіңдер. Себебі сендер Менің отарымнан емессіңдер.

²⁷ Менің даусымды тек Менің қойларым ғана естиді, себебі Мен оларды білемін, олар Менің артымнан еріп отырады.

²⁸ Мен мәңгілік өмірді тек соларға ғана беремін, сонда олар өлмей, мәңгі өмір сүретін болады және ешкім де оларды Менің қолымнан тартып ала алмайды.

²⁹ Себебі бәрі Маған берілген, алайда Менің Әкемнің мәртебесі бәрінен де жоғары. Сондықтан ешкім де Әкемнің қолындағы нәрсені тартып ала алмайды.

³⁰ Мен және Әкем - біртұтаспыз, - деп жауап берді.

³¹ Осыдан кейін яһудейлер тас алып келіп, Оны таспен атқыламақ болады.

³² Иса оларға: -Мен Әкемнің істеген істерінің жақсы екенін сендердің көбіңе көрсеттім, енді сол істердің қайсысына бола, сендер Мені таспен атқыламақсыңдар? -деді.

³³ Яһудейлер: -Сенің істеген жақсы істеріңе бола емес, Сен Құдайды қорлап тұрсың, міне, сол үшін біз Сені таспен ұрмақ болып тұрмыз. Өйткені Сен-адамсың, бірақ Сен Өзіңді Құдаймен теңестіріп тұрсың! -деп жауап берді.

³⁴ Сонда Иса оларға: -Сендердің Заңдарыңда: «Сендер Менің айтқаныма сай құдай боласыңдар!» -деп жазылған жері бар емес пе?

³⁵ Сонымен, егер Құдайдың сөзі арқылы пайда болғандарға, яғни, соларға «сендер құдайсыңдар» деп айтылған болса, онда сол жазылған Жазбаның күші жойылмайды.

³⁶ Әкенің Өзі киелі етіп (осы әлемге) жіберді. «Құдайдың осы әлемге жіберген Ұлы мына Мен боламын», -деп айтқаным үшін, Маған Құдайды қорладың деп айтып тұрсыңдар ма?

³⁷ Егер де Мен Әкемнің істерін орындамай жүрсем, онда Маған сенбеңдер.

³⁸ Егер де Менің жасаған істеріме сенбесеңдер, онда істеліп жатқан істерге сеніңдер! Міне, сол арқылы Әкенің Менде, Менің Әкеде екенімді сендер білетін боласыңдар, -деді.

³⁹ Олар Исаны тағы да ұстап алмақшы болған кезде, Ол олардың қолдарынан сытылып шығып кетті.

⁴⁰ Осыдан кейін Иса алғаш рет Жақия (адамдарды) суға батырып шомылдырған Иорданның арғы жағына қарай кетті. Ол сол жақта қалып қойды.

⁴¹ Сонда Оған келгендердің көпшілігі бір-біріне: «Жақия ешқандай да бір керемет жасамады, алайда Иса туралы Жақияның айтқандарының бәрі шындық екен», - десті.

⁴² Ақырында сол жердегілердің көбі Оған сене бастады.