Жақыптың хаты 5 - Zhana Osiet

¹ Ал енді байлар, сендердің бастарыңа бақытсыздық төніп келеді, сол үшін зар еңіреп жылаңдар.

² Өйткені сендердің байлықтарың шіріп, ал киімдерің күйеге жем болды,

³ ал алтындарың мен күмістеріңді тот басты, ал сол тот өздеріңе куәлік болады да от секілді сендердің денелеріңді жалмап жұтып қояды. Себебі, сендер сол қазыналарыңды өздеріңнің соңғы күндеріңе арнап жинадыңдар.

⁴ Міне, сендердің егіндік жерлеріңнен егін жинаған жұмыскерлердің еңбегін жеп, сендер олардан тартып алған, олардың еңбек ақыларының дауыстары сендерге қарсы айғақ болып, айқайлап тұр, ал сол егін жинаушылардың жан айқайы Иеміз Саваофтың * құлағына жетті.

⁵ Сендер жер бетінде молшылыққа баттып рахат өмір сүрдіңдер, сол арқылы сендер өз жүректеріңді семіртіп, оны құрбандық күніне дайындап қойдыңдар.

⁶ Сендер Әділетті жолмен жүрген әділ адамды соттап, өлтірдіңдер. Ал Ол болса сендерге ешқандай да қарсылық білдірген жоқ.

⁷ Бауырластар, сонымен төзімдерің ұзаққа созылып, ол Иеміз қайтып келетін кезге дейін жететін болсын. Міне, жер өңдеуші ерте болсын, кеш болсын жерден жақсы жеміс алу үшін жаңбырдың жауатын сәтін күтеді.

⁸ Сол секілді сендер де төзімдеріңді ұзаққа жеткізу үшін, жүректеріңді бекітіп, нығайтыңдар, өйткені Иеміздің келетін уақыты жақындап қалды.

⁹ Бауырластар, сотталмас үшін бір-біріңе қарсы шағым айтпаңдар. Міне, Соттаушы есіктің алдында тұр.

¹⁰ Бауырластарым, зұлымдыққа төзіп, төзімдерің ұзаққа жетсін десеңдер, Иеміздің атынан сөйлеген пайғамбарлардан үлгі алыңдар.

¹¹ Негізі біз төзімділік танытып, табанды болғандарды мадақтап даңқтаймыз, сондай-ақ Әйүптің төзімділігі мен шыдамдылығы туралы естідіңдер, ал соңында Иеміз оның басына түскен қиыншылықтан, оны қалай алып шыққанын да көрдіңдер, өйткені біздің Иеміз аса мейірімді әрі өте қайырымды.

¹² Бауырластарым менің, ең алдымен бекерден-бекер ант бермеңдер, не жермен, не болмаса басқаның атын атап ант беруші болмаңдар. Оның орнына сендердің иә дегендерің -«иә», ал жоқ дегендерің -«жоқ» болсын, сонда үкімнің астына түсіп сотталмайсыңдар.

¹³ Араларыңда кім зұлымдыққа төзіп жүр, сол мінәжат етсін. Ал кім қуанышпен жүр, сол мадақтау жырын айтсын.

¹⁴ Араларыңда кім ауырып жүр, сол қауым ақсақалдарын шақыртсын, одан кейін оған мінәжат етіліп, Иеміздің атымен оның үстіне май жағылсын,

¹⁵ себебі сеніммен айтылған мінәжат әлгі ауырған адамды құтқарып алады, өйткені оны Иеміз көтереді. Ал егер де ол күнә жасаған болса, оның күнәсі кешіріледі.

¹⁶ Сондықтан егер де сауыққыларың келсе істеген күнәларыңды мойындап, бір-біріңе анық айтып, бірің үшін бірің мінәжат етіңдер. Әділ адамның жасаған мінәжаты көп нәрсеге әсер етіп, көп нәрсені өзгерте алады.

¹⁷ Ілияс та бізге ұқсас адам болатын, алайда ол «жаңбыр жаумасын» деп мінәжат еткен кезде, үш жыл алты айға дейін жер бетіне жаңбыр жауған жоқ.

¹⁸ Ал ол тағы да «енді жаңбыр жаусын» деп мінәжат еткен кезде, аспан өзінің жаңбырын жаудырды, ал жер өзінің жемістерін өсірді.

¹⁹ Бауырластарым менің, егер кім де кім шындық жолынан адасып кеткен біреуді кері қайтарып тура жолға салатын болса,

²⁰ сол адам мынаны білетін болсын: -Кім де кім адасып кеткен күнәкәрді кері қайтарып, тура жолға салса, онда ол оның жанын өлімнен құтқарып алып, оның көптеген күнәларын жауып тастайды.