Жақыптың хаты 1 - Zhana Osiet

¹ Құдайдың әрі Иеміз Иса Мәсіхтің құлы Жақып: -Шашырап, тарап кеткен он екі руға қуаныш тілейді.

² Менің бауырластарым, әртүрлі азғырылуға түсіп қалған әрбір сәттеріңді, қуанышпен қабылдаңдар,

³ өйткені өздерің білесіңдер сендердің сенімдерің сыналған сәтте, одан төзімділік туындайды,

⁴ ал төзімділіктерің іс-әрекетке келгенде кемелді, жетілген болсын, сонда сендер еш мінсіз толық қалыптасып, толықтай кемелді боласыңдар.

⁵ Ал енді кейбіреулерге даналық жетіспей жатса, оны ол Құдайдан сұрасын, өйткені Ол сұрағанға еш жазғырмайақ береді, сондықтан оған да оп-оңай беріледі.

⁶ Бірақ сұраған кезде еш нәрсеге күмәнданбай (еш күмәнсіз) сеніммен сұрасын, өйткені күмән келтіретін адам -ол теңіз бетінде желдің ары-бері айдауымен пайда болған толқынға ұқсас болады,

⁷ міне, сондықтан сондай адам Иемізден бір нәрсе аламын деп ойламасын,

⁸ өйткені мұндай ер адам екі жүзді, сондықтан ол өзінің жүретін жолдарының бәрінде тұрақсыз болады.

⁹ Ал төменен жоғарыға көтерілген бауырымыз сол дәрежесіне мақтансын,

¹⁰ ал бай адам өзінің төмен түскен дәрежесіне мақтансын, өйткені сол нәрсе гүлдеп, өсетін шөпке ұқсас.

¹¹ Өйткені күн көтерілген кезде, шөп күннің ыстық табынан қурап, оның гүлі түсіп, оның әдемі бейнесі солып құриды, сол секілді бай адам да өзінің жолымен жүріп-ақ солып қалады.

¹² Ал кім азғырылуға берілмей, соған қарсы тұрса, сол адам бақытты, өйткені ол сынақта төзімді болды, сондықтан ол Иеміздің Өзін сүйетіндерге уәде еткен өмір тәжін алады.

¹³ Егер де біреу азғырылуға түсіп қалса, менің азғырылуым Құдайдан болып жатыр деп айтпасын, себебі Құдай зұлымдыққа бармайды, әрі Ол ешкімді де азғырмайды.

¹⁴ Керісінше, әркім өзінің құмарлығының жетегіне еріп, сол құмарлығы арқылы еліктіріушінің қармағына түседі,

¹⁵ сонда құмарлық тамырланып, күнә тудырады, ал істелген күнәдан - өлім туады.

¹⁶ Менің сүйікті бауырластарым, алданып қалып жүрмеңдер.

¹⁷ Себебі, әрбір сый да, әрбір толықтай берілетін сыйлар да жарықтарды жаратқан көктегі Әкеден келеді, себебі Оның көлеңкесінің өзі еш өзгеріске түспейді.

¹⁸ Ол бізді Өзінің жаратылысындағы ең алғашқы жемістерінің бірі болсын деп, Өз қалауына сай, бізді шынайы Өзінің сөзімен туғызып алды.

¹⁹ Менің сүйікті бауырларым, мынаны естеріңе сақтап алыңдар: әрбір адам естуге жылдам, сөйлуге шабан, ал ашуға баяу болсын,

²⁰ өйткені ашуға берілген адам, Құдайға ұнайтын әділ шешім шығара алмайды.

²¹ Сондықтан кез -келген лас, әрі зұлымдыққа толы нәрселерді ысырып тастаңдар да, жандарыңды құтқару үшін, жүректеріңе дән болып себіліп жатқан сөзді кішіпейілдікпен қабылдаңдар.

²² Сөзді тек тыңдап қана қоя салатын тыңдаушы емес, оның орнына сөзді орындайтын оның орындаушысы болыңдар.

²³ Өйткені егер де біреу сөздің орындаушысы емес тек оның тыңдаушысы болса, онда ол өз бейнесін, өз табиғатын тек айнадан көре алатын адамға ұқсас болады,

²⁴ өйткені ол өз бейнесін тек айнаның алдында тұрса ғана көре алады, ал былай шыққан кезде ол өзінің қандай болғанын сол сағатта-ақ ұмытып қалады.

²⁵ Ал енді кім өзін кемелділікпен, бостандыққа жетелейтін заңға ден қойып, соны сақтап, соны орындайтын болса, ол ұмытшақ тыңдаушы емес, керісінше ол соны іске асырушы болады, сондықтан ол әр істеген істерінде бақытты болады.

²⁶ Егер де біреу өзін Құдайшыл ретінде көрсетіп, ал өз тіліне ие бола алмаса онда ол өз жүрегін өзі алдап жүр, оның бұл әрекеті түкке тұрмайтын бос Құдайшылдық болып табылады.

²⁷ Ал Құдай мен Әкеге деген таза, да кіршіксіз Құдайшылдық ол: жәбір көрген жетімдер мен жесірлерге қамқор болу, ол осы әлеммен өзін кірлетпей, өз-өзін таза ұстау болып табылады.