Яһуданың хаты 1 - Zhana Osiet

¹ Иса Мәсіхтің құлы, әрі Жақыптың бауыры Яһуда, Құдай Әкенің сүйіктілеріне, яғни құтқарылу үшін Иса Мәсіх арқылы шақыруға ие болғандарға

² Мейірім мен бейбіт тыныштық тілеп, сол арқылы сендердің сүйіспеншіліктерің өсіп-өніп көбейе берсе екен деп тілейді.

³ Сүйікті бауырластар, мен қаншама рет сендерге бәрімізге ортақ құтқарылу туралы жазып жіберуге тырыстым, алайда қазір өздеріңе, яғни киелілерге бірақ рет берілген сенім үшін күресу аса маңызды екені туралы жазып отырмын, әрі сендерді соған шақырамын.

⁴ Өйткені біздің ортамызға жазбада жазылғандай, Құдайдың сотына лайықты кейбір адамдар кіріп алыпты. Бұлар -Құдайсыз жолмен жүрген адамдар, сондықтан олар өздерінің азғындыққа берілгендіктерін ақтау үшін, олар Құдайдың бізге берген рахымын да, біздің Жартушымыз әрі біздің Иеміз Иса Мәсіхті де мойындамай, Оны жоққа шығарып жүр.

⁵ Сендердің естеріңе мынаны сала кетейін, өздерің білесіңдер, бір кездері Иеміз Мысыр жерінен Исраил халқын құтқарып алып шыққан болатын, сол кезде Ол солардың арасындағы Өзіне сенбегендерін құртып, жойып жіберді.

⁶ Сонымен қатар Құдай өздеріне берілген билікті сақтап қалудың орнына, керісінше өздерінің тұрғылықты орындарын тастап кеткен, періштелерді де байлап-матап оларды қара түнектің қақпасына салып сақтап отыр, яғни олардың үкімін Ол Ұлы күн келген кезде шығарды.

⁷ Сонымен қатар Содоммен Ғамораменде және олардың жан-жағындағы қалаларда солар секілді азғындыққа түсіп, өзара бір-бірімен тәндік ләззатқа беріліп кеткен болатын, сол үшін Құдай оларды да жазалап, басқаларға үлгі болсын деп, оларды мәңгі оттың жалынымен өртеп жіберді.

⁸ Сол секілді бұл адамдар да өздері көрген түстері арқылы бос армандарға беріліп, өз денелеріне өздері кір жағып, ластап, Құдайдың билігін жоққа шығарып, Оның даңқына тіл тигізуде.

⁹ Кезінде Мұсаның денесіне байланысты Бас періште Михаил мен сайтанның арасында талас-тартыс сөз болған кездің өзінде, бас періште оған тіл тигізген жоқ, керісінше ол сайтанға тек «сенің жазаңды Құдайдың Өзі берсін» -деген болатын.

¹⁰ Ал бұлар болса көп нәрсеге тіл тигізіп, ластап жүргенін өздері де білмейді, өйткені олар көп жағдайда табиғатынан түйсіксіз болған аңдар секілді, тек жамандық жасауды ғана біледі, ақырында олар сол арқылы өздерінен өздері құртылып, жоқ болып кетеді.

¹¹ Өйткені олар Қабылдың жолымен жүріп, тек өз басының қамын ойлаған Балағам секілді арамдыққа беріліп кетті, әрі олар Корах секілді Құдайға қарсылық көрсетуде, сондықтан оларды қарғыс атады.

¹² Олар сендердің сүйіспеншіліктеріңе дақ түсіруде, олар қорқу дегенді білмейді, сондықтан олар сендердің қастарыңда тек ас ішу үшін, яғни өздерінің құлқындарының бағы үшін ғана жүреді. Олар сусыз жерде жел қайда айдаса, сол жаққа жүре беретін бұлт секілді, олар күзде не жапырағы, не жемісі жоқ, екі рет өлген, яғни тамырымен бірге шауып алып тастайтын ағашқа ұқсас,

¹³ әрі олар асау толқын секілді өздерінің ұятсыз іс-әркетін жағаға көбікпен шығарып тастап отырады, олар ғаламдық әлемде жоғалып кеткен жұлдызға ұқсайды, сондықтан олар қара түнекке сіңіп, сол түнекте мәңгі қалып қойяды.

¹⁴ Адам атаның жетінші ұрпағы Енох олар туралы мына пайғамбарлық сөзді айтып кеткен еді, онда: -Міне, Иеміз өзімен бірге он мың киелі періштелерін ертіп келді,

¹⁵ енді ол әділетсіз істер істеген әрбір адамға қарсы сот жүргізетін болады, сонда Ол өзінің әрбір әділетсіз істерімен Құдайды қорлағандардың бәрін әшкерелеп, Оған қарсы жаман сөз айтқан күнәһарлардың әрқайсысына олардың істеген істеріне сай үкім шығарады, - делінген.

¹⁶ Себебі бұл адамдар әрқашан да наразылық көрсетіп, күңкілдей береді, өйткені олар тек өздерінің қалауымен жүретін адамдар, сондықтан олардың аузынан тек өркөкіректікке тән сөздер шығады, олар өз пайдасы үшін екі жүзділікке дейін барады.

¹⁷ Сондықтан, сүйікті бауырластарым, өздерің біздің Иеміз Иса Мәсіхтің елшілерінің айтып кеткен мына сөздерін естеріңе түсіріңдерші,

¹⁸ өйткені олар бізге: соңғы уақытта балағат сөздер айтып, өзінің арам пиғылының жетегіне еретін адамдар пайда болады, - деп айтып кеткен болатын.

¹⁹ Себебі бұл адамдар өздерін ортадан оқшау ұстап, бөлектеніп, тек сезімге беріліп, тек сезімнің жетегімен жүреді, сондықтан бұларда рух жоқ.

²⁰ Сондықтан, сүйікті бауырластарым, сендер бір-біріңе ақыл айтып, біріңді-бірің нығайтып, сенімдеріңді таза ұстап, Киелі рухтың жетегімен мінәжат етіп,

²¹ Өзара бір-біріңе Құдайдың сүйіспеншілігінде болуды тілеп, біздің Иеміз Иса Мәсіхтің келуін, әрі Оның мейірімі арқылы берілетін мәңгілік өмірді күтіңдер.

²² Кейбір күмәні бар адамдарға мейірім танытып,

²³ ал кейбіреулерін құтқару үшін оттан суырып алатындай іс-әрекет істеңдер, ал кейбіреуіне көрсететін мейірімдеріңді байқап, айбайлап, жек көрмей істеңдер, өйткені олардың денесіндегі киімдеріне дейін күнәға батып кеткен.

²⁴ Сонымен сендерді сүрініп қалудан сақтайтын, Оның алдында тұрған кезде сендерді Өзінің даңқына, кіршіксіз тазалыққа, шаттыққа бөлейтін,

²⁵ -біздің жалғыз Құдайымыз, әрі құтқарушымыздың даңқы, құдіретті күші, билігі біздің Иеміз Иса Мәсіх арқылы ғасырдан-ғасырға жетіп, қазіргі уақытта да, болашақтағы барлық уақыттарда мадақтала берсін! Аумин!