Тимотейге 2 3 - Zhana Osiet

¹ Мынаны біліп ал: аса ауыр уақыттар соңғы күндері туындайды,

² өйткені адамдар тек өздерін ғана жақсы көретін болғандықтан, ақшақұмар, мақтаншақ, тәкаппар, тілдері ащы, ата-аналарына мойынұсынбайтын, алғыс айтуды білмейтін, зұлымдыққа жақын,

³ мейірімсіз, ымыраға келмейтін, өтірікші, ұстамсыз, дөрекі, жақсылықты сүймейтін,

⁴ сатқын, ұят дегенді білмейтін, өркөкірек, Құдайдан гөрі көбірек ләззат алуды жақсы көретін,

⁵ сырт бейнесінде өзін Құдайды қастерлеуші ретінде көрсете алатын, ал шындығында Оның күшін жоққа шығаратын болады, сондай адамдарға жақындамай олардан аулақ жүр.

⁶ Үй-үйді аралап, неше түрлі құмарлыққа беріліп күнәға батып жүрген кейбір әйелдерді алдап, арбап, адастырып жіберетіндер осындайлардан шығады,

⁷ өйткені олар әрқашан да оқып, үйреніп, тәлім алып жүрсе де, олар ешқашан шындыққа жеткен де емес, оны танып білген де емес.

⁸ Кезінде Янный пен Ямбри өздерінің жағымсыз қылықтарымен Мұсаға қалай қарсы тұрса, бұлар да дәл солай шындыққа қарсы тұрады, өйткені бұл адамдардың ақыл-ойлары шіріп кеткен, сол үшін олардың сенмідері әлсіз де жарамсыз.

⁹ Міне, сондықтан олар көп алға жылжый алмайды, өйткені олардың ақымақтықтары бәріне ашылып, аян болады, алдыңғыларымен де дәл солай болған.

¹⁰ Ал енді сен болсаң ылғи менің қасымда жүріп, менен тәлім алдың. Сен менің жүріс-тұрысымды, алға қойған мақсатымды, төзімділігімді, сүйіспеншілігімді, қайраттылығымды үлгі тұтып соңымнан еріп келесің.

¹¹ Антақия мен Қонияда әрі Лүстрада болған кезде, мен қудалаудың неше түрін көрдім, соның бәрінен мені құтқарып алған, менің Ием болатын.

¹² Өйткені Мәсіх Исаны құрметтеп, солай өмір сүргісі келетіндердің бәрі қудаланады,

¹³ ал енді зұлымдармен, алаяқ-айлакер адамдар жаманшылық жасаудан алға озып шыққанымен өзгені адастырамыз деп жүріп, өзідері адасып кетті.

¹⁴ Ал сен не үйреніп, нені қабылдасаң сонымен өмір сүр, саған ненің сеніп тапсырылғанын әрі кімнен тәлім алғаныңды да,

¹⁵ әрі жас кезіңнен бастап киелі жазбаны да жетік білесің, міне сол жазба сенің құтқарылуың тек Мәсіх Исаға сену арқылы болатынын саған даналықпен үйретеді.

¹⁶ Өйткені киелі жазбаның бәрі Құдайдың рухымен жазылған, сондықтан оның тәлім беріп, әшкерелеп, түзететіп, сөйтіп әділдікке тәрбиелеуші ретінде әкелетін пайдасы өте зор.

¹⁷ Сонда Құдайдың адамы барлық жағынан жетіліп, кез келген ізгі істі атқаруға дайын болады.