Тимотейге 1 3 - Zhana Osiet

¹ Егер де біреу *бақылап жүріп, бағатын бағушылыққа ұмтылатын болса, онда оның қалауы жақсы, әрі игі.

² Ал бақылап жүріп бағатын бағушы болу үшін, мінсіз болу қажет, ол бір әйелге күйеу болған, ойы зерек, әдепті, қонақжай, басқаларды үйретіп тәлім бере алатын қабілеті бар,

³ ішімдікке құмар емес, төбелеске жақын емес, керісінше ізгі ниетті, кең пейілді, не қазымыр, не ақша құмар емес,

⁴ өз үйін жақсы басқарып жүрген, бойында балаларын барлық жағынан бағынушылыққа, тәртіптілікке жетелей алатын қасиеттері болуы қажет.

⁵ Егер ол өз үйін қалай басқаруды білмесе, онда ол Құдайдың қауымына қалай қамқорлық көрсетеді?

⁶ Әрі өр көкіректеніп, сайтанның ықпалына түсіп қалмас үшін, бұл қызметке сенімге жақында келген адамдар тағайындалмайды.

⁷ Өйткені ол туралы сыртында жақсы куәлік айтылуы тиіс, ал осы нәрсе оның сыртынан жаман сөз айтылмау үшін, әрі оның сайтанның тұзағына түспеуі үшін пайдалы.

⁸ Сонымен қатар, қатардағы қызметкерлер де құрметке лайықты, екі сөзді емес, шарапқа әуестігі жоқ, тек қара басының қамын ойлайтын пайдакүнем емес, керісінше

⁹ ар-ұятын таза ұстайтын, әрі сенімнің құпиясын басқаларға ашып бера алатын жан болуы қажет.

¹⁰ Әрі олар ең алдымен сыналып сынақтан өтіп, мінсіз болды-ау деген кезде барып, қызметтеріне кірісуі тиіс.

¹¹ Олардың әйелдері де дәл осындай қасиетке ие болған, өсек айтпайтын, ойы зерек, барлық жағынан адал болу қажет.

¹² Қызметші ер азаматтар тек бір әйелдің күйеу болып, өз балалары мен өзінің үйіндегілерді басқара алатын жағдайда болуы қажет.

¹³ Себебі тек қызметтерін жақсы атқарып жүргендер ғана жақсы абыройға ие болады, әрі Мәсіх Исадағы сенімі нығайып батыл болады.

¹⁴ Мен мұны саған жақын арада өзіңе барып қалам ба деген үміттен жазып отырмын,

¹⁵ ал егер бара алмай кешігетін болсам, сен осылар арқылы Құдайдың үйінде өзіңді қалай ұстау керек екенін біліп ал, өйткені Ол қауым, яғни Ол тірі Құдайдың мекені, сондықтан тек шындық қана ол жерде діңгек пен тіреу болып тұруы қажет.

¹⁶ Мына бір ізгі қаситетте бір ұлы құпияның бар екенін бәрі мойындайды: -Ол анық денеде көрінді, Оның әділдігі Рухпен дәлелденді, Ол Өзін періштелерге көрсетті, Ол туралы халықтардың арасында уағыздалды, осы әлем Оған сенді, одан кейін Ол даңққа бөленіп көкке көтерілді.