Римдіктерге 9 - Zhana Osiet

¹ Мәсіхтің құлы ретінде айтқандарым өтірік емес, шындық, бұған менің ар-ұжданым мен Киелі Рух куә.

² Менің бір үлкен қасіретім бар, содан жүрегім үздіксіз ауырып, сыздайды.

³ Өйткені мен өзімнің тәни бауырлас туыстарым үшін мінәжат етіп жүрсем де, олар үшін Мәсіхтен бас тартуға да дайынмын.

⁴ Олар-исраилдіктер, өйткені Құдайдың оларды балалары ретінде қабылдауы да, Оның даңқы мен өсиеті де, берілген Заң да, қызмет те, Құдайдың уәдесі де,

⁵ олардың өздері де, әкелері де және Мәсіх те соларға тән. Сондықтан бәрін жаратқан Құдай ғасырдан ғасырға жарылқана берсін! Аумин!

⁶ Құдайдың сөзі өз күшін ешқашан жоғалтқан жоқ. Исраилден шыққандардың бәрі бірдей исраилдік болып қалмайды ғой.

⁷ Ыбырайымнан тараған ұрпақтардың бәрі де оның балалары емес қой, керісінше, оған: «Сенің ұрпағың Ысқақтан тарайды», - деп нақты жазылған болатын.

⁸ Сондықтан бұлар тәннен туған балалар емес, енді Құдайдың балалары болып саналады, себебі тек уәде бойынша дүниеге келген балалар ғана ұрпақ болып саналады.

⁹ Уәде мынадай сөзбен берілген: «Мен белгілі уақытта келемін, сол кезде Сара ұлды болады».

¹⁰ Тек бұл ғана емес, сонымен қатар, біздің бабамыз Жақыппен некеде болған Рабиғамен де солай болды.

¹¹ Ол әлі де босанбай тұрып және олар әлі де жақсылық пен жамандықты жасамай тұрып, Құдай алдын ала таңдау жасады,

¹² Оның таңдауы олардың іс-әрекетіне байланысты емес, сондықтан Рабиғаға: «Үлкені кішісіне қызмет ететін болады», - деп Шақырушының Өзі айтқан болатын.

¹³ Бұл жайында Жазбада былай жазылған: «Мен Жақыпты жақсы көрдім, Есауды жеккөрдім».

¹⁴ Сонымен, бұған не дейміз? Сонда Құдайдың әділетсіз болғаны ма? Жоқ!

¹⁵ Құдай Мұсаға былай деген: «Менің кімге мейірімім түссе, соған мейірімді боламын, кімді есіркегім келсе, соны есіркейтін боламын».

¹⁶ Демек, Құдайдың мейіріміне ие болу аламның қалауына немесе талпынысына байланысты емес, тек Құдайдың мейіріміне байланысты.

¹⁷ Киелі Жазбада Ол перғауынға: «Мен сені Өзім қолдап, көтермелеп отырдым және Менің атымның барлық жерге жайылғанын қалап, Мен Өз күшімді тек саған ғана көрсеттім», - деген болатын.

¹⁸ Сондықтан Ол кімді қаласа, соған мейірімін көрсетеді, кімді қаламаса, соны қасарыстырып қояды.

¹⁹ Алайда біреу маған: «Құдай онда не үшін бізді айыптайды? Кім Оның еркіне қарсы шыға алады?» -дейтін шығар.

²⁰ Ей, адам баласы, Құдайға қарсы шығатындай сен кімсің соншама? Балшық өз илеушісіне: «Неге мені осылай істедің?» - деп айта ала ма?

²¹ Әлде құмырашының сол балшықтан құрметке лайықты бағалы, ал басқасынан құрметке лайықсыз ыдыс жасап шығаруына қақысы жоқ па?

²² Егер де Құдайдың қалауы Өзінің қаһарын көрсету болса, Оның сол қаһарынан құрып кетуге тиіс адамға үлкен шыдамдылық танытып,

²³ Оның алдын ала дайындап қойған даңқына сол адамдардың да ие болатынын көріп-білсін деп, Өзінің даңқының байлығынан оларға мейірімін төкпек,

²⁴ сондықтан да ол яһудейлерің арасынан тек бізді ғана шақырып қоймай, өзге ұлттың өкілдерін де Өзіне шақырып алды емес пе?

²⁵ Осы туралы Ошия пайғамбар арқылы: «Халқым еместі халқым, ал сүймегенімді сүйіктім деп атайтын боламын»

²⁶ және «Сендер Менің халқым емессіңдер деп айтылған жерде енді тірі Құдайдың балалары деп аталатын боласыңдар», - деп айтылған.

²⁷ Ишая пайғамбар Исраил туралы дауыстап былай деген: «Егер де Исраил ұлдарының саны теңіз жағасындағы құмнан көп болса да, оның біразы ғана құтқарылады.

²⁸ Себебі Жаратқан Ие жер бетіндегі ісін Өз сөзімен аяқтайды әрі кесіп-пішеді».

²⁹ Ишая пайғамбар алдын ала былай деп те айтып кеткен: «Егер де Иеміз Саваоф бізге ұрпақ қалдырмағанда, онда біз Содом секілді құрып, Ғомора секілді жоғалып кетер едік».

³⁰ Сонымен, не айтамыз? Сөйтіп, әділдіктің жолына ұмтылмаған халық сенім арқылы келетін әділдікке ие болды.

³¹ Ал заңды орындау арқылы әділдікке ұмтылған Исраил сол күйі әділдікке қол жеткізе алмады.

³² Не үшін? Өйткені сенімге емес, істеген істеріне сүйенді. Сөйтіп, олар «сүріндіретін тасқа» сүрініп құлады.

³³ Бұл жайында Жазбадағы: «Міне, Мен Сионға сүріндіріп құлататын Тасты қойдым, кім Оған сенсе, сол ұятқа қалмайды», - деп жазылғанмен сәйкес келді.