Римдіктерге 7 - Zhana Osiet

¹ Бауырларым, заңды білетіндер ретінде сендерге айтарым: адам қанша өмір сүретін болса, заң соншалықты оның үстінен билік жүргізетінін өздерің білесіңдер.

² Мысалы, тұрмысқа шыққан әйел күйеуінің тірі кезінде (неке туралы) заңмен күйеуіне байлаулы болады. Егер күйеуі қайтыс болса, онда әйел заң бойынша бостандық алады.

³ Сонымен қатар, егер әйел күйеуі тірі кезінде басқа бір еркекке күйеуге шықса, онда ол неке адалдығын бұзушы болып есептеледі, егер күйеуі қайтыс болса, заң бойынша оның басы бос болады, басқа біреуге әйел болса, онда ол неке адалдығын бұзған болып саналмайды.

⁴ Сондықтан бауырларым, сендер де Иса Мәсіхтің тәндік өлімі арқылы заң үшін өлгендер қатарына жатасыңдар, сөйтіп, Құдайға игілікті жеміс әкелу үшін, өлімнен қайта тірілген басқа Біреудің меншігіне айналдыңдар.

⁵ Өйткені сендер ескі болмыспен жүрген кездеріңде өлім әкелетін күнәнің құмарлықтары өз жемістерін әкелу үшін, біздің дене мүшелерімізде тек заң арқылы жұмыс істеп келді.

⁶ Ал қазір ескі заң әріптерінің нұсқауы бойынша емес, Киелі Рухтың жаңартуымен қызмет ету үшін, бізді ұстап тұрған сол заңның құрсауынан босап шықтық.

⁷ Сонымен, бұл нені білдіреді? Заңды ұстану күнә ма? Әрине, жоқ. Егер де мен заңды білмесем, онда күнәнің не екенін де білмес едім. Егер де сол заң: «Құмарлыққа берілме», -деп айтпаса, онда мен сол құмарлықтың не екенін білмес едім.

⁸ Күнә осы мүмкіндікті пайдаланып, өсиет арқылы мендегі құмарлықтың неше түрін оятты, алайда заң жоқ жерде күнә өлі болады.

⁹ Мен бір кездері заңды білмей өмір сүрдім, ал өсиет келген кезде мендегі күнә тірілді де,

¹⁰ мен өлдім, сөйтіп, өмір сүру үшін берілген өсиеттен мен өлім таптым.

¹¹ Себебі күнә сол өсиетті пайдаланып, алдап, мені рухани өлімге әкелді.

¹² Дегенмен, заң да киелі, өсиет те киелі, әділ және ізгі.

¹³ Сонымен, өлім маған жақсылық әкелді ме? Жоқ, мүлдем олай емес! Керісінше, мұны күнә істеді, яғни, күнә жақсылық арқылы маған өлім әкелді. Осылай күнәнің қаншалықты қорқынышты екенін білдім. Сөйтіп, күнә өсиетті пайдаланып, күнә арқылы мені күнәкар етті.

¹⁴ Сондықтан біз заң рухани нәрсе екенін білеміз, ал мен тәнімді күнәнің құлдығына беріп қойдым.

¹⁵ Мен не істеп жүргенімді білмеймін, өйткені өзім қалайтын істі емес, керісінше, нені жеккөрсем, соны істеп жүрмін.

¹⁶ Мен өзім қаламайтын істің жетегінде жүргендіктен, заңның жақсы екенін білемін.

¹⁷ Қазірдің өзінде мұны істеп жүрген мен емес, менің бойымнан орын алған күнә істеп жатыр.

¹⁸ Өйткені менің бойымда, менің күнәкар болмысымда, жақсылықтың орын алмағанын білемін, себебі жақсылық жасауға деген ниетім болса да, сол жақсылықты жасай алмаймын,

¹⁹ сондықтан қалаған жақсылықты істегім келсе де, оны істей алмаймын, керісінше, қаламайтын жамандықты жасап жүрмін.

²⁰ Егер де мен қаламаған нәрсені істеп жүрсем, оны істеген мен емеспін, оны істеп жүрген менің бойымнан орын алған сол күнә болатын.

²¹ Сонымен, менің байқағаным мынау: заңмен жүріп, жақсылық жасағым келсе де, жамандық қасымнан табылады (жамандық мені менші ктеп алды, мен оның меншігіне айналдым).

²² Рухымда адамның жан дүниесіне бекітіп берген Құдайдың заңынан рахат табамын,

²³ алайда менің дене мүшелеріме, ой-санама қарсы күресетін басқа бір заңның бар екенін білдім, сол мені тұтқындап, өзімді де, дене мүшелерімді де күнәнің заңына бағындырды.

²⁴ Қандай бақытсыз адам едім! Осы бір өлім әкелетін тәнімнен кім мені құтқара алады?

²⁵ Барлық мадақ Иеміз Иса Мәсіх арқылы Құдайға арналсын! Сонымен, мен тек өз ақыл-ойыммен ғана Құдайға қызмет етсем, ал тәніммен күнәнің заңына қызмет етеді екенмін.