Римдіктерге 5 - Zhana Osiet

¹ Сонымен, біз сеніммен ақталғандықтан, Иеміз Иса Мәсіх арқылы Құдайдың тыныштығына ие болдық.

² Ол арқылы сеніммен осы өзімізде бар рақымдылыққа қол жеткізе алатын мүмкіндікке ие болдық, сөйтіп, Құдайдың даңқына үміт артамыз, соны мақтан тұтамыз.

³ Тек бұған ғана емес, сонымен қатар, азапқа толы сәттерге де қуанамыз, себебі азаптан төзімділік туатынын білеміз,

⁴ ал төзімділіктен сенімділік туады, сенімділіктен үміт пайда болады.

⁵ Үміт ұятқа қалдырмайды, өйткені Құдай бізге деген Өзінің сүйіспеншілігін Киелі Рух арқылы жүрегімізге дарытты.

⁶ Біздер әлі де дәрменсіз болған кезімізде, белгіленген уақыт жетіп, Мәсіх біздер үшін, яғни, әділетсіздер үшін өлді.

⁷ Қалай десек те, бірлі-жарым адамның өз өмірін әділ жан үшін қиюы екіталай, дегенмен, мүмкін, бірен-саран адам мейірімді адам үшін өлуге шешім қабылдайтын шығар.

⁸ Біз әлі де күнәкар кезімізде Мәсіх біздер үшін өлді, Құдай сонда Өзінің сүйіспеншілігін бізге осылай көрсетті.

⁹ Сондықтан көпшілігіміз Оның баға жетпес қанымен ақталдық, бұдан былай Ол арқылы Құдайдың қаһарынан құтқарыламыз!

¹⁰ Егер бұрын біздер Құдайға жау болған болсақ, енді Оның Ұлының өлімі арқылы Онымен татуластық, енді бұдан былай Оның өмірі арқылы құтқарылатын боламыз!

¹¹ Тек бұл ғана емес, сонымен қатар, Құдайға деген қуанышымызды Иса Мәсіх арқылы жеткізе аламыз, себебі қазіргі осы құтқарылуды біз Ол арқылы алдық!

¹² Бір адам арқылы осы әлемге күнә кірді, күнә арқылы өлім келді, осылайша өлім бүкіл адамзатқа тарады, себебі барлығы күнә жасады.

¹³ Заң берілмей тұрған кезге дейін, күнә осы әлемде болды, заң болмаған жерде күнә бар деп есептелмейді.

¹⁴ Алайда Адам атаның кезінен бастап Мұсаға дейін, Құдайдың тыйым салғанын бұзбаған, Ада ата сияқты күнә жасамағандарға да өлім үстемдігін жүргізді.

¹⁵ Бірақ рақымдылық (Адам атаның) қылмыстық ісі секілді емес, сый ретінде берілді. Егер де біреудің істеген қылмысына бола, көптеген адам өлім құшқан болса, ал Құдайдың рақымы және бір Адамның, Иса Мәсіхтің, рақымдылық сыйы бұдан былай көпшілікке молынан берілетін болады.

¹⁶ Бұл сыйдың беретінін бір адамның жасаған күнәсінің нәтижесімен салыстыруға келмейді. Сот бір қылмыс үшін соттайды, ал рақымдылық сыйы көптеген қылмыстардан ақталу әкелді.

¹⁷ Егер де біреудің жасаған қылмысы арқылы өлім билігін жүргізетін болса, бір Адам, яғни, Иса Мәсіх арқылы кім рақымдылық байлығы мен әділдік сыйын қабылдаса, сол өмірде билік ететін болады.

¹⁸ Сонымен, бір адам арқылы бүкіл адамзатқа күнә келген болса, бір Адамның дұрыс әрекеті бәріне өмір беретін ақталу әкелді.

¹⁹ Сонымен қатар, бір адамның мойынсынбауы көпшілікті күнәкар еткен болса, бір Адамның мойынсынуынан көптеген адам әділ болып саналады.

²⁰ Ал кейіннен кірген Заң әділетсіздікті көбейту үшін берілді, сөйтіп, қай жерде күнә көбейсе, сол жерде рақымдылық молынан төгіліп отырды,

²¹ сондай-ақ күнә билігін жүргізіп, өлімге әкелген болса, дәл солай рақымдылық та әділдікпен билік жүргізіп, біздің Иеміз Иса Мәсіх арқылы мәңгілік өмірге әкеледі.