Римдіктерге 4 - Zhana Osiet

¹ Сонымен, Ыбырайым туралы не айтуға болады?

² Егер де Ыбырайым істеген істері бойынша ақталған болса, онда оның мақтануына болар еді, бірақ Құдайдың алдында емес.

³ Осы жөнінде Жазбада не айтылған? «Ыбырайым Құдайға сенді, сондықтан ол ақталған болып есептеледі».

⁴ Еңбек етіп жүргеннің еңбекақысы ризашылық білдіру үшін емес, керісінше, тиісті төлем ретінде берілуі керек.

⁵ Сондықтан да адам жасаған іс-әрекетіне емес, тек сеніммен ғана ақталатынына сенетін болса, сонда ол сол сеніммен ақталған болып саналады.

⁶ Осы туралы Дәуіттің өзі Құдай алдында іс-әрекетіне сүйенбей ақталған адамның бақытты екені туралы:

⁷ «Заңсыз іс-әрекеттері кешіріліп, күнәлары өтелген жандар бақытты,

⁸ Иеміз күнәсіз деп есептейтін жан бақытты», -деген болатын.

⁹ Сонымен, бұл бақыт сүндеттелген немесе сүндеттелмеген адамның қайсысына арналған? Ал біз Ыбырайымға келер болсақ, оның сенім арқылы ақталғанын айта аламыз.

¹⁰ Қысқасы, ол қай кезде ақталды? Сүндеттелуге дейін бе әлде кейін бе? Сүндеттелген кезде емес, сүндеттелмей тұрып ақталды!

¹¹ Осы сүндеттелудің белгісін сеніммен ақталудың мөрі ретінде қабылдап, осы арқылы барлық сүндеттелмегендердің әкесі атанды, бұл оларды ақтап алу үшін істеген оның игі әрекеті болды.

¹² Ол тек қана сүндеттелгендердің ғана емес, сонымен қатар, біздің Ыбырайым атамыздың жолымен сүндеттелмейақ жүргісі келетіндердің де әкесі атанды.

¹³ Ыбырайымға және оның ұрпағына осы әлемнің мұрагері атану үшін берілетін уәде заң арқылы емес, сеніммен ақталу арқылы берілуі қажет болған.

¹⁴ Егер де олар сол заң бойынша мұрагерлікке ие болатын болса, онда сенім түкке тұрғысыз болып, уәденің күші жойылар еді.

¹⁵ Заң Құдайдың қаһарын білдіреді, ал заң жоқ жерде қылмыс та болмайды.

¹⁶ Сондықтан бүкіл ұрпақтарға сеніммен берілетін уәденің заң бойынша емес, керісінше, оның рақымдылыққа сай берік болғанын қалағандықтан, Ыбырайым бәріміздің әкеміз атанды.

¹⁷ Сөйтіп бұл: «Мен өлгендерді тірілтіп, жоқтан бар жасай алатын Құдайға сеніп жүрген көптеген халықтардың әкесі етіп, сені тағайындап қойдым», -деп Жазбада жазылғанның дәлелі болды.

¹⁸ «Олар сенің ұрпағын болады, сен көптеген халықтың әкесі боласың», -деп айтылғанға ол сеніп, үмітіне үміт қосты.

¹⁹ Ыбырайым өзінің денесінің қуаты кеміп, жасы жүзге таяп қалғанын, Сараның да құрсағының бала көтеруге қабілетсіз екеніне мән бермей,

²⁰ Құдайдың уәдесіне күмән келтірмеді, ол сенімінде нық тұрып, Құдайдың атын мадақтады,

²¹ Құдайдың берген уәдесін орындауға бар күшін салды.

²² Сондықтан «оны ақталды деп есептеді».

²³ Осы ақталу оның бір өзіне ғана тиесілі деп жазылмаған,

²⁴ бұл ақталу біздерге де, яғни, Иеміз Исаны өлімнен қайта тірілтіп алған Құдайға сенетіндерге де тиесілі.

²⁵ Өйткені біздің күнәларымыз үшін Оны өлімге қиды, бізді ақтап алу үшін, Оны қайта тірілтті.