Римдіктерге 3 - Zhana Osiet

¹ Яһудей болудың артықшылығы неде? Сүндеттелудің пайдасы қандай?

² Қай жағынан алсақ та, ерекшелігі өте көп. Ең алдымен, Құдайдың сөзі оларға сеніп тапсырылды.

³ Егер кейбіреулері сенбей жатса, онда не болмақ? Олардың сол сенімсіздігі Құдайға деген сенімді жоғалта ала ма?

⁴ Жоқ, мүлдем олай емес! Оның орнына тек Құдайдың шындығы бола берсін. Тегінде, адамның бәрі өтірікші, ал Жазбада былай деп жазылған: «Сенің сөздерің әділетті болғандықтан, Өзіңмен соттасқандарды жеңіп шығасың».

⁵ Егер де біздің әділетсіздігіміз Құдайдың әділдігінің айқын екенін көрсетіп жатса, біз бұған не айта аламыз? Сонда Құдайдың қаһарының әділетсіз болғаны ма? Мен мұны адамдық оймен айттым.

⁶ Әрине, мүлдем олай емес. Солай болса, Құдай осы әлемді қалай соттамақ?

⁷ Егер де Құдайдың шындығы менің өтірігімнен асып түсіп, Оның даңқын арттырып жатса, онда не үшін мен осы күнге дейін күнәкар ретінде сотталудамын?

⁸ Сондықтан кейбіреу айтып жүргендей жаман атқа қалмас үшін, жақсылық келсін деп, жамандық жасай берейік пе? Осылай айтқандарға соттың үкімі әділетті болады.

⁹ Сонымен, не болды? Артықшылығымыз бар ма? Ешқандай да, біз ең алдымен яһудейлердің және өзге ұлт өкілдерінің бәріне де айып тағып, олардың күнәнің астында жүргенін көрсеттік.

¹⁰ Сондықтан Жазбада: «Бірде-бір әділетті адам жоқ,

¹¹ ешкім түсінбейді, Құдайды іздейтін де ешкім жоқ», -деп жазылған.

¹² «Бәрі бағыттарын бұзып, (Құдайдан беттерін бұрып, адасып) бірден жарамсыз болып қалды, сондықтан жақсылық жасаушы болған да емес, әлі оны ешкім де жасаған емес».

¹³ «Олардың көмейі ашық көр сияқты, тілдерімен арбап -алдайды, еріндері жыланның уына толы»,

¹⁴ «Ауыздары қарғыс пен ащы шерге толып тұр»,

¹⁵ «Қан төгу керек болса, олардың аяқтары жылдам-жылдам басады,

¹⁶ сөйтіп, олардың жүрген жолы-қирату мен бақытсыздық,

¹⁷ бейбітшіліктің жолын тану дегенді олар білмейді».

¹⁸ «Сондықтан оларда Құдайдан қорқу деген болған емес».

¹⁹ Ал айтылған заңға келетін болсақ, сол заң Құдай алдында бүкіл әлемнің күнәкар екені жайында айтады.

²⁰ Себебі заңның істері бойынша ешқандай пенде Оның алдында ақталмайды, керісінше, заң арқылы тек күнәні сезіне алады.

²¹ Дегенмен, қазіргі кезде Құдайдың ақтау жолы заңнан бөлек ашылды, себебі бұл туралы сол Таурат заңы мен пайғамбарлардың берген куәлігінде де айтылған.

²² Енді Құдай барлық сенушілерді тек Иса Мәсіхке сену арқылы ғана ақтап алады, бөліп-жару деген болмайды,

²³ себебі бәрі күнә жасағандықтан, Құдайдың даңқынан айырылып қалды,

²⁴ сол себептен ендігі ақталатындар Иса Мәсіхтің рақымы арқылы тегін алатын болады.

²⁵ Сөйтіп, Құдай Өзінің мейірімді екенін көрсету үшін, Исаның төгілген қанына сену арқылы бұрынғы істеген күнәлардың кешірілетінін және осы арқылы Өзінің әділетті екенін дәлелдеп берді.

²⁶ Сондықтан Құдай қазіргі уақытта да Өзінің әділетті екенін көрсету үшін, шыдамдылығының дәлелі ретінде Исаға сенген адамды ақтап алмақ.

²⁷ Ал енді біздің мақтанған нәрсеміз қайда кетті? Ол жойылды. Қандай заң арқылы? Іспен бе? Жоқ, сенімнің заңы арқылы.

²⁸ Сондықтан біз заңдағы іспен емес, адамдар тек сеніммен ақталады деп айтамыз.

²⁹ Сонда Құдай тек яһудейлердің ғана Құдайы болғаны ма? Сонда Ол басқа ұлттардың Құдайы емес пе? Әрине, Ол-басқа ұлттардың да Құдайы,

³⁰ Құдай біреу болғандықтан, Ол сүндеттелгендерді де, сүндеттелмегендерді де сенім арқылы ақтап алады.

³¹ Сонымен, сенім арқылы заңды жойып жібердік пе? Жоқ, олай емес, керісінше, біз заңды нығайтамыз.