Римдіктерге 15 - Zhana Osiet

¹ Сенімде мықты біздер өзіміздің бас пайдамызды ойламай, әлсіздердің қателігіне шыдамды болайық.

² Сондықтан біздің әрқайсысымыз жақынымыздың жақсы іске икемді болып, қалыптасуы (рухани өсуі) үшін, қамқорлық танытуымыз қажет.

³ Себебі Мәсіх Өз-Өзіне жағуды көздеген жоқ, Жазбада: «Сені қорлап сөйлегендердің сөзі Маған тиіп жатыр», -деп қалай жазылса, Онымен дәл солай болды.

⁴ Өйткені ертеде Жазбада жазылғандардың барлығы бізді тәрбиелеу үшін жазылған, сол себепті біз Жазбадан алған табандылық пен жұбаныш арқылы үмітке ие боламыз.

⁵ Сондықтан сендер бір-бірің туралы ойлағанда, табандылық пен жұбаныштың Құдайы сендерді Иса Мәсіхтің ойымен жетелесін,

⁶ сөйтіп, бәрің бірдей, бірауыздан Құдайды және Иеміз Иса Мәсіхтің Әкесін мадақтаңдар.

⁷ Мәсіх сендерді қалай қабылдаса, сендер де бір-біріңді Құдайдың аты мадақталуы үшін, солай қабылдаңдар.

⁸ Менің сіздерге айтарым: Мәсіх Өз қызметін сүндеттелгендер үшін атқарған кезде, оны Құдайдың адалдығын көрсету үшін істеді, сөйтіп, ата-бабаларымызға берілген уәдені нығайтып бекітті,

⁹ рақымдылық өзге ұлт өкілдеріне Құдайды мадақтау үшін берілді. «Осы ісің үшін, өзге ұлттардың арасында да Сенің сүйіспеншілігіңді мойындап, Сенің атыңды жырмен мадақтаймын», -деп Жазбада қалай жазылса, солай болды.

¹⁰ Сонымен қатар, тағы да былай деп жазылған: «Өзге ұлттың өкілдері, Оның халқымен бірге шаттанып қуаныңдар!»

¹¹ Тағы да: «Барлық ұлттар, Иемізді мадақтаңдар! Барлық халықтар, Оны мадақтаңдар!» - деп жазылған.

¹² Сол сияқты Ишая пайғамбар былай деді: «Тамыр Есей әулетінен болады, Сол халықты көтеріп, басқаратын болады, сонда өзге ұлттың өкілдері де үміттерін Оған артатын болады».

¹³ Сондықтан барлық үміттің Құдайы сендерді әр түрлі қуаныштарға кенелте берсін, осылай үміттерің Киелі Рухтың күшімен молая берсін.

¹⁴ Бауырластар, сендер жайында ойлаған кезде, өздерің де жақсылық жасауға толықтай дайынсыңдар, солай істеуге білімдерің де, бір-біріңе ақыл айтуға қабілеттерің де жететініне мен нық сенімдімін.

¹⁵ Сонымен қатар, Құдайдың маған берген рақымдылығын сендердің естеріңе салу үшін, хаттың кейбір бөліктерін сендерге батылдықпен жаздым.

¹⁶ Өйткені мен Құдайдың Ізгі хабарын басқа ұлттарға да жеткізіп, сол ұлттардың сый-тартуларын ұнамды және Киелі Рух арқылы таза болуын қадағалап жүретін Иса Мәсіхтің қызметкері болдым.

¹⁷ Сондықтан мен Иса Мәсіхтегі бар мақтанышымды Құдайға осылай жеткіземін.

¹⁸ Өйткені Мәсіх өзге ұлттардың да Құдайға мойынсыну үшін, Ол мен арқылы сөзбен де, іспен де жасаған істерін айтуға батылым жетеді, өйткені бұл

¹⁹ белгілі күшпен әрі кереметпен, Құдай Руқының күшімен болды. Сондықтан мен Ерусәлімнен бастап, Иллирикке дейін Мәсіхтің Ізгі хабарын таратумен болдым.

²⁰ Мен өз құрылысымды басқа біреудің салып қойған іргетасының үстіне салмау үшін, Мәсіхті білмейтін жерде, яғни,

²¹ Жазбаға сай: «Ол туралы әлі естімегендер Оны көрсін деп, Оны естімегендер ұғынсын», - деп баруға тырыстым.

²² Менің сендер жаққа баруыма көп нәрселер кедергі келтірді.

²³ Қазір осы аймақтарда менің орным болмаса да, өздеріңе барып қайтуды көп жылдардан бері аңсап жүрмін,

²⁴ Испанияға сапармен өтіп бара жатып, өздеріңді бір көруге үміттеніп жүрмін. Аз да болса өздеріңмен бірге болып, рахаттанып қалармын. Сонда сендер де мені сол жаққа шығарып саларсыңдар.

²⁵ Ал қазір киелі болып жүргендерге қызмет ету үшін, Ерусәлімге кетіп барамын.

²⁶ Өйткені Македония мен Ахаялықтар ортақтасып, Ерусәлімдегі кедейшіліктен көз ашпай жүрген кейбір киелі бауырларымызға көмектесіп, игі іс жасасақ деп шешті.

²⁷ Олар осы игілікті істі өздері оларға қарыздар болғандықтан істеп жатыр. Өйткені олар өзге ұлттың өкілдері болса да, олармен рухани жағынан бірігіп кетті, сондықтан олар тән жағынан да оларды қолдап, қызмет етуге міндетті.

²⁸ Сонымен, осы істі аяқтап болған соң, олардың бұл жемісіне мөр басып бекітіп, сендер арқылы Испанияға бармақпын,

²⁹ өздеріңе барғанда, Мәсіхтің батасын сендерге толық алып келмекпін.

³⁰ Бауырластар, біздің Иеміз Иса Мәсіхтің актымен және Рухтың бізге деген сүйіспеншілігімен менімен бірге күресіп, мен үшін Құдайға мінәжат етулеріңді өтініп сұраймын.

³¹ Сонда мен Яһудеяда мойынсынбай жүргендерден азат боламын, сөйтіп, менің Ерусәдімдегі жасайтын қызметім оларға жағымды да әрі киелі болады,

³² Құдайдың еркі бойынша өздеріңе қуанышпен барып, сендермен бірге тыныштыққа ие боламын.

³³ Сол тыныштықтың Құдайы сендермен де, барлығымен де бірге болсын! Аумин!