Римдіктерге 11 - Zhana Osiet

¹ Сол себепті сұрайын дегенім: «Құдай сонда Өзінің халқынан бас тартты ма?» Әрине, олай емес! Мен өзім де-исраилдікпін және Ыбырайымның ұрпағы Бениямин руынанмын.

² Құдай Өзінің халқымен не болатынын алдын ала білсе де, Ол олардан бас тартқан жоқ. Әлде сендер Илияс пайғамбар арқылы Жазбада не жазылғанын білмейсіңдер ме? Ол Құдайдың алдында исраилдіктерге қарсы шағымданып былай деген болатын:

³ «Олар Сенің пайғамбарларыңды өлтірді, Сенің құрбандық орындарыңды талқандады, тек мен ғана жалғыз өзім қалдым, енді Олар менің де жанымды алмақшы болып жүр», - деді.

⁴ Бірақ Құдай оған не деп жауап қайтарды? «Мен жеке Өзіме Бағалдың алдында тізелерін бүкпеген жеті мың ер азаматты қалдырып қойдым», - деді.

⁵ Қазіргі кезде де дәл сондай Құдайдың рақымы арқылы таңдалып қойылғандардың біразы табылады,

⁶ бірақ олар іспен емес, тек рақымдылықпен таңдалғандар, олай болмаса онда рақымдылық болудан қалар еді.

⁷ Сонымен, не болды? Исраил өзі іздеген нәрсесіне соншама тырысқанмен, жете алмады, тек таңдалғандар ғана соған жетті, қалғандары тастай қатып, қасарысып қалды.

⁸ «Құдай оларға мелшиген рухты беріп қойды, сондықтан осы күнге дейін олардың көздері не көрмейді, құлақтары естімейді», -деп Жазбада қалай жазылған болса, солай болды.

⁹ Дәуіт: «Олардың мерекелік дастарқаны өздеріне тұзақ әрі бөгет болсын, сүрініп жазасын тартсын.

¹⁰ Олардың көздерін қараңғылық басып, көрмейтін болсын, белдері әрқашан бүгулі болсын», -деген болатын.

¹¹ Сонда: «Олар сүрінбей жатып құлады ма?» -деп сұрағым келеді. Әрине, жоқ! Бірақ олардың сүрініп құлауы исраилдіктердің өздерінің қызғанышын ояту үшін, басқа ұлт өкілдеріне құтқарылу әкелді.

¹² Егер де олардың құлауы әлемнің байлығына, ал олардың құлдырауы өзге ұлт өкілдерінің байлығына айналса, олардың (Құдайға) толық бет бұруы қаншама байлық әкелер еді!?

¹³ Өзге ұлттың өкілдері, мұны сендерге айтып тұрмын. Мен өзім өзге ұлт өкілдеріне жіберілген елші ретінде осы қызметімді соншама мақтан тұтамын,

¹⁴ себебі өз тәнімдегі қызғанышты осылай оятып, менің халқымның біразын құтқарып қалсам деймін.

¹⁵ Егер де Құдай олардан бас тарту арқылы осы әлемге татулық әкелсе, оларды қайтарып алуы өлім емес, өмір болмай ма?

¹⁶ Егер де алғашқы нан киелі болса, онда оның қамыры да киелі болмай ма? Егер де оның тамыры киелі болса, онда оның бұтақтары да киелі болады.

¹⁷ Егер де олардың кейбір бұтақтарын сындырып алып тастап, оның орнына мына жабайы зәйтүн ағашы атанған сені оларға әкеліп телитін болса, онда сен сол нәрлі тамырдың біріне айналасың,

¹⁸ сондықтан асқақтап, сол бұтақтарды менсінбей жүрме. Егер асқақтап кетсең, есіңде болсын, тамырды ұстап тұрған сен емессің, керісінше, сол тамыр сені көтеріп, ұстап тұр.

¹⁹ Мүмкін: «Мені телу үшін, бұтақтарын сындырып алып тастаған», - деп айтарсың.

²⁰ Жақсы, солай-ақ болсын. Олардың сенімсіздігіне бола, оларды сындырып, алып тастаған болатын, ал сен сол жерде сеніміңе бола тұрсың. Сондықтан мақтана берме, одан да қорыққаның дұрыс.

²¹ Өйткені табиғи бұтақтарды аямаған Құдай сені қалай аяйды?

²² Сондықтан Құдайдың мейірімділігін де, қаталдығын да көріп-біліп ал, өйткені Оның қаталдығы үзіліп, құлап түскендерге бағытталған. Егер сен мейірімділіктің аясында қалатын болсаң, онда Құдай да саған мейірімін төгеді, олай істемесең, Ол сені де кесіп алып тастайды.

²³ Ал егер де олар (исраилдіктер) сол сенімсіздіктерінен бас тартатын болса, онда олар қайтадан телінеді, өйткені оларды қайтадан телуге Құдайдың күші молынан жетеді.

²⁴ Егер сен өз табиғатыңа сай жабайы зәйтүн ағашынан кесіп алынған болсаң, енді соған қарамастан, керісінше, сен (мәдени), табиғаты өте жақсы зәйтүн ағашына теліндің, олардың да өзінің табиғи зәйтүн ағашына қайтадан телінуі соншама жақсы болар еді!

²⁵ Бауырластар, бір-біріңнен өздеріңді ақылдырақ санамас үшін, мына бір құпияны сендерден жасырып қалғым келмейді: басқа ұлт өкілдері Құдайға толық келетін кезге дейін Исраилдің бір бөлігі қара тастай қатып, қасарысатын болады.

²⁶ Сонымен, осылайша бүкіл Исраил құтқарылатын болады. Бұл жайында Жазбада: «Сионнан Құтқарушы келеді! Жақыптың ұрпақтарын зұлымдықтың жолынан қайтарып алатын болады!

²⁷ Олардан күнәларын алып тастаған кезде, Мен олармен келісім жасайтын боламын», - деп жазылған.

²⁸ Өйткені Ізгі хабар тұрғысынан қарағанда, сендердің құтқарылуларың үшін, олар Құдайдың жауы болды, ал олардың әкелері таңдалғандықтан, Құдайдың сүйіктісі болды.

²⁹ Себебі Құдайдың сыйы мен шақыруы ешқашан өзгермейді.

³⁰ Сол сияқты бір кездері Құдайға мойынсынбаушылық сендерде де болды, ал қазір сол мойынсынбағандарыңа кешірім алдыңдар,

³¹ енді олар да кешірімге ие болу үшін, дәл сендер сияқты қазір олар да мойынсынбай жүр,

³² өйткені Құдай бәріне бірдей кешірім беру үшін, сол бағынбаушылықтың жетегінде қалдырды.

³³ О, Құдайдың даналығы мен көрегендігі неткен терең еді! Оның шешімдері мен Оның жолын зерттеп білу мүмкін емес!

³⁴ Кім Иеміздің ақыл-ойымен танып-білген? Кім Оның кеңесшісі болып еді?

³⁵ Кім Ол қайтарып берсін деп, Оған алдын ала бір нәрсесін өткізіп қойып еді?

³⁶ Бәрі Онымен басталады және Ол арқылы пайда болған және бәрі Онымен байланыста. Оның даңқы ғасырдан ғасырға жасай берсін! Аумин!