Римдіктерге 1 - Zhana Osiet

¹ Құдайдың Ізгі хабарын тарату үшін, Иса Мәсіхтің құлы ретінде арнайы таңдап алынған Пауыл елшіден сәлем.

² Құдай бұл Ізгі хабарды Өзінің пайғамбарлары арқылы Киелі Жазбада уәде еткен кезде,

³ Ол Өзінің Ұлы туралы айтқан болатын. Ол тәндік денемен Дәуіттің ұрпағы ретінде дүниеге келген.

⁴ Ол Құдайдың Ұлы болу үшін алдын ала белгіленіп, Киелі Рухтың құдіретімен өлімнен қайта тірілген біздің Иеміз Иса Мәсіх болатын.

⁵ Сондықтан барлық халықтар Оның атына сеніммен мойынсынуы үшін, біз Ол арқылы рақымдылыққа ие болып, елші атандық,

⁶ солардың арасында Иса Мәсіхтің шақырып алған ізбасарлары ретінде сендер де барсыңдар.

⁷ Римде тұрып жатқан Құдайдың барлық сүйіктілеріне және киелі халқы болуға шақырылғандарға біздің Құдай Әкеміз бен Иеміз Иса Мәсіхтен келген рақымдылық пен тыныштықты тілейміз.

⁸ Мен, ең алдымен, тек Иса Мәсіх арқылы Құдайыма сендер үшін алғысымды айтамын, өйткені бүкіл әлемге сендердің сенімдерің жария болып жатыр.

⁹ Оның Ұлы жайында Ізгі хабарды жариялап, Оған рухыммен қызмет етіп жүргеніме Құдай куә. Сол секілді сендерді де үздіксіз есіме алып,

¹⁰ әрдайым өз мінәжатымнан сендерді тастамай, әйтеуір, қай кезде болса да, Құдайдың еркімен өздеріңе барып қайтуды өтініп, сұрап жүрмін.

¹¹ Дегенмен, өздеріңді көруге аса құштармын, себебі сендердің берік болуларың үшін, қандай да бір рухани дарыныммен бөлісіп,

¹² осылайша өздеріңмен бірге болып, сеніміміз арқылы бір-бірімізді, өзімді де, сендерді де жұбатпақ болдым.

¹³ Бауырластарым, мен қаншама рет сендерге барғым келіп тырыссам да, әлі күнге дейін кедергілер болып жатқанын сендердің білгендеріңді қалаймын. Сондағы мақсатым-басқа халықтардан көргенім секілді сендерден де қандай да бір жеміс көру.

¹⁴ Мен гректерге және басқа тілде сөйлейтін даналар мен ақылсыздарға да қарыздармын.

¹⁵ Егер өзіме келер болсам, Римде тұрып жатқан сендерге де Ізгі хабарды уағыздауға дайынмын.

¹⁶ Алайда мен Ізгі хабардан еш ұялмаймын, өйткені онда әрбір сенушіні, ең алдымен, яһудейді, содан кейін гректі де құтқарып алатын Құдайдың құдіретті күші жатыр.

¹⁷ Өйткені Құдайдың әділеттілігі Оған деген сенім арқылы ашылады, ал Киелі жазбада: «Әділетті адам сеніммен өмір сүреді», - деп жазылған.

¹⁸ Шындықты өздерінің зұлымдығы мен әділетсіз ісәрекеттерінің құрсауында ұстап тұрған адамдарға Құдай Өзінің қаһарын көктен білдіреді.

¹⁹ Осылайша оларға Құдайдың бар екені нақты белгілі болды, себебі оларға мұны Құдай анық көрсетті.

²⁰ Өйткені Құдайдың әлемді жаратқаннан бергі көзге көрінбейтін істері жаратылыстан-ақ нақты көрініп, түсінікті болып тұр. Осы нәрсе Оның мәңгі күші мен Құдайлық қасиеті болып табылады, сол үшін оларға (сенбеушілерге) кешірім берілмейді.

²¹ Себебі олар Оның Құдай екенін білсе де, Оны не мадақтамады, не Құдай деп Оған алғыс та айтпады. Керісінше, олар түкке тұрмайтын ойға беріліп, жүректері қарайып, түсініксіз күйге түсті.

²² Осылай олар өздерін ақылдымыз деп жүріп, ақымақ болып шықты,

²³ сөйтіп Құдайдың мәңгілік өшпейтін даңқының бейнесін шіріп кететін адам мен құстардың және төрт аяқтылар мен бауырымен жорғалаушылардың бейнесіне ауыстырып алды.

²⁴ Сол себепті Құдай оларды өздерінің жүректеріндегі таза емес қалауларының жетегінде қалдырды, олардың өз денелерін өздері қорлап, арамдауларына жол берді.

²⁵ Олар Құдайдың шындығын өтірікке ауыстырып, жаратылғанды Жаратушыдан жоғары қойып, соған табынып, қызмет етті, ал Сол Жаратушымыз мәңгілік мадаққа лайық. Әумин!

²⁶ Сонымен, Құдай оларды өздерін масқара ететін құмарлықтың жетегінде қалдырды, өйткені әйелдер өздеріне берілген табиғи жыныстық қатынасты табиғи емес қатынаспен ауыстырды,

²⁷ сол сияқты еркектер де әйелдермен болатын табиғи жыныстық қатынасты қойып, бір-біріне ынтығып, құмарлықтың отына беріліп, еркек еркекпен ұятсыз әрекеттер жасап, осылай адасқандары үшін, өздеріне арналған жазаны алатын болады.

²⁸ Осылай олар Құдайды танып-білудің қажет екенін елемегендіктен, Құдай оларды келеңсіз істер жасататын жарамсыз ойдың жетегіне тапсырды.

²⁹ Сөйтіп, олар неше түрлі әділетсіздік пен жауыздыққа, дүниеқорлық пен зұлымдыққа беріліп, қызғаныш, кісі өлтіру, даукестік, қулық-сұмдық, жаман мінез-құлыққа ие болып, өсекші,

³⁰ жалақор, Құдайды жек көретін, дөрекі және өркөкірек, мақтаншақ, зұлымдықты ойлап табатын, ата -анаға бағынбайтын,

³¹ ақылсыз, жылмақай, құрметтеуді білмейтін, мейірімсіз адамдарға айналады.

³² Осындай істермен айналысып жүргендер Құдайдың өлім жазасына лайық деген талабын білсе де, олар мұны істеп қана қоймай, осындай істермен айналысып жүргендерді қолдайды.