Петір 1 3 - Zhana Osiet

¹ Сол секілді, әйелдер де өздеріңнің күйеулеріңе бағыныңдар, себебі егер де олардың кейбіреулері сөзге мойынұсынбайтын болса, онда олар сол әйелдердің өміріндегі мойынұсынушылықты көріп, сол арқылы олар сөзсіз Исаның иелігіне айналатын болады,

² себебі олар сендердің Құдайдан қорқатындарыңды, соған сай өмір сүріп жатқан таза өмірлеріңді көреді.

³ Сондықтан, сендердің көріктеріңді кіргізетін сыртқа өрілген шаштарың мен басқа тағатын алтын немесе осы әлемнің сыртқа көрсету үшін киетін әдемі киімдері емес,

⁴ керісінше көріктіліктің құпиясы адам жүрегінің шіріп кетпеуінде, ол мейірім мен сабырлы рухтың жемісі, яғни осы мінез-құлық Құдайдың алдында аса бағалы болып саналады.

⁵ Себебі өткен кездердегі Құдайға сеніп, киелі атанған әйелдер өздерін осылай әрлеп-сәндеп, өздерінің күйеулеріне бағынып өмір сүретін, сөйтіп олар

⁶ Ыбырайымды тыңдап, оны мырзам деп атаған Сара секілді болды. Енді сендер де ешкімнен қорықпай-ақ, ешқандай да қорқынышсыз сондай жақсы іс-әрекетті жасай беріңдер.

⁷ Ал енді, күйеулер, сендердің де тұрмыс-салттарың олармен бірге өтетінін білесіңдер, сондықтан парасатты болыңдар, оларды бір нәзік ыдыс ретінде бағалап, оларғада өздерің секілді рақымға толы өмірдің мұрагерлері ретінде қараңдар, сонда сендердің мінәжаттарыңа ешқандай кедергі болмайды.

⁸ Ақырына келгенде барлықтарың бір ойлы, бір-біріне жаны ашитын, бауырларын сүйетін, мейірімді, жылы жүзді,

⁹ Зұлымдыққа, зұлымдықпен немесе ұрыс керіске, ұрыс керіспен емес, керісінше жарылқау сөздермен жауап беретін болыңдар, өйткені сендер жарылқау батаға ие болып оны мұра ету үшін шақырылдыңдар.

¹⁰ Өйткені кім өмірді жақсы көрсе, әрі күндерінің жақсы болғанын қалайтын болса, онда ол тілін жамандықтан тыйып, қулық-сұмдықты ауызбен айтуды доғарып,

¹¹ зұлымдықтан аулақ жүрсін, тек жақсылық жасауға ұмтылсын, әрі бейбітшілік іздеп соның жолын қусын.

¹² Себебі Иеміздің көздері тек әділдерге түседі, ал мінәжат етіп жүргендерге Ол құлақтарын түреді, ал Иеміз бет жүзін зұлымдық жасайтындарға бұрады.

¹³ Ал енді егер де сендер тек жақсылық жасаушыларға айналып кетсеңдер, онда кім сендерге зұлымдық жасай алады?

¹⁴ Алайда сендер керісінше әділетті болғандарың үшін азапталатын болсаңдар, онда сендер бақытты күйдесіңдер. Олардан келетін қорқынышқа берілмей, әрі қобалжымай,

¹⁵ өз жүректеріңде Иеміз Мәсіхті қастерлеп, сендердің үміттерің жайлы әркім сұрап жатса, соған әрқашан да жауап беруге дайын болыңдар,

¹⁶ алайда оны кішіпейілділікпен таза ар ұятпен істеңдер, сонда сендердің Мәсіхтегі ізгілікті өмір салттарың үшін сендерді өсектеп жаман атты қылатындар, өз істеріне ұялатын болады.

¹⁷ Негізінде ең жақсысы-жақсылық жасау, ал егер де Құдайдың еркі бойынша азап шегетін болсаң, зұлымдық жасағаннан көрі сол жақсы.

¹⁸ Өйткені Мәсіх біздің күнәларымыз үшін, әрі әділетті болған Ол әділетсіз болғандар үшін бір-ақ рет азап шекті. Ол мұны сендерді Құдайға жақындату үшін істеді, сол үшін Ол тәнінде өлтіріліп, Ол Рухпен қайта тірілді.

¹⁹ Сондықтан Ол қапаста отырған рухтарға барып соны жариялады,

²⁰ өйткені олар өткен кезеңде, яғни Нұқтың кеме құрастырып жатқан күндері Құдайға мойынұсынбағандар. Құдай оларға төзімідік көрсетіп көп күтті, алайда олардың арасынан сегіз-ақ жан су арқылы құтқарылып шықты.

²¹ Сондықтан сендерді құтқарып алу үшін, сол үлгіде сендер өтіп жүрген суға батырып шомылдыру денедегі кірді тазалап жуып тасауды білдірмейді, керісінше ол Құдайға берген уәде болып саналады, сол арқылы біз арұятымыздың тазарғанын, әрі құтқарылуымыз Иса Мәсіхтің өліп қайта тірілгені арқылы болғанын білдіреміз.

²² Міне, сондықтан Ол көкке көтеріліп кетті де, одан кейін Ол Құдайдың оң жағына барып отырды, енді Оған періштелер де, билік иелері де, күштің иелері де бағынатын болады.