Матай 8 - Zhana Osiet

¹ Иса таудан түскен кезде, Оның соңынан көп халық ілесті.

² Міне, Оған алапеспен ауыратын бір адам жақындап келіп, тағзым етті де: -Ием, егер қаласаңыз, мені тазарта аласыз! - деді.

³ Сонда Ол қолын тигізді де: -Иә, тазарғаныңды қалаймын! - деді. Сол сәтте-ақ ол алапестен тазаланды.

⁴ Иса оған: -Байқа, ешкімге айтпа, бірақ ғибадатхана қызметкерлеріне барып, өзіңді көрсет және Мұса белгілеп берген сыйды тарту ет, сол оларға куәлік болсын, - деді.

⁵ Иса Қапарнаумға кірген кезде, Оған бір жүзбасы келіп, былай деп өтінді:

⁶ -Ием, менің балам талма ауруына шалдығып, үйде қатты қиналып жатыр, - деді.

⁷ - Мен барып сауықтырайын, - деді сонда Иса.

⁸ Бірақ жүзбасы: -Ием, менің үйіме келуіңе лайық емеспін, бірақ бір сөз айтсаң болды, менің балам сауығып кетеді, - деді.

⁹ Менің өзім де билік астындағы адаммын, өзіме бағынышты сарбаздарым бар. Біреуіне бар десем, барады, басқасына кел десем, келеді. Қызметшіме мынаны істе десем, соны істейді, - деді.

¹⁰ Мұны естіген Иса таңғалып, соңынан еріп келе жатқандарға былай деді: -Сендерге шындығын айтамын: Мен осындай өте үлкен сенімді Исраилде көрген емеспін.

¹¹ Сендерге айтарым: шығыс пен батыстан келген көпшілік Ыбырайым, Ысқақ және Жақыппен бірге Көктегі Патшалықтың төріне жайғасатын болады.

¹² Ал патшалықтың ұлдары сырттағы қара түнекке қуылатын болады, сонда олар сол жерде жылап-еңіреп, өкінетін болады.

¹³ Сонда Иса жүзбасыға: -Сеніміңе сай тілегенің орындалсын,бара бер, -деді. Бала сол сәтте сауығып кетті.

¹⁴ Иса Петірдің үйіне келгенде, оның енесінің ыстығы көтеріліп, қиналып жатқанын көрді.

¹⁵ Иса оның қолына қолын тигізген кезде, ыстығы басылды. Әйел орнынан тұрып, Оған қызмет етті.

¹⁶ Кеш батқан кезде, Исаға көптеген жын соққан адамдарды алып келді. Ол сол рухтарды сөзбен қуып шығарып, барлық ауырған науқастарды сауықтырды.

¹⁷ Осылай Ишая пайғамбар арқылы айтылған мына сөз орындалды: «Ол бізді әлсіздігімізден арылтып, ауруларымызды алып кетті».

¹⁸ Иса көп халықтың маңайына жиналып қалғанын көрген соң, шәкірттеріне арғы жағаға өтуді бұйырды.

¹⁹ Сол кезде Оған бір Заң оқытушысы келіп: -Ұстаз, Сен қайда барсаң, Мен Сенің соңыңнан еріп жүремін, - деді.

²⁰ Иса оған мынаны айтты: -Түлкінің іні бар, құстың ұясы бар, алайда Адамның Ұлында бас тірейтін орын да жоқ.

²¹ Исаның тағы басқа бір шәкірті: -Ием, ең алдымен, әкемді жерлеп келуге рұқсат берші, - деді.

²² Иса оған: -Менің соңымнан ер, өлгендерді жерлеуді өлілердің өздеріне қалдыр, - деді.

²³ Содан кейін Ол қайыққа барып отырды, шәкірттері де Онымен бірге болды.

²⁴ Күтпеген жерден көл бетінде қатты дауыл тұрып, қатты толқындар қайықты ұрғылап, суға толтыра бастады. Иса сол кезде ұйықтап жатты.

²⁵ Сонда шәкірттері Оның қасына келіп оятты: -Ием! Құтқара гөр, құритын болдық! - деді.

²⁶ Сонда Иса: -Неден соншама қорқып тұрсыңдар, сенімі аздар-ай?! -деді. Ол орнынан тұрды да, жел мен дауылға бұйрық беріп, тыйым салды. Сол сәтте-ақ тыныштық орнады.

²⁷ Шәкірттері бұған қайран қалып: -Бұл Кім Өзі?! Тіпті, жел мен дауыл да Оған бағынады ғой! - десті.

²⁸ Иса көлдің арғы бетіндегі Ғадара жеріне келгенде, Оған қабірден шығып келе жатқан екі жын соққан адам кездесті. Олар өте қауіпті болғандықтан, сол жолмен ешкім жүрмейтін еді.

²⁹ Олар: -Құдайдың Ұлы, бізде нең бар? Сен осында бізді уақытынан бұрын құртып, азапқа салып, қинау үшін келдің бе? - деп айғайлады.

³⁰ Сол маңайда, олардан қашықтау жерде, бір топ шошқа жайылып жүрген болатын.

³¹ Сонда жындар Исадан: -Егер бізді қуатын болсаң, анау шошқаларға жіберші! - деп жалынды.

³² Иса оларға: -Барыңдар! -деді. Сонда жын әлгі адамнан шығып, шошқаларға енді. Шошқалар шыңғырып, көлге қарай бет алды, тік жардан құлап, суға құлап өлді.

³³ Шошқалардың бағушылары қалаға қашып, болған жағдайды және жын буған адаммен не болғанын түгел жеткізді.

³⁴ Міне, осы оқиғадан кейін бүкіл қала тұрғындары Исамен кездесуге шықты, Оны көрген соң, сол аймақтан кетуін өтінді.