Матай 7 - Zhana Osiet

¹ Өздерің айыпталмауларың үшін, өзгелерді де айыптамаңдар.

² Себебі сендер басқаларды қалай айыптасаңдар, сендер де солай айыпталатын боласыңдар және қандай өлшемді қолдансаңдар, өздеріңе де сондай өлшем қолданылады.

³ Неге өз бауырыңның көзіндегі жаңқаны көріп, ал өз көзіңдегі бөренені байқамайсың?

⁴ Немесе өз көзіңдегі бөренені байқамай тұрып, бауырыңа: «Кәне, сенің көзіңдегі жаңқаны алып тастайын», -деп қалай ғана айта аласың?

⁵ Әй, екіжүзді, ең алдымен, өз көзіңдегі бөренені алып таста, содан кейін ғана бауырыңның көзіндегі жаңқаны қалай алып тастау керек екенін анық білетін боласың.

⁶ Киелі деп санағандарыңды иттерге бермеңдер әрі інжумаржандарыңды шошқаның алдына тастамаңдар, әйтпесе олар аяқтарымен таптап, айналып келіп, сендерді жарып тастайды.

⁷ Сұраңдар, сонда сендерге беріледі, іздеңдер, сонда табасыңдар, қағыңдар, сонда сендерге ашылады.

⁸ Себебі сұраған әркім алады, іздейтін болса, табады, қағатын болса, ашылады.

⁹ Сендердің араларыңда нан сұрап тұрған баласына тас беретін адам бар ма?

¹⁰ Немесе балық сұраса, оған жылан ұстата ма?

¹¹ Өздерің зұлым бола тұра, балаларыңа жақсы сыйлар беру керектігін білесіңдер, алайда сендердің Көктегі Әкелерің Өзінен сұрағандарға одан да мол етіп бере алады.

¹² Сондықтан адамдар қалай да сендердің қалағандарыңды істесін десеңдер, сендер де олардың қалауына сай істеңдер. Себебі Таурат заңы мен пайғамбарлар жазбаларының негізі осыған бекітілген.

¹³ Тар қақпадан кіріңдер, өлімге апаратын қақпа да, жолда кең, көп адамдар тек сонымен ғана жүреді.

¹⁴ Өмірге апаратын қақпа да, жол да тар және оны табатындар аз.

¹⁵ Сендер жалған пайғамбарлардан сақ болыңдар, олар қойдың терісін жамылып келеді, алайда олардың ішкі жан дүниесі жыртқыш қасқырға ұқсас болады.

¹⁶ Сөйтіп, оларды жемістеріне қарап танып -білетін боласыңдар. Тікенді бұтадан жүзім, ошағаннан інжір жинай ма?

¹⁷ Сонымен, әрбір жақсы ағаш жақсы жеміс береді, шіріген, жаман ағаш жаман жеміс береді.

¹⁸ Жақсы ағаш жаман жеміс, ал шіріген ағаш жақсы жеміс бере алмайды.

¹⁹ Жақсы жеміс бермейтін әрбір ағаш шабылып, отқа тасталынады.

²⁰ Сондықтан да оларды жемістеріне қарап танып -білетін боласыңдар.

²¹ Маған «Ием! Ием!» деп айтқан әркім емес, керісінше, Менің Көктегі Әкемнің еркін орындайтындар ғана Көктегі Патшалыққа кіретін болады.

²² Сол күні көп адамдар Маған: «Ием, Ием! Сенің атыңмен пайғамбарлық сөздер айтып, Сенің атыңмен жындарды қуып шығарып, Сенің күшіңмен көп кереметтер жасадық емес пе?» - деп айтатын болады.

²³ Сонда Мен оларға: «Мен сендерді ешқашан танып-білген емеспін, Менен аулақ кетіңдер, заңсыз іс-әрекет жасағандар!» - деп оларға ашық айтатын боламын.

²⁴ Сондықтан кім Менің осы сөздеріме ден қойып, оны тыңдап, оларды іске асыратын болса, ол үйін жартасқа салған ақылды адамға ұқсайды.

²⁵ Жаңбыр жауып, өзендер тасып, дауыл тұрып, сол үйді соққылағанда, қирамай аман қалады, себебі оның негізі жартасқа қаланған болатын.

²⁶ Алайда Менің осы сөздерімді тыңдап, оларды іске асырмаған әркім үйін құмға тұрғызған ақымақ адамға ұқсайды.

²⁷ Жаңбыр жауып, өзендер тасып, дауыл тұрып, сол үйді соққылағанда, оның қирауы өте оңай болады.

²⁸ Иса сөздерін осылай аяқтаған кезде, сонда тұрған халық Оның тәліміне қайран қалды,

²⁹ себебі Ол Таурат заңын зерттеушілер сияқты емес,тәлімдерін ерекше бір билікпен үйретті.