Матай 5 - Zhana Osiet

¹ Көп халықты көрген Иса тауға көтерілді. Ол отырған кезде, қасына шәкірттері келді.

² Ол мынадай сөздермен тәлім бере бастады:

³ -Рухы кедейлер бақытты, өйткені Көктегі Патшалық солардікі болады.

⁴ Қайғырып, жылағандар бақытты, олар жұбаныш табатын болады.

⁵ Кішіпейілділер бақытты, олар жерді иемденеді.

⁶ Әділдікті аңсап, ашығып, шөлдегендер бақытты, олар қанағат табады.

⁷ Мейірімділік танытқандар бақытты, олар да мейірімге ие болады.

⁸ Жүрегі тазалар бақытты, себебі олар Құдайды көре алатын болады.

⁹ Татуластырушылар бақытты, өйткені олар Құдайдың Ұлы деп аталатын болады.

¹⁰ Әділдік үшін қудаланғандар бақытты, Көктегі Патшалық солардікі болады.

¹¹ Маған бола сендерді қорлап, қудалап, өтірік жала жапса, сендер - бақыттысыңдар.

¹² Қуанып, шаттаныңдар, сонда көктегі сыйларың мол болады, сендерге дейінгі пайғамбарларды да осылай қудалаған.

¹³ Сендер осы жерге тұзсыңдар, егер тұздың дәмі жоғалса, оның тұздық дәмін қайтадан қалпына келтіруге бола ма? Ол еш нәрсеге жарамсыз болғандықтан, тек аяқ астына төгіп тастау ғана қалады.

¹⁴ Сендер -осы әлемге нұрсыңдар, тау басында тұрған қаланы еш жасыра алмайсың.

¹⁵ Жағылған шамды да ыдыспен бүркемей, шам қойғышқа қояды, сонда үйдегілердің бәріне жарық түседі.

¹⁶ Сол сияқты сендердегі жарық адамдардың алдында жарқырап, жақсы істеріңді оларға көрсетсін, сөйтіп, сендердің Көктегі Әкелеріңді олар мадақтайтын болсын.

¹⁷ Мені заңды немесе пайғамбарлардың айтқандарын жою үшін келді деп ойламаңдар, тек оларды орындау үшін келдім.

¹⁸ Сендерге шындықты айтып тұрмын: -Мына аспан мен осы жер жойылып кетпейінше, Заңның кішкентай бір әрпі немесе оның бір сызығы да жойылмайды, бәрі де орындалады.

¹⁹ Сондықтан егер біреу осы кішкентай өсиеттің бірін бұзып әрі адамдарды соған үйретсе, Көктегі Патшалықтың ең кішкентайы сол болады. Кім оны орындап, іске асырып, соған үйрететін болса, Көктегі Патшалықтың ең үлкені сол болады.

²⁰ Сонымен, сендерге айтарым: -Егер де сендердің әділдіктерің, Таурат заңын зерттеушілер мен фарисейлерден асып түспесе, онда Көктегі Патшалыққа кіре алмайсыңдар.

²¹ Сендер алдыңғы ұрпаққа: «Кісі өлтірме, кісі өлтірген сотталады», - деп айтылғанын естідіңдер.

²² Мен сендерге былай деймін: -Бауырына ашуланған әркім сотталады және кім бауырына «бейшара» деп айтса, жоғарғы кеңес алдында жауап береді, кім «ақымақ» деп айтса, тозақ отында өртенеді.

²³ Сондықтан егер сен сый-тартуыңды құрбандық үстелінің алдына әкеліп тұрып, сол жерде бауырыңның өзіңе қарсы реніші бар екені есіңе түссе,

²⁴ сый-тартуыңды құрбандық үстелінің алдына қалдырып, алдымен бауырыңмен татулас, содан кейін келіп, құрбандығыңды ұсын.

²⁵ Қарсыласыңмен жолда бірге болсаң, тез арада онымен татуласқаның жөн, олай істемесең, ол сені сотқа береді, сот сені қызметшісіне тапсырады, ол сені абақтыға жабады.

²⁶ Саған шындығын айтайын: төлеміңді соңғы тиынға дейін төлемесең, сол жерден шыға алмайсың.

²⁷ Бұдан басқа сендер: «Неке адалдығын бұзба», -дегенді де естідіңдер.

²⁸ Мен сендерге айтайын, әркім бір әйелге құмарта қарайтын болса, ол сол сәтте-ақ өз жүрегінде онымен неке адалдығын бұзады.

²⁹ Егер оң көзің сені азғырса, оны ойып алып таста, бүкіл денеңнің тозақ отына тасталғанынан гөрі, бір мүшеңнен айырылсаң, соның саған әкелетін пайдасы өте зор.

³⁰ Егер де оң қолың сені азғыратын болса, оны жұлып алып таста, бүкіл денеңнің тозақ отына кеткенінен гөрі, бір мүшеңнен айрылғаныңның өзі саған пайдалы.

³¹ Былай деп айтылған болатын: «Өз әйелінен ажырасқан әркім әйеліне ажырасу куәлігін беретін болсын».

³² Мен сендерге мынаны айтамын: -Әйелінен неке адалдығын бұзғаны үшін емес, басқа бір себеппен ажырасқан әркім оны жыныстық азғындық жолына түсуге итермелейді, кім де кім ажырасқан әйелге үйленетін болса, онда ол жыныстық азғындық жасайды.

³³ Бұдан бұрынғы адамдарға да: «Берген анттарыңды бұзбаңдар, Құдайдың алдында берген антыңды орындайтын бол», - деп айтылғанын естідіңдер.

³⁴ Соған байланысты Менің сендерге айтарым: -Мүлдем ант бермеңдер, көкпен де ант берме, себебі ол -Құдайдың тағы,

³⁵ жермен де ант берме, себебі ол -Оның табан тірейтін тіреніші, Иерусалиммен де ант беруші болма, себебі ол -Ұлы Патшаның қаласы.

³⁶ Өз басыңмен де ант берме, себебі шашыңның бір талын ағарта да алмайсың, қарайта да алмайсың.

³⁷ Одан да сендердің «иә» дегендерің «иә», «жоқ» дегендерің «жоқ» болсын, егер бұған артық қосатын болсаң, ол - әзәзілден.

³⁸ Сендер «көзге-көз», «тіске-тіс» дегенді де естідіңдер.

³⁹ Менің сендерге айтарым: Өздеріңе зұлымдық істегенге қарсы тұрмаңдар, керісінше, кім сенің оң жақ бетіңнен ұратын болса, сол жақ бетіңді де тос.

⁴⁰ Сенімен соттасқысы келіп, көйлегіңді алғысы келгенге сырт киіміңді де қалдыр.

⁴¹ Егер біреу сені мәжбүрлеп, бір шақырым жүргізсе, онымен екі шақырым жүр.

⁴² Сұрап тұрса, бер, сенен қарыз алғысы келгеннен де теріс айналушы болма.

⁴³ Сендер «жақыныңды сүйіп, жауыңды жек көр» дегенді де естідіңдер.

⁴⁴ Менің сендерге айтарым: -Жауларыңды жақсы көріңдер және өздеріңді қудалағандар үшін мінәжат етіңдер.

⁴⁵ Сонда сендер Көктегі Әкелеріңнің ұлдары боласыңдар, себебі Ол күн шуағын жамандарға да, жақсыларға да бірдей түсіреді, жаңбырды әділдерге де, әділетсіздерге де бірдей жаудырады.

⁴⁶ Егер де сендер тек өздеріңді сүйетіндерді ғана сүйетін болсаңдар, онда сендердің алатын сыйларың қандай болмақ? Осындай нәрсені салықшылар да істемей ме?

⁴⁷ Сондай -ақ тек бауырластарыңмен ғана амандассаңдар, мұның қандай артықшылығы бар? Өзге ұлттың адамдары да осылай істемей ме?

⁴⁸ Сондықтан сендердің Көктегі Әкелерің қандай кемелді болса, сендер де сондай кемелді болыңдар.