Матай 4 - Zhana Osiet

¹ Сол уақытта Иса Рухтың жетегімен әзәзілдің сынағынан өту үшін, шөл далаға барды.

² Қырық күн, қырық түн бойы оразада болып, ақырында ашыққанын сезінді.

³ Сонда Оған азғырушы келіп: -Егер де Сен Құдайдың Ұлы болсаң, мына тастар нанға айналсын деп айтшы, -деді.

⁴ Сонда Ол былай деп жауап берді: -Жазбада: «Адам тек нанмен ғана емес, Құдайдың аузынан шыққан әрбір сөзімен де өмір сүреді деп жазылған».

⁵ Содан кейін әзәзіл Оны киелі қаладағы ғибадатхана төбесінің шетіне тұрғызып:

⁶ -Егер Сен Құдайдың Ұлы болсаң, төмен қарай секір. «Ол періштелеріне Сен туралы бұйрық беріп, аяғыңды тасқа соғып алмауың үшін, Сені қолдарыменкөтеріп алып жүреді», - деп те жазылған деді.

⁷ Исаның оған былай деп жауап берді: Жазбада:«Құдай Иеңді сынама», - деп жазылған.

⁸ Осыдан кейін әзәзіл Оны ең биік таудың басына апарып, Оған осы әлемнің барлық патшалықтарын және олардың бүкіл байлықтарын көрсетіп:

⁹ -Егер басыңды иіп, маған табынатын болсаң, осының бәрін Саған беремін, - деді.

¹⁰ Иса оған: -Сайтан, Менен аулақ кет! «Тек Құдай Иеңе ғана табынып, тек Оған ғана қызмет ет», -деп Жазбада жазылған.

¹¹ Сонда әзәзіл Оны қалдырып, сол сәтте кетіп қалды, періштелер келіп, Оған қызмет көрсетті.

¹² Жақияның ұсталғанын естігеннен кейін, Иса Ғалилеяға қайта оралады.

¹³ Назаретті тастап, Забулон мен Нафталим аймағына келіп, теңізге жақын Қапарнаум қаласына барып қоныстанды,

¹⁴ өйткені Ишая пайғамбар арқылы айтылған мына сөз орындалуы тиіс болған:

¹⁵ «Забулон, Нафталим жеріндегі әрі Иорданның арғы жағы мен теңізге апаратын жолдағы өзге ұлттар мекендеген Ғалилея.

¹⁶ халқы түнекте болғанда, ғаламат жарықты көрді, сөйтіп, өлімнің қапасында отырған осы елге жарық сәулесін төкті».

¹⁷ Сол уақыттан бастап Иса: -Міне, Көктегі Патшалық жақындап қалды, өкініп, тәубе етіңдер! -деп уағыз айта бастады.

¹⁸ Бірде Иса Ғалилея көлінің маңынан өтіп баражатып, ау салып жатқан Петір мен Әндір атты ағайынды екі жігітті көрді, олар балық аулаушылар болатын.

¹⁹ Сонда Иса оларға: -Менің соңымнан еріңдер, Мен сендерді «адам аулаушы» етемін, - деді.

²⁰ Олар сол сәтте ауларын тастап, Оның соңынан ерді.

²¹ Сол жерден біраз жүргеннен кейін, Зебедейдің ұлдарын, ағайынды Жақып пен Жоханды, әкелерімен бірге қайықта ауларын жамап отырғандарын көріп, оларды да шақырды.

²² Олар әкелерін де, қайықтарын да сол сәтте тастап, Исаның соңынан ерді.

²³ Осылай Иса бүкіл Ғалилеяны аралап, Патшалықтың ізгі хабарын синагогаларда уағыздап, үйретіп, халықты әр түрлі аурулар мен барлық әлсіздіктен сауықтырды.

²⁴ Сонымен, Ол туралы хабар бүкіл Сирия өлкесіне жайылып кетті. Оған әр түрлі ауруға шалдығып, қиналғандарды, жын соққандарды әрі талмасы барлар мен сал болғандарды алып келіп жатты. Иса олардың бәрін сауықтырды.

²⁵ Осылай Оның соңынан Ғалилеядан, Он қаладан, Иерусалимнен және Яһудея мен Иорданның арғы жағынан да көптеген халық ілесіп жүрді.