Матай 3 - Zhana Osiet

¹ Сол күндері Яһудеяның иен даласына суға батырып шомылдырушы Жақия келіп, жар салып:

² -Тәубе етіңдер! Көктің Патшалығы таяп қалды! -деп уағыз айтып жүрді.

³ «Иеміздің жолын дайындаңдар! Оның жолы тузу болсын! -деп жар салған дауыс шығады айдалада», -деп Ишая пайғамбар арқылы айтқан адам осы Жақия еді.

⁴ Жақия түйе жүнінен тоқылған киім киіп, беліне теріден жасалған белбеу тағып жүретін. Жейтін тамағы шегіртке мен жабайы араның балы еді.

⁵ Сол кезде Иерусалимнен, бүкіл Яһудея аймағынан және Иорданға жақын жерден адамдар ағылып келіп жатты.

⁶ Олар өз күнәларын мойындап, Жақия арқылы Иордан өзенінде батырып суға шомылдырудан өтті.

⁷ Жақия батырып суға шомылдырудан өтуге келген көптеген фарисейлер мен садукейлерді көріп, оларға:-Улы жыланның тұқымдары, төгілуге дайын тұрған қаһардан құтылуды сендерге кім үйретті?

⁸ Сондықтан шынайы тәубе еткендеріңе сай, жеміс беріңдер.

⁹ Біздің «Ыбырайым атты әкеміз бар» дегенді айтпаңдар. Сондықтан да сендерге былай деймін: Құдай Ыбырайымға мына тастардан да бала жасап бере алады. Міне, қазірдің өзінде ағаштың түбіне балтасын әкеліп қойды. Сонымен, жақсы жеміс бермейтін әрбір ағаш шабылып, отқа тасталады.

¹⁰ Мен сендердің тәубе еткендеріңнің белгісі ретінде тек батырып суға шомылдырудан ғана өткіземін, алайда менен кейін Келетін менен де күшті, мен Оның аяқ киімін кигізуге де лайықсызбын. Ол сендерді Киелі Рухқа және отқа шомылдырады.

¹¹ Сонымен қатар, Ол қолындағы күрегімен, Өз қырманын тазартып, бидайын қамбаға жинап, қауызын өшпейтін отқа өртейді, - деді.

¹² Сол уақытта Иса Ғалилеядан Иорданға келіп, батырып суға шомылдырудан Жақия арқылы өтпек болды.

¹³ Жақия Оған қарсылық білдіріп: -Батырып суға шомылдырудан менің өтуім қажет еді, Сенің маған келгенің қалай? - деді.

¹⁴ Сонда Иса оған жауап қатып: -Оны әзірге қоя тұр, өйткені әрбір әділ істі лайықты етіп орындау бізге жүктелген, - деді. Ол бүған келісті.

¹⁵ Иса батырып суға шомылдырудан өтті, судан шыққан сәтте Жақия көктің ашылғанын және көгершін секілді төмендеп келіп, Оған қонған Құдайдың Рухын көрді.

¹⁶ Міне, сол сәтте Көктен:

¹⁷ -Бұл -Менің сүйікті Ұлым, Мен Оған ризамын! -деген дауыс естілді.