Матай 28 - Zhana Osiet

¹ Сенбі өтіп, аптаның бірінші күні болғанда, мағдалалық Мәрия мен өзге Мәриям таң ата қабірді көруге келді.

² Міне, кенет қатты жер сілкінісі болып, Жаратқан Иенің періштесі көктен түсіп, қабір аузындағы тасты аударып тастады да, оның үстіне отырды.

³ Оның бейнесі найзағай сияқты, киімдері аппақ қардай болатын.

⁴ Сонда күзетшілердің қорыққандары соншама, қалтырап, өлген адамдай серейіп тұрып қалды.

⁵ Періште әлгі әйелдерге: -Қорықпаңдар, сендердің айқышқа шегеленген Исаны іздеп жүргендеріңді білемін, -деді.

⁶ Ол мұнда жоқ. Ол бұрын Өзі айтқандай қайта тіріліп кетті. Келіп, Оның жатқан жерін көріңдер,

⁷ Тезірек барып, Оның өлімнен қайта тірілгенін шәкірттеріне айтыңдар және Ол сендерден бұрын Ғалилеяға барады. Оны сол жерден көресіңдер. Сендерге айтқанымды естеріңе сақтаңдар.

⁸ Қабірден қорқынышпен шыққан олар енді ерекше үлкен қуанышпен шәкірттеріне айтуға асыға басып, жүгіре жөнелді.

⁹ Кенеттен оларға Иса кездесіп: -Қуаныңдар! -деді. Олар жақын келіп, Оның аяғын құшақтап, Оған тағзым етті.

¹⁰ Сонда Иса Оларға: -Қорықпаңдар. Меніңбауырларыма барып, Ғалилеяға барсын деп хабар беріңдер. Олар Мені сол жерде көретін болады, - деді.

¹¹ Олар кетіп бара жатқанда, кейбір күзетшілер қалаға келіп, болған жағдайдың бәрін бірінші бас қызметкерлерге айтып берді.

¹² Сонда олар ақсақалдармен бірге кеңесіп, сарбаздарға жеткілікті мөлшерде күміс ақша ұсынып, былай деді:

¹³ «Біз түнде ұйықтап қалғанда, шәкірттері келіп, Оны ұрлап кетті, - деп айтыңдар.

¹⁴ Егер бұл әміршінің құлағына жететін болса, оны біз көндіріп, сол келеңсіз жағдайдан сендерді өзіміз құтқарып аламыз», - деді.

¹⁵ Күміс ақшаны алған олар өздерін қалай үйреткен болса, солай істеді. Сөйтіп, осы сөз күні бүгінге дейін яһудейлердің арасына таралып кетті.

¹⁶ Он бір шәкірті Исаның нұсқағанындай Ғалилея тауына барды.

¹⁷ Сол жерде Оны көріп, тағзым етті, ал кейбіреулері күмәнданды.

¹⁸ Сонда Иса оларға жақын келіп былай деді: -Көк пен жердегі бүкіл билік Маған берілген.

¹⁹ Сондықтан барлық халықтарға барып, Маған шәкірт етіңдер, оларды Әкенің атымен және Ұлдың, Киелі Рухтың атымен батырып суға шомылдырудан өткізіңдер,

²⁰ сендерге бұйырғандарымның бәрін орындап жүруге оларды да үйретіңдер. Мен осы дүниенің ақырына дейін әр күні сендермен бірге боламын.