Матай 27 - Zhana Osiet

¹ Исаға қарсы болған барлық бірінші бас қызметкерлер мен ақсақалдар таңертең ерте жиналып, Оны өлтіруге шешім қабылдады.

² Оны байлап, әмірші Пилатқа апарып тапсырды.

³ Сонда Исаны ұстап берген Яһуда Оның сотталғанын көріп өкінді, бірінші бас қызметкерлер мен ақсақалдарға отыз күміс теңгені қайтарып беріп:

⁴ -Кінәсіз жанның қанын сатып, күнә жасадым, -деді. Олар: - Бізге не істе дейсің? Өзіңнен көр! - деді.

⁵ Ол ғибадатханаға күміс теңгелерді шашып жіберіп, барды да, асылып өлді.

⁶ Бірінші бас қызметкерлер күміс теңгелерді жинап алып:

⁷ -Бұл ақша қан үшін төленген құн болатын, енді оны ғибадатхананың қазынасына салуға болмайды, - деді.

⁸ Сөйтіп, олар кеңесіп шешім қабылдады, сол ақшаға жат жерліктерді жерлейтін орын алу үшін, құмырашының жерін сатып алды. Сондықтан сол жер осы күнге дейін «қанды жер» деп аталады.

⁹ Солай Еремия пайғамбар арқылы айтылған мына сөз орындалды: «Исраил ұлдарының бағалаған бағасымен, құны Отыз күміс теңгеге татитын,

¹⁰ құмырашының жерін Иемнің бұйрығымен Мен үшін сатып алды».

¹¹ Исаны әміршінің алдына апарды, сонда әмірші: -Яһудейлердің Патшасы Сенбісің? -деп сұрады. -Сен өзің айтып тұрсың, - деп жауап берді Иса.

¹² Бірінші бас қызметкерлер мен ақсақалдардың таққан айыптарына Ол ешқандай жауап бермеді.

¹³ Сонда Пилат Оған: -Саған қарсы қаншама адам куәлік беріп тұрғанын естіп тұрсың ба? - деді.

¹⁴ Бірақ Иса оның бір сөзіне де жауап бермеді, әмірші осыған қатты таңғалды.

¹⁵ Әмірші өзінің әдеті бойынша мейрам кезінде халықтың тілегіне сай бір тұтқынды босатып беретін еді.

¹⁶ Дәл сол кезде аты әйгіл Ешуа Бараба деген тұтқын да отырған болатын.

¹⁷ Сонда Пилат жиналғандарға: -Сендерге кімді босатып бергенімді қалайсыңдар? Ешуа Барабаны ма әлде Иса деп аталған Мәсіхті ме? - деді.

¹⁸ Себебі ол Исаны қызғаныштан өзіне ұстап бергендерін білетін.

¹⁹ Пилат сот жүргізушінің орнына көтерілген кезде, әйелі оған хабаршы жіберіп: «Сол әділ адамға еш нәрсе істеме! Мен бүгін түсімде Ол үшін қатты қиналдым»,-деп айтқызды.

²⁰ Бірақ та бірінші бас қызметкерлер мен ақсақалдар Барабаның босатылып, ал Исаның өлтірілуін талап етуді халықтан сұрап, алдын ала көндіріп қойған болатын.

²¹ Сонда әмірші: -Сонымен, осы екеуінің қайсысын сендерге босатып бергенімді қалайсыңдар? -деп сұрады. -Барабаны! - деді олар.

²² -Ал Иса деп аталған Мәсіхпен не істеуім керек? -деп сұрады. Бәрі бір дауыспен: -Айқышқа шегеленсін! -деді. Пилат халықтан:

²³ -Ол қандай зұлымдық жасады? -деп сұрады. Олар бұрынғыдан бетер қатты айғайлап: -Айқышқа шегеленсін! -деді.

²⁴ Ештеңе істей алмайтынын, тіпті, толқудың өршіп бара жатқанын көрген Пилат халықтың алдында қолын сумен жуып тұрып: -Мынаның төгілген қанына мен кінәлі емес екенімді сендер көрдіңдер, - деді

²⁵ Сонда бүкіл халық: -Оның қаны біздің және біздің балаларымыздың мойнында болсын, - деп жауап берді.

²⁶ Сөйтіп, оларға Барабаны бостатып беріп, ал Исаны сабатып, айқышқа шегелеуді тапсырды.

²⁷ Сол уақытта әміршінің сарбаздары Исаны сарайға алып барды, сонда Исаның қасына бүкіл жасақшылар жиналды.

²⁸ Оны шешіндіріп, Оған алқызыл шапан жапты,

²⁹ тікеннен тәж өріп, басына кигізді, Оның оң қолына таяқ ұстатып қойды да, алдына келіп тізе бүгіп: -Яһудейлердің Патшасы жасасын! - деп мазақтады.

³⁰ Оның бетіне түкіріп, таяқпен басынан ұрды.

³¹ Оны әбден келемеждеп болған соң, үстіндегі алқызыл шапанды шешіп алып, Исаға Өзінің киімдерін қайта кигізіп, Оны айқышқа шегелеуге алып кетті.

³² Олар шығып бара жатқанда, жолда киринеялық Симон есімді бір адамды жолықтырып, оны Исаның айқышын алып жүруге мәжбүрледі.

³³ Содан олар Ғолғота деп аталатын (мағынасы«Маңдайтөбе» дегенді білдіретін) жерге келгенде,

³⁴ Исаға өт қосылған ашты шарапты берді, Ол дәмін татып көрді, бірақ ішпеді.

³⁵ Исаны айқышқа шегелеген соң, Оның киімдерін жеребе тастап бөлісіп алып,

³⁶ сол жерде Оны күзетіп отырды.

³⁷ Исаның бас жағына: «Бұл -Яһудейлердің Патшасы Иса» деп, Оған тағылған айыпты көрсететін тақтайшаны жазып қойды.

³⁸ Содан кейін Онымен бірге екі қарақшының бірін Оның оң жағына, екіншісін сол жағына айқышқа шегелеп іліп қойды.

³⁹ Оның қасынан өтіп бара жатқандар бастарын шайқап, Оны балағаттап:

⁴⁰ -Ғибадатхананы бұзып, үш күнде тұрғызамын деуші едің, енді Өзіңді-Өзің құтқар! Егер Сен Құдайдың Ұлы болсаң, айқыштан түс! - деді.

⁴¹ Сол сияқты бірінші бас қызметкерлер, Таурат заңын зерттеушілер мен ақсақалдар да Оны келекелеп былай деді:

⁴² -Басқаларды құтқарып, Өзін-Өзі құтқара алмады,Исраилдің патшасы болса, онда айқыштан түссін, сонда Оған сенеміз.

⁴³ Ол сенімін Құдайға артты, егер Жаратқан Ие қаласа, Оны құтқарып алсын, өйткені Өзін Құдайдың Ұлымын деген еді ғой! - десті.

⁴⁴ Осы сияқты сөздермен Исамен бірге айқышқа шегеленген қарақшылар да Оған тіл тигізді.

⁴⁵ Сонда түскі сағат он екіден бастап, түстен кейінгі сағат үшке дейін бүкіл жерді қара түнек басты.

⁴⁶ Сағат үш шамасында Иса қатты дауыстап: -Ели, Ели, Лема савахтани? -деп айғайлады. Бұл: «Құдайым Менің, Құдайым Менің, Сен Мені не үшін тастап кеттің?» -дегені еді.

⁴⁷ Сол жерде тұрғандардың кейбіреулері мұны естіп: -Ол Ілиясты шақырып жатыр, - десті.

⁴⁸ Сол мезетте олардың біреуі жүгіріп барып, сірке суына сорғышты батырып алды да, оны таяқтың ұшына іліп, Оған ішкізді.

⁴⁹ Сонда басқалары: -Оны құтқару үшін Ілияс келер ме екен, соны көрейік, тоқтай тұрайық, - десті.

⁵⁰ Иса тағы да қатты айғайлап, жан тапсырды.

⁵¹ Міне, сонда ғибадатханадағы шымылдық жоғарыдан төмен қарай ортасынан қақ бөлінді. Жер сілкініп, тастар айырылды.

⁵² Қабірлер ашылып, көптеген әділдердің өлі денелері орындарынан тұрып, тірілді.

⁵³ Иса қайта тірілгеннен кейін, қабірден шыққандармен бірге киелі қалаға (Иерусалимге) кіріп, көпшілікке көрінді.

⁵⁴ Жүзбасы және онымен бірге Исаны күзетіптұрғандар жер сілкінісін, болған жағдайдың бәрін көріп, қатты қорқып: - Ол, шынымен де, Құдайдың Ұлы! - деді.

⁵⁵ Сол жерде алыстан қарап тұрған әйелдер де болды, олар Оған қызмет ету үшін, сонау Ғалилеядан Исаға ілесіп келген болатын.

⁵⁶ Солардың арасында мағдалалық Мәрия, Жақып пен Жүсіптің анасы Мәриям және Зебедей ұлдарының анасы да болды

⁵⁷ Кеш түскенде, Исадан тәлім алған ариматиялық Жүсіп есімді бай адам келді.

⁵⁸ Пилатқа барып, Исаның денесін сұрап алды. Сонда Пилат оған денені беруді бұйырды.

⁵⁹ Сөйтіп, денені алған Жүсіп оны таза бәтеске орап,

⁶⁰ Оны жартастан жаңадан ойып жасап қойған қабіріге апарып қойды да, бір үлкен тасты домалатып әкеліп, қабірдің аузын жауып, кетіп қалды.

⁶¹ Сол күні мағдалалық Мәрия мен өзге Мәриям да қабірге қарама-қарсы жерде отырған болатын.

⁶² Келесі күні, яғни дайындық күні өтіп кеткеннен кейін, бірінші бас қызметкерлер мен фарисейлер жиналып, Пилатқа:

⁶³ -Мырза, ана өтірікшінің тірі кезінде: «Үш күннен кейін қайта тірілемін», - дегені есімізге түсті.

⁶⁴ Сондықтан үшінші күнге дейін қабірді күзетуге бұйрық бер, әйтпесе Оның шәкірттері келіп, Оны ұрлап алып, халыққа: «Ол өлімнен қайта тірілді», -деп жүрер. Сонда соңғы өтірік алдыңғыдан да жаман болады, - десті.

⁶⁵ Пилат оларға: -Күзетшілерің бар, өз білгендеріңше күзете беріңдер, - деді.

⁶⁶ Олар тасқа мөр басып, қабірді бекітіп, қабірдің алдына күзет қойып қойды.