Матай 26 - Zhana Osiet

¹ Иса сөзін аяқтағаннан кейін, шәкірттеріне былай деді:

² -Сендер екі күннен кейін Құтқарылу мейрамы болатынын білесіңдер, сонда Адамның Ұлын айқышқа шегелеу үшін ұстап береді.

³ Сол кезде Қайафа атты бірінші бас қызметкердің ауласына бас қызметкерлер мен елдің ақсақалдары жиналды.

⁴ Олар бірге кеңесіп, Исаны қулықпен ұстап алып, өлтірмек болып шешті.

⁵ Бірақ олар: -Халықтың арасында бүлік шығып кетпесін, мұны мейрам кезінде істемеу керек, - десті.

⁶ Иса Бетанияда алапеспен ауыратын Шимонның үйінде болған еді.

⁷ Қыш ыдысқа өте қымбат мира майын құйып алған бір әйел жақындап келіп, оны жантайып жатқан Исаның басына құя бастады.

⁸ Мұны көрген шәкірттері: -Мұндай ысырапшылдықтың не керегі бар?

⁹ Мұны қымбат бағаға сатып жіберіп, кедейлерге беруге болатын еді ғой, - деді.

¹⁰ Мұны байқаған Иса оларға: -Неге әйелді жазғырып тұрсыңдар? Ол Маған жақсылық жасап жатыр.

¹¹ Өйткені кедейлер әрқашан да сендердің араларыңда, ал Мен әрқашан сендермен бірге болмаймын.

¹² Ол Менің денеме осы мира майын құйып, Мені жерлеуге дайындады.

¹³ Сендерге шындықты айтайын: бүкіл әлемде, осы Ізгі хабар жарияланған жерде, мына әйелдің істеген ісін еске алып, айтатын болады, - деді.

¹⁴ Сол кезде Яһуда Исқариот есімді он екі шәкіртінің бірі бірінші бас қызметкерлерге барып:

¹⁵ -Мен Оны сендерге ұстап берсем, маған не бересіңдер? -деді. Олар отыз күміс теңгені оған ұсынды.

¹⁶ Ол сол кезден бастап, Оны ұстап берудің ыңғайлы сәтін іздей бастады.

¹⁷ Ашымаған нан мейрамының бірінші күні Исаға шәкірттері келіп: -Құтқарылу мейрамында Саған жейтін тамақты қай жерге дайындағанымызды қалайсың? - деді.

¹⁸ Сонда Иса оларға былай деді: -Қалаға барып, сол бір адамға: «Ұстазымыз уақыттың жақындағанын айтты және Ол Өз шәкірттерімен бірге Құтқарылу мейрамын сенің үйіңде атап өткізгісі келеді», - деп айтыңдар.

¹⁹ Сөйтіп, шәкірттері Құтқарылу мейрамының тамағын Иса оларға тапсырғандай дайындады.

²⁰ Кеш батқанда Иса он екі шәкіртімен бірге үстел жанында жантайып жатты.

²¹ Тамақ ішіп отырғанда Иса оларға: -Сендерге шындықты айтамын: сендердің араларыңдағы біреу Мені ұстап береді, -деді.

²² Бұған қатты күйзелген олар: -Сол мен емеспін бе, Ием? - деп әрқайсысы Исадан сұрай бастады.

²³ Иса оларға: -Менімен бірге кім қолын табаққа салса, сол Мені ұстап береді.

²⁴ Адам Ұлы Өзі туралы Жазбада қалай жазылса, солай жүріп келеді. Бірақ Адам Ұлын ұстап берген адам қасіретке қалады, сол адамның мүлдем туылмағаны жақсы болар еді, - деді.

²⁵ Оны ұстап бермекші болған Яһуда да: -Ұстаз, сол мен емеспін бе? -деп сұрады. -Мұны Өзің айтып тұрсың, -деді Иса.

²⁶ Олар тамақ ішіп отырған кезде, Иса нанды алып, бата берді де, шәкірттеріне бөліп беріп: -Мынадан алып жеңдер, бұл - Менің денем, - деді.

²⁷ Содан кейін тостағанды алып, ризашылығын білдіріп, шәкірттеріне: - Мынадан да бәрің ішіңдер,

²⁸ өйткені көптеген адамдардың күнәларын кешіру үшін, бұл - жаңа келісім ретінде төгілетін Менің қаным.

²⁹ Сендерге айтарым: Менің Әкемнің Патшалығында сендермен бірге жаңасын ішетін уақытқа дейін, осы жүзім бұтасының жемісінен татпаймын, - деді.

³⁰ Содан кейін олар мадақтау жырын айтып, Зәйтүн тауына көтерілді.

³¹ Сонда Иса оларға: -Сендер осы түні бәрің Менен бас тартып кетесіңдер, өйткені: «Бақташысын ұрып өлтіремін, сонда отардағы қойлары бытырап кетеді», -деп жазылған.

³² Алайда қайта тірілген соң, Мен сендерден бұрын Ғалилеяға барамын, - деді.

³³ Петір: -Егер де Сенен бәрі бас тартып кететін болса да, Мен сенен ешқашан бас тартпаймын, -деп жауап берді.

³⁴ Иса оған: -Саған шындықты айтайын: осы түні әтеш шақырмай тұрып, сен Менен үш рет танасың, - деді.

³⁵ Петр Оған: -Егер маған Сенімен бірге өлу керек болса да, Сенен танбаймын, -деді. Басқа шәкірттері де осыны айтты.

³⁶ Осыдан кейін Иса олармен бірге Гетсимани деген жерге келген соң, шәкірттеріне: -Мен барып сиынып келейін, осы жерде отыра тұрыңдар, - деді.

³⁷ Ол Өзімен бірге Петір мен Зебедейдің екі ұлын ертіп алды. Ол күйзеліп, қатты қинала бастады.

³⁸ -Менің жаным күйзеліп, өлім алдында тұр, осында Менімен бірге қалыңдар әрі сергек болыңдар, -деді оларға.

³⁹ Одан кейін сәл алға жүрді де, етпетінен жығылып, былай деп сиынды: -Әкетайым Менің, егер де мүмкін болса, осы тостаған Менен айналып өтсінші, алайда Менің қалауым емес, тек Сенің қалауың болсын.

⁴⁰ Сөйтіп, шәкірттеріне келгенде, олардың ұйықтап жатқандарын көріп, Петірге: -Сендер, тым болмаса, бір сағат сергек болып, Менімен бірге отыра алмадыңдар ма?

⁴¹ Азғырылуға берілмеу үшін, сергек болып сиыныңдар, өйткені рух дайын болғанымен, тән әлсіз, - деді.

⁴² Осыдан кейін екінші рет тағы барып, былай деп сиынды: -Әкетайым Менің, егер де сол азап шегу тостағаны Мен ішпей айналып өтпейтін болса, онда Сенің еркің орындалсын, - деді.

⁴³ Қайтып келгенде, шәкірттерінің әлі ұйықтап жатқандарын көрді, өйткені оларды ұйқы басқан еді.

⁴⁴ Оларды қалдырды да, Иса үшінші рет тағы сол сөздермен сиынды.

⁴⁵ Содан кейін шәкірттеріне қайтып келіп: -Демек, ұйықтап, демалып жатырсыңдар ма? Міне, Адам Ұлын күнәкарлардың қолына ұстап беретін уақыт таяп қалды, -деді.

⁴⁶ -Міне, Мені ұстап беруші жақындап қалды. Тұрыңдар, жүрейік, - деді.

⁴⁷ Ол әлі де сөйлеп тұрған кезде, он екі шәкіртінің бірі Яһудамен бірге бірінші бас қызметкерлер мен елдің ақсақалдары атынан жасақталған үлкен топ та келіп жетті.

⁴⁸ Сонда ұстап беруші келіскен белгі бойынша: -Мен кімді сүйсем, Ол-Соның Өзі, Оны ұстап алыңдар, -деп алдын ала айтып қойған болатын.

⁴⁹ Ол сол сәтте Исаға жақын келіп: -Ұстаз, амансың ба? -деп Оны сүйді.

⁵⁰ Иса оған: -Достым, осыған бола келдің ғой, -деді. Сол сәтте олар Исаға жақындап, қолынан ұстап алды.

⁵¹ Сонда Исамен бірге болғандардың бірі семсерін суырып алды да, яһудей басшысының құлына сілтеп қалып, оның құлағын шауып түсірді.

⁵² Сонда Иса: -Семсеріңді орнына сал, семсер ұстағандардың бәрі семсерден өледі.

⁵³ Әкемнен он екі легионнан артық періштелерін жіберуін сұрай алмайды деп ойлайсың ба?

⁵⁴ Солай істейтін болсам, Жазбада осылай болуға тиіс деп айтылғандар қалай орындалады? - деді.

⁵⁵ Содан кейін Иса әлгі топталып тұрғандарға: -Сендер Мені ұстау үшін семсермен және найзамен қаруланып, қарақшыға қарсы шыққандай келдіңдер ме? Күнде ғибадатханада тәлім беріп отырғанымда Мені ұстамадыңдар.

⁵⁶ Демек, осының бәрі пайғамбарлардың Жазбалары орындалуы үшін дәл осылай болды, -деді. Сол сәтте шәкірттерінің бәрі Оны тастап, қашып кетті.

⁵⁷ Исаны ұстап алғандар Оны бірінші бас қызметкер Қайафаға алып барды, сол жерде Таурат заңын зерттеушілер мен ақсақалдар да жиналған болатын.

⁵⁸ Петір Оның артынан алыстау жүріп отырып, бірінші бас қызметкердің ауласына дейін ілесіп барды. Соңына дейін не болатынын көру үшін ішке кіріп, күзетшілермен бірге отырды.

⁵⁹ Бірінші бас қызметкерлер мен бүкіл жоғарғы кеңестің өкілдері (синедерион) Исаны өлтіру үшін, Оған қарсы жалған куәгерлерді іздестірді.

⁶⁰ Алайда келген көпшілік арасынан ешқандай да жалған куәлік берушілерді таба алмады. Ең соңында екеуі келіп:

⁶¹ -Бұл Адам: «Құдайдың ғибадатханасын бұзып, үш күнде тұрғыза аламын», - деді.

⁶² Сонда бірінші бас қызметкердің бірі орнынан тұрып: -Ешқандай жауабың жоқ па? Мына екеуі Саған қарсы не деп куәлік беріп тұр? - деді.

⁶³ Иса үндеген жоқ. Сонда әлгі бірінші бас қызметкер Оған: -Тірі Құдайдың атымен ант етіп сұраймын, егер Сен Құдайдың Ұлы Мәсіх болсаң, соныңды бізге айт, -деді.

⁶⁴ Иса: -Сен өзің айтып тұрсың! -деді оған, -бірақ сендерге айтамын: «Осы уақыттан бастап, Адам Ұлының Құдіреті Күштінің оң жағында отырғанын және Оның көкте бұлттарда келе жатқанын көресіңдер!» - деді.

⁶⁵ Сонда бірінші бас қызметкер өз киімін айыра жыртып жіберіп: -Құдайға тіл тигізіп тұр! Енді куәгерлердің қажеті қанша? Қараңдар, қазір ғана тіл тигізгенін сендер естідіңдер!

⁶⁶ Енді қалай ойлайсыңдар? -деді. Олар: -Өлуге тиіс, -деп жауап берді.

⁶⁷ Сол кезде Исаның бетіне түкіріп, жұдырықпен ұрып, кейбіреулері Оны шапалақпен соғып:

⁶⁸ -Мәсіх, пайғамбар болсаң, бізге айтшы! Кім Сені ұрды? -деп сұрады.

⁶⁹ Петір ауланың сыртында отырған болатын, сонда Оған бір қызметші әйел келіп: -Сен де ғалилеялық Исамен бірге болғансың, - деді.

⁷⁰ Петір бәрінің көзінше: -Не айтып тұрғаныңды білмеймін, - деп мойындамады.

⁷¹ Оның қақпадан шығып бара жатқанын көрген сол жердегі басқа бір әйел де: -Бұл да Назареттік Исамен бірге болған, - деді.

⁷² Сонда Петір тағы да: -Ол адамды білмеймін, -деп қарсылық білдірді.

⁷³ Біраз уақыт өткен соң, сол жерде тұрған басқа адамдар Петірге жақындап келіп: -Шынымен, сен де солардың бірісің, өйткені сенің сөйлегеніңнен-ақ анық көрініп тұр, -деді.

⁷⁴ Петір тағы да: -Мен бұл адамды білмеймін, -деп антсу ішті. Сол сәтте әтеш шақырды.

⁷⁵ Сол кезде Исаның: «Әтеш шақырғанша, сен Менен үш рет танасың», -деп айтқан сөзі Петірдің есіне түсті. Сонда ол сыртқа шығып, қатты өкініп жылады.