Матай 25 - Zhana Osiet

¹ Сол кезде Көктің Патшалығы қолдарына шамдарын алып, күйеу жігітті қарсы алуға шыққан он қызға ұқсас болады.

² Олардың бесеуі ақылсыз, ал бесеуі ақылды болатын.

³ Ақылсыздары шамдарын ғана алып, өздерімен бірге май алмай шықты.

⁴ Ақылдылары шамдарымен қоса өздерімен бірге ыдыспен май алып шығады.

⁵ Бірақ күйеу жігіт кешіккендіктен, бәрі қалғып, ұйықтап қалды.

⁶ Түн ортасында: «Міне, күйеу жігіт! Оны қарсы алыңдар!» -деп айғайлаған дауыс естіледі.

⁷ Сонда қыздардың бәрі оянып, шамдарын реткекелтіреді.

⁸ Ақылсыз қыздар ақылдыларына: «Бізге майларыңнан беріңдерші, өйткені шамдарымыз өшіп барады», - дейді

⁹ Ақылды қыздар бұған: «Бізге де, сендерге де жетпей қалмауы үшін, сатушыларға барып, өздеріңе май сатып алғандарың дұрыс», - деп жауап береді.

¹⁰ Олар май сатып алуға кеткенде, күйеу жігіт те келді. Сонда дайын тұрғандары Онымен бірге салтанатты үйлену тойына кіріп кетті де, есік жабылып қалады.

¹¹ Кейінірек әлгі сыртта қалған қыздар келіп: «Мырза! Мырза! Бізге есік ашшы!» - дейді.

¹² Күйеу жігіт оларға: «Сендерге шындықты айтайын: Мен сендерді білмеймін», - деп жауап береді.

¹³ -Сондықтан да сергек болыңдар! Менің қай күні, қай сағатта келетінімді білмейсіңдер, - деді.

¹⁴ -Бұл жағдай басқа елге кетерде қызметшілерін шақырып алып, өз меншігін оларға аманаттаған адамның ісі сияқты болады.

¹⁵ Олардың әрқайсысының қабілеттеріне сай, біреуіне-бес, басқасына-екі, ал үшіншісіне бір талантты беріп, кетіп қалады. Сол уақытта,

¹⁶ бес талант (бір талантта шамамаен 26 -36 кг салмақ болған) алғаны оны іске қосып, үстінен бес талант пайда табады.

¹⁷ Екі талант алғаны да дәл солай тағы екі талант пайда табады.

¹⁸ Ал бір талант алғаны жерді қазып, қожайыны берген күміс ақшаны тығып қояды.

¹⁹ Ұзақ уақыттан кейін, әлгі қызметкерлердіңқожайыны келіп, олардан есеп ала бастады.

²⁰ Сонда бес талант алғаны үстінен түскен бес талантты алып келіп: «Мырза, маған бес талант берілген болатын, қараңыз, міне, мен тағы бес талант пайда көрдім», -дейді.

²¹ Қожайыны оған: «Жарайсың! Жақсы да адал қызметшім, кішкентай істе сенімді болдың, енді сені үлкен іске қоямын, қожайыныңмен бірге қуан», - дейді.

²² Екі талант алған адам да келіп: «Мырза, маған екі талант берілген болатын, қараңыз, міне, тағы екі талант пайда көрдім», - дейді.

²³ Қожайын оған: «Жарайсың! Жақсы да адал қызметкерсің, кішкентай істе сенімді болдың, енді сені істің үлкеніне қоямын, қожайыныңмен бірге қуан», -дейді.

²⁴ Бір талант алған адам да келіп: «Мырза, Сенің екпеген жерден орып, шашпаған жерден жинайтын қатал адам екеніңді біліп,

²⁵ қорыққанымнан сенің маған берген талантыңды жерге тығып қойдым, міне, мынау-сенікі», - дейді.

²⁶ Сонда қожайыны оған: «Зұлым әрі қорқақ қызметші, екпеген жерден орып, шашпаған жерден жинайтынымды білдің бе?

²⁷ Сондықтан менің күмістерімді айырбастаушыларға апарып тастауың керек еді, мен қайтып келгенде, өзімдікін өсімімен қайтарып алар едім», - дейді.

²⁸ Сондықтан оның талантын алып, оны он таланты барға беріңдер.

²⁹ Себебі менде бар деген әркімге тағы да беріліп, ол молшылыққа ие болады. Ал жоқ дегеннен оның бардегені де алынып қойылады.

³⁰ Мына жарамсыз қызметкерді сыртқа, қара түнекке, лақтырып тастаңдар, сол жерде ол зар еңіреп жылап, бармағын тістеп, өкінетін болады», - деді.

³¹ Адам Ұлы Өз ұлылығымен және барлық періштелерімен бірге келіп, ұлылықпен Өз тағына отырған кезінде,

³² Оның алдына барлық тілде сөйлейтін халықтар (тайпалар, рулар) жиналатын болады, сонда Ол қой мен ешкіні бір-бірінен ажырататын бақташы сияқты адамдарды да бір-бірінен бөлетін болады.

³³ Қойларды Өзінің оң жағына, ешкілерді сол жағына тұрғызып қояды.

³⁴ Сонда Патша Өзінің оң жағындағыларға: «Менің Әкем жарылқағандар, әлем жаратылғаннан бері сендерге дайындалып қойған Патшалықтың мұрагері болыңдар, бері келіңдер!

³⁵ Мен ашыққан кезде, сендер Маған тамақ бердіңдер; шөлдеген кезімде Менің шөлімді қандырдыңдар; жат жерлік болып жүрген кезімде, Мені қабылдадыңдар;

³⁶ жалаңаш болғанда Мені киіндірдіңдер; ауырған кезде Менің қасымда болдыңдар; Мен абақтыда отырған кезімде Маған келдіңдер», - дейді.

³⁷ Сонда Оған әділдер: «Жаратқан Ие, қашан біз Сенің ашыққаныңды көріп, тамақ бердік немесе шөлдеген кезіңде шөліңді қандырдық?

³⁸ Қашан Сенің жат жерлік екеніңді көріп қабылдадық немесе жалаңаш болғаныңда киіндірдік?

³⁹ Қашан сенің ауырғаныңды көрдік немесе абақтыда отырғаныңда саған келдік?» - деп сұрады.

⁴⁰ Сонда Патша: «Сендерге шындықты айтайын:Менің мына кішкентай бауырларымның біреуіне не істеген болсаңдар, оны Маған да істегендерің», -деп жауап берді.

⁴¹ Одан кейін сол жақта тұрғандарға: «Менен аулақ кетіңдер, қарғыс атқандар, әзәзіл мен оның періштелеріне дайындалған тозақтың отына барыңдар!

⁴² Өйткені ашыққанымда Маған тамақ бермедіңдер; шөлдегенімде Менің шөлімді қандырмадыңдар;

⁴³ жат жерлік болғанымда Мені қабылдамадыңдар; ауырып және абақтыда отырған кездерімде Маған келмедіңдер».

⁴⁴ Сонда олар: «Ием, қашан Сенің ашыққаныңды немесе шөлдегеніңді, немесе жат жерлік болғаныңды, немесе жалаңаш болып, ауырып, абақтыда болғаныңды көріп, Саған қызмет етпедік?» - деп сұрайды.

⁴⁵ Сонда Ол: «Сендерге шындықты айтайын: осы кішкентайлардың біреуіне қажеттіні істемегендерің оны Маған да істемегендерің», - деп жауап қайырды.

⁴⁶ Сөйтіп, олар мәңгілік жазаға тартылатын болса, ал әділдер мәңгілік өмірге аттанады.