Матай 24 - Zhana Osiet

¹ Иса ғибадатханадан шығып келе жатқанда, шәкірттері ғибадатхананың ғимаратын Оған көрсету үшін, қасына келді.

² -Сендер мынаның бәрін көріп тұрсыңдар ма? -деді Иса. Сендерге шындықты айтамын: мына тастың үстіндегі тастардың бірі де қалмай, бәрі қиратылатын болады.

³ Иса Зәйтүн тауында отырған кезінде, шәкірттері оңаша келіп: -Осы уақыттың және Сен келетін кезең мен заманның ақырында болатын белгінің қандай болатынын бізге айтып берші, - деп сұрады.

⁴ Иса оларға: -Сендерді біреу алдап кетпесін, байқаңдар, -деді.

⁵ Өйткені көптеген адам Менің атымнан келіп: «Мен Мәсіхпін», - деп көпшілікті алдайды.

⁶ Болып жатқан соғыстар мен алда болатын әскери қақтығыстар жайында еститін боласыңдар, бірақ үрейленбеңдер. Бұлардың бәрі болуға тиісті нәрселер, алайда бұл әлі де ақырғы кезең емес.

⁷ Өйткені халық халыққа, патшалық патшалыққа қарсы көтеріліп, кейбір жерлерде аштықтар мен жерсілкіністері де болады.

⁸ Осының бәрі тек азапты толғақтың бастамасы ғана.

⁹ Сол кездері сендерді қинап, қорлап, өлтіреді және Менің атыма бола сендерді барлық халықтар жеккөретін болады.

¹⁰ Сол кезде көбі сенімдерінен бас тартып, бір-бірін сатып, бірін-бірі жеккөреді.

¹¹ Көптеген жалған пайғамбарлар пайда болып, көпшілікті алдап, адастырады.

¹² Зұлымдық тым көбейіп кеткендіктен, көбінің сүйіспеншілігі суып кететін болады,

¹³ ал соңына дейін шыдаған құтқарылады.

¹⁴ Осы Патшалық туралы Ізгі хабар куәлік ретінде бүкіл әлем халықтарына жарияланады, сонда ғана бәрінің ақыры болады.

¹⁵ Егер сонда Даниял пайғамбарда айтылған «киелі орынды арамдайтын иесіз бос қалдырған жексұрын, жиренішті нәрсені көрсе»,

¹⁶ сол кезде Яһудеяда болғандар тауға қашсын.

¹⁷ Үйдің төбесінде болған адам үйден бір нәрсе алуға төмен түспесін,

¹⁸ кім далада болса, қайта келіп, шапанын да алмасын.

¹⁹ Сол күндері құрсағында сәбиі барлар мен бала емізетіндер қасіретке қалады.

²⁰ Сендердің қашатын уақыттарың не қыста, не сенбі күндері болмасын деп мінәжат етіңдер,

²¹ себебі сол кезде әлем басталғаннан осы күнге дейін болып көрмеген әрі ешқашан болмайтын орасан зорзобалаң болады.

²² Егер де сол күндердің мерзімі қысқартылмағанда, бірде-бір пенде құтқарыла алмас еді, алайда таңдалып алынғандар үшін, сол күндер қысқартылады.

²³ Сол кезде біреу сендерге: «Міне, Мәсіх мұнда» немесе «Әне, анда» десе, сенбеңдер,

²⁴ өйткені жалған мәсіхтер мен жалған пайғамбарлар шығып, үлкен кереметтер мен ғажаптар жасап, мүмкіндігінше таңдалғандарды адастыратын болады.

²⁵ Міне, сендерге мұны алдын ала айтып отырмын.

²⁶ Егер сендерге: «Ол анда, айдалада», -деп айтса, шықпаңдар, немесе: «Ол ана бөлмеде», -десе де сенбеңдер,

²⁷ себебі шығыстан шыққан найзағай оты жарқ етіп батысқа қалай жетсе, Адам Ұлының қайтып келуі де дәл солай болады.

²⁸ Өлексе қайда болса, құзғындар сонда жиналады.

²⁹ Сол зобалаң күндерден кейін «күн қарауытып, ай жарық болмай, көктен жұлдыздар құлап, көктегі күштер шайқалады».

³⁰ Сонда Адам Ұлының бейнесі Көктен көрінеді, сол кезде жердегі барлық рудың тайпалары қорқыныштан зар илеп жылап, өкініштен кеуделерін ұратын болады, олар Адам Ұлының құдіретті күшпен және ұлы салтанатпен бұлтпен көкте келе жатқанын көреді.

³¹ Ол Өз періштелерін жібереді, олар кернейдің зор үнімен Оның таңдап алғандарын көктің ана шеті мен бұл шетінен жинап алады.

³² Өздеріңе үлгі болатын сабақты інжір ағашынан алыңдар, оның бұтақтары бүр жарып, жапырақтарын жая бастағанда, жаздың жақын екенін білесіңдер.

³³ Осының бәрін көздеріңмен көргенде, Оның есіктің алдына келгендей таяп қалғанын білесіңдер.

³⁴ Сендерге шындықты айтамын: осы ұрпақ жойылмай тұрып, осының бәрі орындалады.

³⁵ Аспан мен жер жойылса да, Менің сөздерім жойылмайды.

³⁶ Сол күн, сол сағат жайлы ешкім: не көктегі періштелер де, не Ұл да білмейді, бұл тек бір Әкеге ғана мәлім.

³⁷ Нұхтың кезіндегі күндер қандай болса, Адамның Ұлының келуі де сондай болады.

³⁸ Адамдар топан судың алдында, Нұх кемеге кіретін күнге дейін ішіп-жеп, үйленіп, тұрмыс құрып жатты,

³⁹ олар топан су басып, бәрін құртқанға дейін не болатынын түсінбеді. Адам Ұлының келуі де дәл солай болады.

⁴⁰ Сол кезде егістікте жұмыс істеген екеудің бірі алынып, екіншісі қалдырылатын болады,

⁴¹ диірмен тартып отырған екі әйелдің бірі алынып, екіншісі қалдырылатын болады.

⁴² Сондықтан сергек болыңдар, өйткені сендер Иелеріңнің қай күні келетінін білмейсіңдер.

⁴³ Мынаны білесіңдер: егер де үй иесі ұрының қашан келетінін білсе, онда ол сергек болып, оған үйдің іргесін қазып кіруіне жол бермес еді.

⁴⁴ Осылай сендер де дайын болыңдар, өйткені Адам Ұлы сендер күтпеген уақытта келеді.

⁴⁵ Қожайыны өз қызметшілерінің тамақтарын уақытымен беруге тағайындап кеткен сенімді және ақылды қызметші кім?

⁴⁶ Егер қожайыны келген сәтте қызметшісінің тура осылай істеп жүргенін көрсе, сол қызметші бақытты.

⁴⁷ Сендерге шындықты айтайын: сонда ол сол қызметшіні бүкіл меншігінің үстінен қарайтын адам етіп қояды.

⁴⁸ Егер де ол жаман қызметші болып, өз жүрегінде: «Менің ием кешігіп жатыр», - деп.

⁴⁹ өзімен қызметтес адамдарды ұрып-соғып, маскүнемдермен бірге ішетін болса,

⁵⁰ онда қожайыны сол қызметші күтпеген күні және ол білмейтін уақытта келеді.

⁵¹ Сонда оны шауып, екіге бөліп, екіжүзділер қатарына қосады, ол сол жерде зар еңіреп жылап, тісін қайрайтын болады.