Матай 22 - Zhana Osiet

¹ Иса тағы да астарлы әңгімелерді қолданып, былай деді:

² -Көктегі Патшалық өз ұлына салтанатты түрде үйлену тойын өткізуге дайындалған бір патшаның іс-әрекетіне ұқсас.

³ Ол қызметшілерін тойға шақырылғандарды шақыру үшін жібереді, бірақ олардың келгісі келмейді.

⁴ Сонда ол тағы да басқа қызметшілерін жұмсап: «Шақырылғандарға салтанатты тойдың асы дайын, өгіздер мен бордақыланған малдар сойылып, бәрі дайын тұр, тек салтанатты тойға келсін деп айтыңдар», - дейді.

⁵ Шақырылғандар болса, бұған еш мән бермей, бірі өзінің жеке меншік жеріне, бірі өзінің саудасына кетіп қалады.

⁶ Басқалары, тіпті, патшаның жіберген қызметшілерін ұстап алып, қорлап, өлтіріп тастайды.

⁷ Бұған қатты ашуланған патша өз әскерін жіберіп, әлгі кісі өлтірушілердің көзін жойып, олардың қалаларын өртеп жібереді.

⁸ Содан кейін өз қызметшілеріне: «Салтанатты үйлену тойы дайын болғанмен, оған шақырылғандар соған лайықты болмай шықты.

⁹ Енді жол торабына барып, кімді кездестірсеңдер солардың бәрін салтанатты үйлену тойына шақырыңдар», -дейді.

¹⁰ Қызметшілер жолға шығып, кездескен адамдардың зұлымын да, мейірімдісін де жинағанда, салтанатты той болатын орын дастарқан басына жайғасқан қонақтарға лық толды.

¹¹ Жайғасқан қонақтарды көруге кірген патша салтанатты үйлену тойына лайықсыз киім киген бір адамды байқап қалып:

¹² «Достым, -деді патша, -салтанатты үйлену тойына лайықты киім кимей, мұнда қалай кірдің?» -дейді. Ол ештеңе дей алмады.

¹³ Сонда патша қызметшілеріне: «Оның аяқ-қолын байлап, сырттағы қара түнекке лақтырыңдар, сол жерде зар еңіреп жылап, бармағын тістейтін болады».

¹⁴ Шақырылғандар көп, бірақ таңдалғандар аз, -деді Иса.

¹⁵ Осыдан кейін фарисейлер Исаны қалай да сөзінен ұстау жайында ақылдасты.

¹⁶ Олар өз шәкірттерін билеуші Иродтың жақтастарымен бірге Исаға жібереді. -Ұстаз, Сен -әділеттісің және Құдай жолын шындықпен үйретесің. Біреуге жағымпаздануды білмейсің әрі ешкімді алаламайсың.

¹⁷ Енді бізге мынаны айтшы: -Рим патшасына салық төлеуге бола ма, жоқ па? Сен қалай ойлайсың? - деді.

¹⁸ Олардың арам ойларын біле қойған Иса: -Әй, екіжүзділер! Сендер Мені сөзімнен ұстағыларың келіп тұр ма?

¹⁹ Маған салық төлейтін тиынды көрсетіңдерші, -деді. Олар Оған бір динарий алып келді.

²⁰ Иса олардан: -Мұнда кім бейнеленген және кімнің аты жазылған? - деп сұрады.

²¹ -Патшанікі, -деп жауап берді олар. -Онда патшаға тиесіліні патшаға, ал Құдайға тиесіліні Құдайға беріңдер, -деді Иса.

²² Бұл жауап оларды ойландырып тастады, дереу Исаны тастап, кетіп қалды.

²³ Өлгендермен ешқашан қайта тірілу болмайтынын айтып жүрген саддукейлер сол күні Исаға келеді.

²⁴ -Ұстаз, егер де біреу артына ұрпақ қалдырмай қайтыс болып кетсе, ұрпағын жалғастыру үшін оның әйеліне бауыры үйленуін Мұса айтып кеткен екен, - деді олар.

²⁵ Бірде ағайынды жеті жігіт болыпты, біріншісі үйленіп, ұрпақ көрмей жатып қайтыс болып кетті, ол әйелін бауырына қалдырды.

²⁶ Осылай екіншісімен де, үшіншісімен де, барлық жеті ағайындылармен де тура солай болды.

²⁷ Бәрінің соңында әлгі әйел де қайтыс болады.

²⁸ Сонымен, қайта тірілген кезде, сол әйел осы жетеуінің қайсысына әйел болады? Өйткені бәрі оның күйеуі болды ғой, - деді.

²⁹ Иса оларға былай деп жауап берді: -Не Киеліжазбаны, не Құдайдың күшін білмегендіктен, адасып жүрсіңдер.

³⁰ Себебі адамдар қайта тірілген кезде не үйленбейді, не күйеуге де шықпайды, тек көктегі періштелер сияқты болады.

³¹ Сендер өлгендердің қайта тірілуіне байланысты Құдайдың былай деп айтқанын оқымадыңдар ма?

³² «Мен-Ыбырайымның Құдайымын, Ысқақтың Құдайымын, Жақыптың Құдайымын», -деген. Ол -өлілердің емес, тірілердің Құдайы.

³³ Мұны тыңдап тұрған халық Оның тәліміне қайран қалды.

³⁴ Саддукейлердің аузын ашырмағанын естіген фарисейлер енді бірігіп келіп, Оның қасына жиналды.

³⁵ Бір Заң мұғалімі Оны тағы сынамақ болып:

³⁶ -Ұстаз, Заңның қай өсиеті ең маңызды? -деп сұрады.

³⁷ Иса оған: -«Құдай Иеңді шын жүрегіңмен, бүкіл жан -дүниеңмен және бар ақыл -ойыңмен сүй!» -деп жауап берді.

³⁸ - Бұл-ең бірінші және ең маңызды өсиет.

³⁹ Екіншісі де осыған ұқсас: «Өзіңді қалай сүйсең, жақыныңды да солай сүй!»

⁴⁰ Бүкіл Таурат заңы мен пайғамбарлар ілімі осы екі өсиетке негізделіп тұр, - деді.

⁴¹ Иса сол жиналған фарисейлерден:

⁴² -Мәсіх туралы не ойлайсыңдар? Ол кімнің Ұлы? -деп сұрады. Олар: - Дәуіттің Ұлы, - деді.

⁴³ Сонда Иса оларға: Ендеше, Рухқа кенелген Дәуітнеге Оны «Ием» деп атаған?

⁴⁴ «Жаратқан Ием Менің Иеме: -Сенің жауларыңды табаныңның астына салып бергенімше, оң жағымда отыр», -деп не себептен айтқан?

⁴⁵ Егер де Дәуіт Оны «Ием» деп атаса, қалайша оған ұлы ғана болады? - деді.

⁴⁶ Оған ешкім бір сөз айтып, жауап бере алмады, сол күннен бастап, сұрақ қоюға да батылдары бармады.