Матай 21 - Zhana Osiet

¹ Олар Иерусалимге жақындап, Зәйтүн тауында орналасқан Бетфаге жеріне келгенде, Иса екі шәкіртіне тапсырма берді:

² -Қарсы алдарыңда тұрған ауылға барыңдар, солжерде байлаулы тұрған есекті және оның тайқарын көресіңдер, оларды шешіп, Маған алып келіңдер.

³ Егер де біреу сендерден бір нәрсе сұрап жатса: -Иемізге қажет, - деп айтыңдар, олар сол сәтте-ақ жібере салады.

⁴ Осылайша, пайғамбар айтқан мына сөз орындалады:

⁵ «Сионның қызына айтыңдар, міне, сенің кішіпейіл Патшаң тайқарын ерткен есекке мініп, саған келе жатыр».

⁶ Шәкірттері бәрін дәл Исаның тапсырғанындай істеді.

⁷ Олар есекті тайқарымен бірге алып келді де, үстіне сырт киімдерін жапты, Иса олардың киімдері жабылған есекке мінді.

⁸ Жиналған халықтың көпшілігі киімдерін жолға төседі, ал басқалары ағаштың көктеген бұтақтарын кесіп алып, жолға төседі.

⁹ Исаның алдынан, артынан еріп келе жатқан халық дауыстап: -Дәуіттің Ұлына Осанна! Иеміздің атымен Жарылқанған келе жатыр! Заңғар Көкке Осанна! -деп айқайлады.

¹⁰ Иса Иерусалимге келіп кіргенде, бүкіл қала толқып: -Бұл Кім Өзі ? - десті.

¹¹ Сонда барша халық: -Бұл -Ғалилеядағы Назареттен шыққан Иса пайғамбар! - деді.

¹² Иса ғибадатханаға кірді, ол жердегі бүкіл сатушылар мен сатып алушыларды ғибадатханадан қуып шықты. Ақша айырбастаушылардың үстелдерін және кептерді сатушылардың орындықтарын аударып тастап, оларға:

¹³ -Киелі жазбада: «Менің үйім мінажат ететін үй болады», -деп жазылған. Ал сендер оны қарақшыларордасына айналдырғансыңдар, - деді.

¹⁴ Иса ғибадатханада болған кезде, зағиптар мен ақсақтар Оның қасына келді, Ол бәрін сауықтырды.

¹⁵ Оның жасаған кереметтерін көрген және ғибадатханада балалардың: -Дәуіттің Ұлына Осанна! -деп айтқанын естіген яһудей дінінің бас қызметкерлері мен Таурат заңын зерттеушілер бұған ашуланды.

¹⁶ Сонда олар Исаға былай деді: -Мыналардың не деп айтқанын естіп тұрсың ба? -Иә, -деді Иса. «Сәбилер мен емшектегі нәрестелер ауыздарымен Сені мадақтайтын болады», - деп жазылғанын ешқашан оқымадыңдар ма?

¹⁷ Иса оларды қалдырды да, қаладан шығып, Бетанияға барды, сонда түнеді.

¹⁸ Таңертең ерте қалаға қайтып келе жатып, қарны ашқанын сезеді.

¹⁹ Жол бойында тұрған жалғыз інжір ағашын көріп, жақындап барды, тек жапырағынан басқа еш нәрсе таппаған соң: «Енді бұдан былай ешқашан сенің жемісің болмасын!» -деді. Әлгі інжір ағашы сол сәтте солып қалды.

²⁰ Мұны көрген шәкірттері: -Мына інжір ағашы қалайша бірден солып қалды? - деп таңғалысты.

²¹ Иса оларға былай деп жауап береді: -Сендерге шындықты айтайын: егер де еш күмәнданбай сенетін болсаңдар, тек інжір ағашына ғана емес, мына тауға да: «Көтеріліп, теңізге тастал!» десеңдер, сол орындалады.

²² және сеніммен мінажат етіп, не сұрасаңдар, соны аласыңдар, - деді.

²³ Бірде Иса ғибадатханада тәлім беріп тұрғанда,бірінші бас қызметкерлер мен ақсақалдар келіп Оған: -Осыны қандай билікпен істеп жүрсің? Осы билікті Саған кім берді? - деп сұрады.

²⁴ Иса оларға: -Мен де сендерден бір нәрсе сұрайын, егер де соған жауап берсеңдер, Мен де сендерге осыларды қандай билікпен істеп жүргенімді айтамын.

²⁵ -Жақияның батырып суға шомылдыруы қайдан келді? Көктен бе, әлде адамдардан ба? -деді. Олар өзара талқылай бастады: -Егер: «Көктен», -деп айтсақ, онда: «Оған неге сенбедіңдер?» - деп айтады.

²⁶ Ал егер де: «Адамдардан», -деп айтайық десек, мына халықтан қорқып тұрмыз, өйткені олар Жақияны пайғамбар деп санайды.

²⁷ Сондықтан олар Исаға: -Білмейміз, -деп жауап берді. Сонда Иса да оларға: -Онда Мен де сендерге осыны қандай билікпен істеп жүргенімді айтпаймын, - деді.

²⁸ -Сендер мынаған не айтар едіңдер? Бір адамның екі баласы болыпты. Біреуіне келіп: -Балам, бүгін жүзім бағына барып жұмыс істеп келші, - дейді.

²⁹ Басында ол: «Бармаймын», -дейді де, кейінірек ойланып, жүзім бағына барады.

³⁰ Әкесі екінші ұлына да келіп, осыны айтады. Ол: «Иә, мырза, барамын», - дегенмен, бармайды.

³¹ Осы екеуінің қайсысы әкесінің еркін орындады? -деп сұрады. Олар: -Біріншісі, -деп жауап берді. Сол кезде Иса оларға: -Сендерге шындықты айтамын: Құдай Патшалығына сендерден бұрын салық жинаушылар мен жезөкшелер кіретін болады.

³² Өйткені Жақия сендерге әділетті жолмен келді, сендер оған сенбедіңдер, ал салықшылар менжезөкшелер сенді. Сендер оны көріп тұрсаңдар да, тәубеге келмедіңдер, сенбедіңдер.

³³ Тағы да бір астарлы әңгімені тыңдаңдар. Бір жер иесі жүзім отырғызып, оны айналдыра қоршайды, шырынды сүзетін шұңқыр қазып, мұнара тұрғызады. Бәрін жүзімшілерге жалға тапсырып, өзі алыс бір елге кетіп қалады.

³⁴ Жеміс беретін мезгіл таяғанда, өз үлесін алу үшін, жүзімшілерге өз қызметшілерін жібереді.

³⁵ Алайда жүзімшілер оның қызметшілерін ұстап алып, бірін ұрып, бірін өлтіріп, басқаларын таспен атқылайды.

³⁶ Жер иесі алдыңғыдан да көбірек басқа қызметшілерін жібереді, жүзімшілер оларға да соны істейді.

³⁷ Ақырында: «Менің ұлымнан ұялатын шығар», -деп, оларға өз ұлын жібереді.

³⁸ Жер иесінің ұлын көрген жүзімшілер: «Бұл мұрагер ғой! Жүріңдер, оны өлтіріп, мұрасына ие болайық!» -деп шешім қабылдайды.

³⁹ Оны ұстап алып, жүзімдіктің сыртына алып шығады да, өлтіріп тастайды.

⁴⁰ -Сонымен, жүзім бағының иесі келгенде, сол жүзімшілерге не істейді? - деп сұрады.

⁴¹ - Зұлымдарды жауыз әрекеттеріне бола көздерін жояды да, жүзім бағын жемісін уақытымен беретін басқа жүзімшілерге жалға береді, - деп жауап берді олар.

⁴² Сонда Иса былай деді: -Сенде р жазбадан:«Құрылысшылар жарамсыз деп санаған Тас енді басты Іргетасқа айналды. Бұл -Құдайдың ісі! Осыны көрудің өзі ғажап!» -деп жазылғанын ешқашаноқымап па едіңдер?

⁴³ Сондықтан да Құдай Патшалығы сендерден тартып алынады да, жеміс беретін басқа халықтарға берілетінін осы мысалдар арқылы айтып жатырмын.

⁴⁴ Кім Сол Тасқа құласа, күл-талқаны шығады, ал Сол Тас кімге құласа, соны басып қалады, - деді.

⁴⁵ Осы астарлы әңгімені тыңдап тұрған бірінші бас қызметкерлер мен фарисейлер Исаның өздері жайында айтып тұрғанын түсінді,

⁴⁶ Сол себепті олар Оны ұстап алғысы келді, бірақ Оны пайғамбар деп есептейтін халықтан қорықты.