Матай 20 - Zhana Osiet

¹ Көктегі Патшалық өзінің жүзім бағына жұмысшылар жалдау үшін таңертең ерте үйден шыққан адамға ұқсайды.

² Ол жұмысшылармен күніне бір динарий төлеуге келіседі де, оларды жүзім бағына жібереді.

³ Одан кейін ол сағат үштерде тағы да сыртқа шыққанда, сауда алаңында тұрған басқа жұмыссыз жүргендерді көріп:

⁴ «Сендер де Менің жүзім бағыма барыңдар, еңбектеріңді әділ төлеймін», - дейді оларға.

⁵ Олар да жүзім бағына кетеді. Жүзім бағының иесі сағат алты мен тоғыз шамаларында сыртқа шығып, тағы да солай істейді.

⁶ Сағат он бір шамаларында да сыртқа шығып, басқа да жұмыссыз тұрғандарды тауып алып, оларға: «Неге күні бойы жұмыссыз тұрсыңдар?» - дейді.

⁷ Олар: «Бізді ешкім жалдаған жоқ», -деп жауап береді. «Онда сендер де менің жүзім бағыма барыңдар», - дейді.

⁸ Кеш батқан кезде жүзім бағының иесі өзінің іс жүргізушісіне: «Жұмысшыларды шақырып, олардың соңғыларынан бастап, алғашқы келгендеріне дейін, еңбекақыларын бер», - дейді.

⁹ Сонда сағат он бірлер шамасында келгендер бір динариден алады.

¹⁰ Ал бірінші болып келгендер одан көбірек аламыз деген ойда болды, бірақ олар да бір динариден артық алмады.

¹¹ Олар солай еңбекақыларын алып алған соң, үй иесіне күңкілдей бастады:

¹² «Ең соңында келген мыналар бір сағат жұмыс істеді, күннің ауыртпалығы мен оның ыстығына төзген бізді олармен теңестіріп қойдың», - деді.

¹³ Ол жұмысшылардың біреуіне: «Достым, мен сені ренжіткен жоқпын! Менімен бір динарийге келіспеп пе едің?

¹⁴ Өз еңбекақыңды ал да, бара бер! Саған төлегенді соңғы келгендерге де бергім келіп тұр.

¹⁵ Менің өз мүлкімді қалауыма сай жұмасауыма болмай ма? Немесе Менің жасаған жақсылығым сенің қызғанышыңды оятты ма?»

¹⁶ Сонымен, соңғылары осылай алғашқы, ал алғашқы болғандар соңғылары болады, - деді.

¹⁷ Иерусалимге өрлеп бара жатқан жолда Иса он екі шәкіртін бөлек алып шығып, оларға мынаны айтты:

¹⁸ -Міне, Иерусалимге өрлеп барамыз, онда бірінші бас қызметкерлер мен Таурат заңын зерттеушілеріне Адамның Ұлын ұстап береді. Олар Оны соттап, өлімге кесіп,

¹⁹ қорлап, ұрып-соғып, айқышқа керіп шегелеу үшін, өзге ұлттың өкілдеріне тапсырады. Үшінші күні Ол қайта тірілетін болады, - деді.

²⁰ Сол кезде Зебедейдің ұлдарының анасы Одан бір нәрсе сұрау үшін, ұлдарымен бірге келіп, құрметпен басын иіп, тағзым етті.

²¹ Сонда Иса одан: -Не қалайсың? -деп сұрады. -Сенің Патшалығыңда менің мына екі ұлымның бірі оң жағыңа, бірі сол жағыңа отырады деп айтшы, - деді ол.

²² -Не сұрап тұрғандарыңды білмейсіңдер, -деді Иса. Маған ішуге дайындалған тостағаннан іше аласыңдар ма? -деп сұрады. Олар: - Ішеміз, - деді.

²³ -Әрине, Менің тостағанымнан ішесіңдер, ал Менің оң жағыма немесе сол жағыма Мен белгілегендер емес, керісінше, Менің Әкем дайындағандар отырады, - деді.

²⁴ Мұны естіп тұрған қалған он шәкірті, әлгі ағайынды екеуіне ашуланды.

²⁵ Иса оларды шақырып алып: -Жер бетіндегі өзге ұлттың басшылары халыққа үстемдік етеді, күштілері өз биліктерін жүргізеді.

²⁶ Сендер солай істемеңдер. Керісінше, кім билік жүргізгісі келсе, сол сендерге қызметші сияқты,

²⁷ ал кім бірінші боламын десе, сол сендерге құл іспетті қызмет етсін.

²⁸ Адамның Ұлы да Өзіне қызмет еткізу үшін емес, Өзі басқаларға қызмет етіп, адамзатты құтқару үшін, құн төлеп, Өз өмірін беруге келді, - деді.

²⁹ Олар Иерихоннан шыққанда, көптеген халық Оның соңынан ілесті.

³⁰ Жол бойында екі зағип адам отырған еді, олар Исаның өтіп бата жатқанын естіп: -Ием, Дәуіттің Ұлы, бізге рақым ете гөр! - деп айқай салды.

³¹ Адамдар оларға: -Айғайламаңдар! -деп тыйым салды. Олар бәрібір: -Ием, Дәуіттің Ұлы, бізге рақым ете гөр! -деп одан бетер айғайлады.

³² Сол кезде Иса тоқтап, оларды шақырып алып:-Менің сендерге не істегенімді қалайсыңдар? - деді.

³³ -Ием, көзіміздің ашылғанын қалаймыз! - деді олар.

³⁴ Оларға жаны ашыған Иса көздеріне қолын тигізді, сол сәтте олардың көздері ашылып, көретін болды. Олар да Исаның соңынан ерді.