Матай 19 - Zhana Osiet

¹ Иса осы сөздерін аяқтаған соң, Ғалилеяны тастап, Иорданның арғы бетіндегі Яһудея аймағына келді.

² Оның соңынан көптеген халық еріп жүрді, Ол сол жақта да оларды сауықтырды.

³ Исаны сынамақ болған фарисейлер: -Ер адамға әр түрлі себептермен әйелінен ажырасуына бола ма деп? - сұрады.

⁴ Иса олардан былай деп сұрады: -Жаратушы ең басында олардың бірін еркек, бірін әйел етіп жаратқанын оқымап па едіңдер?

⁵ «Сондықтан еркек әке-шешесін тастап, әйеліне қосылады, сонда екеуі бір дене болады.

⁶ Енді олар екеу емес, біртұтас бір дене, сондықтан Құдай қосқанды адам ажыратпасын», - деді.

⁷ Сонда олар Исаға: -Олай болса, Мұса неге ажырасу хатын беріп, әйелін жіберуге рұқсат берген? - деді.

⁸ -Өйткені сендердің жүректеріңнің қаттылығына бола, Мұса әйелдеріңмен ажырасуға рұқсат берген, бірақ әуел баста олай болмаған, - деді Иса оларға.

⁹ Сендерге айтарым: -Кімде -кім әйелінен тек неке адалдығын бұзғаны үшін емес, басқа бір себеппен ажырасып, басқа бір әйелге үйленетін болса, онда ол жыныстық азғындық жасайды, - деді.

¹⁰ Сонда шәкірттері: -Егер ер адамның әйелге қатысты міндеті осындай болса, онда үйленгеннен еш пайда жоқ қой, - десті.

¹¹ Иса оларға былай деп жауап берді: -Бұл сөзді әркім осы күйінде қабылдай бермейді, тек кімге арналған болса, солар ғана қабылдайды.

¹² Біреулер анасының құрсағынан некеге жарамсыз болып туылса, біреулерді адамдар солай істейді, ал үшінші біреулері Көктегі Патшалыққа бола некеден бас тартады. Бұл кімге қалай берілген болса, солайәрекет етсін.

¹³ Сол кезде Исаға қол қойып, мінажат еткізу үшін балаларды алып келіп жатты. Оларға шәкірттері тыйым салды.

¹⁴ Сонда Иса оларға: -Балаларды Маған жіберіңдер, олардың Маған келуіне кедергі жасамаңдар, өйткені Көктегі Патшалық осындайларға арналған, - деді.

¹⁵ Иса оларға қолын қойған соң, сол жерден кетіп қалды.

¹⁶ Бір адам Оған жақындап келіп: -Ұстаз, мәңгілік өмірге ие болу үшін қандай жақсылық істеуім керек? -деп сұрады.

¹⁷ Иса оған: -Менен жақсылық туралы неге сұрап тұрсың? Тек бір ғана жақсылық бар, егер де мәңгілік өмірге ие болғың келсе, берілген өсиеттерді орында, -деп жауап берді.

¹⁸ Сол адам: -Қандай өсиеттерді? -деп сұрады. Иса оған: «Кісі өлтірме, неке адалдығын бұзба, ұрлама, жалған куәлік айтпа,

¹⁹ ата-анаңды құрметте және өзіңді қалай сүйсең, маңайыңдағы адамды да солай сүй», - деді.

²⁰ -Осылардың бәрін жастайымнан орындап келемін, -деді жас жігіт, -сонда маған тағы не жетіспейді? -деп сұрады.

²¹ Иса оған: -Егер де кемелді болуды қаласаң, онда барып дүние -мүлкіңді сат та, кедейлерге үлестіріп бер, сонда қазынаң көкте болады. Өзің Менің соңымнан ер, -деді.

²² Осы сөзді естіген әлгі жас жігіттің еңсесі түсіп, кетіп қалды, себебі оның байлығы өте мол еді.

²³ Сонда Иса шәкірттеріне: -Сендерге шындығынайтайын: бай адамның Көктегі Патшалыққа кіруі өте қиын.

²⁴ Тағы да айтарым: -Бай адамның Құдай Патшалығына кіруінен гөрі, иненің көзінен түйенің өткені оңайырақ болады, - деді.

²⁵ Мұны естіген шәкірттері қатты қамығып: -Сонда кім құтқарылатын болады? - деп сұрады.

²⁶ Иса оларға қарап, былай деді: -Адамға бұл мүмкін емес болғанмен, алайда Құдайға бәрі де мүмкін.

²⁷ Петр Исаға: -Міне, біз бәрін қалдырып, тек Сенің артыңнан еріп жүрміз. Бізге бір нәрсе бола ма? - деді.

²⁸ Бұған Иса былай деп жауап берді: -Сендерге шындықты айтамын: Менің соңымнан еріп жүрген сендер жаңа дәуір туып, Адамның Ұлы Өз даңқына сай тағына отырған кезде, сендер де он екі тақта отырып, Исраилдің он екі руына сот жүргізетін боласыңдар.

²⁹ Ал Менің атыма бола өз үйін немесе бауырын, немесе әпкесін, немесе әкесін, немесе шешесін, немесе балаларын, немесе жерін тастап кеткен әркімге, солар жүз еседен беріледі және мәңгілік өмірге ие болады.

³⁰ Сол кезде осы дүниеде жоғарыда болғандардың көбі соңғысы, ал соңғы болғандары алғашқылары болып қалады, - деді.