Матай 18 - Zhana Osiet

¹ Сол уақытта шәкірттері Исаға келіп: -Көктегі Патшалықта ең үлкені кім болады? - деп сұрады.

² Сонда Ол бір баланы шақырып алып, ортаға тұрғызып қойып,

³ былай деді: -Сендерге шындықты айтамын, егер теріс ойларыңнан қайтып, осы балалар сияқты болмасаңдар, онда Көктегі Патшалыққа кіре алмайсыңдар.

⁴ Кім осы бала сияқты өзін төмен тұтса, сол Көктегі Патшалықта ең үлкені болады.

⁵ Егер де кімде -кім осындай бір баланы Менің атымнан қабылдаса, оның Мені де қабылдағаны.

⁶ Алайда, Маған сенім артқан осы кішкентайлардың біреуін осы жолдан кім тайдыратын болса, оның мойнына диірменнің тасы байланып, теңіздің түбіне батып кеткені жақсы болар еді.

⁷ Адамдарды күнәға әлем азғырса -қасірет. Өйткені осы әлемде азғырылу болмай тұрмайды, бірақ сол азғырылуды тудырған адам қасіретке қалады.

⁸ Егер де қолың немесе аяғың сені азғырса, оны шауып алып таста, екі қол немесе екі аяқпен тозақтың мәңгі отына тасталғаныңнан гөрі мүгедек болғаның өзіңе жақсы болады.

⁹ Егер сені көзің азғырса, ойып алып таста, сенің екі көзбен тозақ отына тасталғаныңнан гөрі өмірге бір көзбен кіргенің өзіңе жақсы болады.

¹⁰ Осы кішкентайлардың ешқайсысына немқұрайды қараушы болмаңдар, абайлаңдар. Сендерге айтарым: олардың көктегі періштелері әрқашан Көктегі Әкемнің жүзін көріп тұрады.

¹¹ Себебі Адамның Ұлы адасып кеткендерді құтқару үшін келді.

¹² Сендер қалай ойлайсыңдар? Егер бір адамның жүз қойы болып, солардың біреуі адасып қалып қойса, тоқсан тоғызын сол тауда қалдырып, жоғалған қойын іздеуге шықпай ма?

¹³ Сендерге шындықты айтайын: егер де оны тауып алса, қалған тоқсан тоғызынан гөрі табылған қойы үшін көбірек қуанатын болады.

¹⁴ Сол секілді осы кішкентайлардың біреуі құрып кетсе, Көктегі Әкенің еркіне сай болмайды.

¹⁵ Егер бауырың саған қарсы күнә жасаса, оған өзің барып, жеке жерде бетпе-бет сөйлес. Ол айтқаныңа құлақ асса, онда бауырыңды тапқаның.

¹⁶ Ал егер ол тыңдамаса, онда өзіңмен бірге бір немесе екі куәгерді ертіп ал, себебі айтылған әрбір сөз екі -үш куәгермен дәлелденуі тиіс.

¹⁷ Егер оларды да тыңдамаса, онда қауымға айт, ал қауымды да тыңдамаса, онда ол саған өзге ұлттық немесе салықшы сияқты болып қалсын.

¹⁸ Сендерге шындықты айтайын: сендер жерде нені байласаңдар, көкте де сол байланады. жерде нені шешсеңдер, көкте де сол шешіледі.

¹⁹ Сендерге тағы бір шындықты айтайын: егер де жер бетінде екеуің өзара келісіп, нені сұрасаңдар, соны Көктегі Әкем орындайды.

²⁰ Себебі: «Екі немесе үш адам Менің атымнан жиналса, солардың орталарында Мен боламын», - делінген.

²¹ Сонда Петір Исаға жақындап келіп: -Ием, бауырым маған қарсы күнә жасаса, оны қанша рет кешіруім қажет? Жеті ретке дейін бе? - деп сұрады.

²² Иса оған: -Тек жеті рет демеймін, жеті қайтара жетпіс ретке дейін, - деді.

²³ Осыған қарап, Көктегі Патшалықтың өзінің қызметкерлерінен есеп алғысы келген патшаға ұқсайтынын білетін боламыз.

²⁴ Есеп алына бастағанда, оған он мың талант қарызы бар біреуді алып келеді.

²⁵ Ол қарызын қайтара алмағандықтан, қожайыны оның әйелін, балаларын және барлық мүлкін сатып, оған қарызын өтеуді бұйырады.

²⁶ Сонда қызметшісі басын ие тізерлеп келіп, оның алдына жығылып: «Маған шыдамдылық таныта көріңіз, сізге бәрін толық қайтарамын», - дейді.

²⁷ Сонда қызметшісіне жаны ашыған қожайыны оны босатып, қарызын да кешіреді.

²⁸ Ал босап шыққан қызметші өзіне жүз динарий қарызы бар әріптесін іздеп тауып алып, бас салып қылғындырып: «Қарыздың бәрін қайтар!» - дейді.

²⁹ Сонда әлгі әріптесі оның аяғына жығылып: «Маған шыдамдылық таныта көрші, мен саған қайтарып беремін», -дейді.

³⁰ Ол күткісі келмей, қарызын толық қайтарғанша, оны абақтыға жапқызып тастайды.

³¹ Осы болған оқиғаны көрген оның әріптестері қатты қамығып, болғанның бәрін әлгі патшаға жеткізеді.

³² Сонда оны қожайыны шақырып алып: «Ей, жауыз қызметкер, сен жалынып сұраған соң, мен сенің қарыздарыңның бәрін кешірдім.

³³ Менің саған рақымды болғанымдай, сен де өз әріптесіңе дәл солай рақымды болуың керек еді ғой», - деді.

³⁴ Ашуланған қожайын одан барлық қарызын өндіріп алу үшін, оны жазалаушыларға тапсырады.

³⁵ Сонымен, өз бауырын шын жүрекпен кешіре алмайтын әркімге Менің Көктегі Әкем де осыны сендерге істейтін болады, - деді.