Матай 15 - Zhana Osiet

¹ Сол кезде Иерусалимнен фарисейлер мен Таурат заңын зерттеушілер келіп Исаға:

² -Сенің шәкірттерің неге ата-бабамыздан қалған дәстүрлерді бұзып жүр? Олар қолдарын жумай нан жейді, -деді.

³ Иса оларға былай деп жауап берді: -Сендер неліктен өз дәстүрлеріңе бола Құдайдың өсиетін бұзасыңдар?

⁴ Себебі Құдай: «Ата-анаңды құрметте, кім әкесіне немесе анасына тіл тигізгетін болса, сол өлім жазасына кесілсін», -дейді.

⁵ Ал сендер әкесі мен анасына біреу: «Саған беруге тиіс көмегімді, сый-құрметімді Құдайға бағыштадым», - десе,

⁶ онда сол адам өз ата -анасына көмектесіп, құрметтеуге міндетті емес деп айтасыңдар. Сендер өз дәстүрлеріңе бола Құдай сөзін жарамсыз етіп, жоққа шығарасыңдар.

⁷ Әй, екіжүзділер! Ишая пайғамбар сендер жайлы мынадай пайғамбарлық сөзді дұрыс айтқан:

⁸ «Бұл халық Мені аузымен ғана құрметтейді, ал жүректері Менен тым алыста.

⁹ Маған деген құрметтері бекер, себебі олардың тәлімі адам ойынан шыққан ілімдерді өсиет ретінде ұстануға үйретеді».

¹⁰ Содан кейін Иса адамдарды Өзіне шақырып: -Мынаны тыңдап алыңдар және түсінуге тырысыңдар:

¹¹ Адамды ауыздан кірген нәрсе арамдамайды, керісінше, ауыздан шыққан нәрсе арамдайды.

¹² Кейінірек шәкірттері Оған келіп: -Осы сөздіестігенде, фарисейлердің қатты ашуланғанын білдіңіз бе? - деді.

¹³ Иса оларға: -Менің Көктегі Әкем екпеген әрбір өсімдік тамырымен жұлынып тасталынатын болады, -деп жауап берді.

¹⁴ Олар тек соқырларды жетелейтін соқыр жетекші болғандықтан, өз жөніне қалдырыңдар. Соқырды соқыр жетелесе, екеуі де орға құлайды, - деді.

¹⁵ Сонда Петір: -Бізге осы астарлы әңгіменің мәнін түсіндіріп беріңізші, - деді.

¹⁶ Иса олардан: -Сендер әлі де түсінбей тұрсыңдар ма? -деп сұрады.

¹⁷ Ауыздан кірген нәрселердің бәрі асқазан арқылы өтіп, содан кейін сыртқа шығатынын әлі де түсінбейсіңдер ме?

¹⁸ Ауыздан шығатын нәрселердің бәрі жүректен шығады, адамды арамдайтын солар.

¹⁹ Өйткені зұлым ойлар, кісі өлтіру, неке адалдығын бұзу, жыныстық азғындыққа салыну, ұрлық жасау, жалған куәлік беру, жала жабу-бәрі жүректен шығады.

²⁰ Міне, осылар адамды арамдайды. Қол жумай тамақтану адамды арамдамайды, - деп жауап берді.

²¹ Иса сол жерден шығып, Тир мен Сидон маңына қарай кетті.

²² Сонда бір қанахандық әйел айғайлап: -Ием, Дәуіттің Ұлы, маған рақым ете гөр! Менің қызымды жын қатты қысып жатыр, - деді.

²³ Иса оған бір де бір сөз айтпады. Сонда шәкірттері келіп Одан: -Оның тілегін орындап, жібере салшы, өйткені артымыздан қалмай, айғайлап келе жатыр, - деді.

²⁴ Сонда Иса әйелге: -Мен тек Исраилдің үйіндегі жоғалып кеткен қойларына ғана жіберілгенмін, - деді.

²⁵ Әлгі әйел Оған жақын келіп, басын иіп, тағзым етті де: - Ием, маған көмектесе гөр, - деді.

²⁶ -Балалардың нанын алып, оны иттерге тастаған дұрыс болмас, - деп жауап берді Иса.

²⁷ -Иә, Тақсыр, күшіктер де қожайындарының үстелінен түскен қоқымдарды жейді ғой, - деді әлгі әйел.

²⁸ -Иә, әйел, сенімің зор екен, сенің қалауың болсын, -деді Иса оған. Сол уақытта оның қызы сауығып кетті.

²⁹ Иса сол жерден шығып, Ғалилея көлін жағалай жүріп, тау басына шығып отырды.

³⁰ Адамдар өздерімен бірге ақсақтарды, соқырларды, мылқауларды, мүгедектерді және көптеген науқастарды сол жерге алып келіп, Оның аяқ жағына жайғастырды. Иса оларды сауықтырды.

³¹ Сонда халық мылқаулардың сөйлегенін, мүгедектердің сауыққанын, ақсақтардың жүргенін, зағиптардың көздері ашылғанын көріп таңғалып, Исраилдің Құдайын мадақтады.

³² Иса Өзінің шәкірттерін шақырып алып: -Мына халыққа жаным ашып тұр, өйткені олар үш күн бойы Менің қасымнан қалмай жүр және жейтін де ештеңелері жоқ, сондықтан жолда аштықтан әлсіреп қалмаулары үшін, оларды жібергім келмей тұр, - деді.

³³ -Мына айдалада, осы халықтың бәрін тамақтандыратын соншама нан бізде қайдан болсын? -деді шәкірттері Оған.

³⁴ -Сендерде неше нан бар? -деп сұрады Исаолардан. -Жеті нан мен бірнеше балық қана, -деп жауап берді олар.

³⁵ Иса халыққа жайғасып отыра беруге бұйрық берген соң,

³⁶ жеті нан мен балықты алып, алғыс айтты да, үзіп-үзіп шәкірттеріне берді, шәкірттері оларды халыққа таратып берді.

³⁷ Сөйтіп, бәрі де жеп тойып алды, олардан артылып қалғанын жинап алғанда, жеті себет толды.

³⁸ Сонымен, нан жегендердің саны сол жердегі әйелдер мен балаларды санамағанда, төрт мың ер адам болды.

³⁹ Иса содан кейін халықты таратып жіберді де, қайыққа отырып, Мағдала өлкесіне қарай кетті.