Матай 14 - Zhana Osiet

¹ Сол уақытта аймақтың төртінші бөлігін билеп тұрған Ирод Иса жайында естіп,

² өзінің қызметкерлеріне: -Бұл-суға батырып шомылдырушы Жақия, ол өлімнен қайта тірілгендіктен, оның бойында осындай құдіретті күштер әрекет етуде, -деді.

³ Ирод өзінің бауыры Філіптің әйелі Иродияға бола Жақияны тұтқындап, байлап, зынданға тастаған болатын.

⁴ Өйткені Жақия оған: -Саған оны әйелдікке алуға болмайды, - деген еді.

⁵ Сол үшін Ирод Жақияны өлтіргісі келді, алайда оны пайғамбар деп санайтын халықтан қорықты.

⁶ Иродтың туған күнін тойлаған кезде, Иродияның қызы қонақтардың алдында би билеп, оның көңілінен шыққандықтан,

⁷ қыз нені қаласа, соны беруге Ирод уәде береді.

⁸ Ал қыз шешесінің үйреткені бойынша: -Суға батырып шомылдырушы Жақияның басын табаққа салып, осында, маған, әкеліп беріңіз, - деді.

⁹ Патша бұған қатты қапаланды, алайда дастарқан басында жантайып жатқан қонақтарының көзінше уәде бергендіктен, қыздың қалауын орындауға бұйрық берді.

¹⁰ Сонда оның адамдары абақтыдағы Жақияның басын алып,

¹¹ табаққа салып, қызға әкелді, қыз оны шешесіне апарып берді.

¹² Жақияның шәкірттері оның өлі денесін алып,жерлеген соң, Исаға келіп, хабар берді.

¹³ Иса Жақия туралы естіген соң, өзімен-өзі жеке болу үшін, қайықпен елсіз жерге кетті. Қала төңірегіндегі халық Исаның қайда бет алғанын біліп, оның соңынан жаяу ілесті.

¹⁴ Иса жағаға жеткен кезде көп халықты көріп, оларға жаны ашыды, әлсіз, ауру адамдарды сауықтырды.

¹⁵ Кеш түскенде шәкірттері Исаға келіп: -Бұл жер елсіз дала және кеш те болды, халықты таратып жібер, олар ауылға барып, жейтін тамақтарын сатып алсын, - деді.

¹⁶ Сонда Иса: -Оларға барудың қажеті жоқ, жейтін тамақты сендер беріңдер, - деді.

¹⁷ -Бізде бес нан мен екі балықтан басқа ештеңе жоқ, -деді олар.

¹⁸ - Маған соларды алып келіңдер, - деді Иса.

¹⁹ Ол халыққа көк шөпке жайғасып отыра беруге бұйрық берген соң, бес нан мен екі балықты алып, көзін көкке қадап, тамаққа бата берді. Содан кейін нанды үзіп-үзіп шәкірттеріне берді, шәкірттері халыққа таратты.

²⁰ Барлығы жеп тойып алды әрі артылып қалғанын жинағанда, он екі себет болды.

²¹ Сол жерде болған әйелдер мен балаларды қоспағанда, тамақ жегендердің саны бес мыңдай ер адам еді.

²² Иса осыдан кейін шәкірттерін дереу қайыққа отыруға бұйырып, оларды Өзінен бұрын келесі жағаға жіберді, Өзі халықты таратып жібергенше сонда қалды.

²³ Халықты таратып жіберген соң, сиыну үшін тауға шықты. Кеш болды, Ол тауда жалғыз Өзі болды.

²⁴ Қайық жағадан алыстап кеткен болатын. Жел өте қатты болғандықтан, толқындар қайықты ұрғылап, жылжуын қиындатып жіберген еді.

²⁵ Түннің төртінші күзетінде Ол көлдің бетімен жүріп отырып, шәкірттеріне келді.

²⁶ Оның көлдің бетімен келе жатқанын көрген шәкірттері қатты сасқалақтап: -Бұл -елес! -деп қорыққандарынан айқай салды.

²⁷ Сол сәтте Иса: -Бұл -Мен, батыл болыңдар, қорықпаңдар, - деді оларға.

²⁸ -Ием, егер Бұл Сен болсаң, -деді Петр, -су бетімен Маған кел! - деп бұйыршы.

²⁹ -Кел! -деді Ол. Петір қайықтан түсіп, су бетімен Исаға қарай жүрді.

³⁰ Алайда қатты соққан желді көріп, қорқыныштан суға бата бастаған ол айғай салып: -Ием, мені құтқара гөр! -деді.

³¹ Иса сол мезетте қолын созып, оны ұстап тұрып: -Неге күмәнданып, сеніміңді азайттың? - деді.

³² Олар қайыққа мінгенде, жел тына қалды.

³³ Қайықта отырғандар Оған бастарын иіп, тағзым етіп: -Сен, шынында, Құдайдың Ұлысың! - деді.

³⁴ Олар көлдің келесі бетіне өтіп, Генесәрет жеріне жетті.

³⁵ Сол жердің тұрғындары Оны танып қойып, төңіректің бәріне хабар жіберіп, барлық ауру-сырқау адамдарын алып келді.

³⁶ Олар Оның сырт киімінің шетіне қолдарын тигізуге өтініш білдірді. Қолын тигізгендердің барлығы сауығып кетіп жатты.