Матай 12 - Zhana Osiet

¹ Иса сенбі күні астық алқабы арқылы өтіп бара жатты.Сонда Оның шәкірттері қарындары ашқанын сезіп, масақтарды үзіп алып, жей бастады.

² Мұны көріп тұрған фарисейлер Оған: -Әне, сенің шәкірттерің сенбіде істеуге болмайтын істерді істеп жүр, -десті.

³ Иса оларға: -Сендер Дәуітті және онымен бірге болғандардың қарындары ашқан кезде не істегендері жайлы оқымап па едіңдер?

⁴ Олар Құдайдың үйіне кіріп, өздеріне арналмаған, тек қана Құдайдың қызметкерлеріне арналған арнайы тарту етілетін нанды жеді емес пе?

⁵ Ғибадатханада жүрген қызметкерлер сенбі күннің ережелерін бұзса да, олар сол үшін күнәлі болмайтыны жайлы Заңда жазылғанын сендер оқымап па едіңдер?

⁶ Бірақ сендерге айтарым: -Осында сол ғибадатханадан да жоғары Біреу бар.

⁷ Егер де сендер «Құрбандықтан гөрі мейірім көрсеткеніңді қалаймын» дегеннің мағынасын білетін болсаңдар, онда сол күнәсіз жандарға айып тақпас едіңдер,

⁸ өйткені Адамның Ұлы - сенбі күнінің де Иесі, - деді.

⁹ Иса сол жерден кетіп, олардың синагогаларына келді.

¹⁰ Сол жерде қолы семіп қалған бір адам болды.Сонда фарисейлер Исаны кінәлап, айыптау үшін: -Сенбі күні адамды сауықтыруға бол ма? - деп сұрады.

¹¹ Сонда Иса: -Егер де араларыңдағы біреуіңнің жалғыз қойың болып және сол сенбі күні шұңқырға түсіп кетсе, оны сол сәтте шығарып алмайсыңдар ма?

¹² Адам сол қойдан да артық қой! Сондықтан сенбіде де жақсылық істеуге болады, - деді.

¹³ Иса сол сәтте әлгі адамға: -Қолыңды созшы! -деді. Ол қолын созды, сонда оның қолы екінші сау қолы сияқты қалпына келді.

¹⁴ Сыртқа шыққан фарисейлер Исаға қарсы болып, Оны құртуға шешім қабылдады.

¹⁵ Алайда мұны білген Иса сол жерден кетіп қалды. Көптеген халық Оның соңынан еріп отырды, Ол бәрін сауықтырды.

¹⁶ Иса Өзін әйгілі етпеу үшін, Өзі жайлы ашық айтпауға тыйым салды.

¹⁷ Өйткені Ишая пайғамбар арқылы айтылған мына сөз орындалуы тиіс болатын:

¹⁸ «Міне, Менің таңдап алған Қызметшім, Ол-Менің Сүйіктім, Ол Менің жанымды рахатқа бөлейтін болады. Оған Өз Рухымды қондырамын, Ол басқа ұлттарға соттың әділдігін жариялайды.

¹⁹ Ол ешкіммен дауласпайды, айқай-шу көтермейді, көшеде Оның даусын да ешкім естімейтін болады.

²⁰ Ол әділдікті жеңіске жеткізу үшін, майысқан таяқты да сындырмайды әрі бықсыған білтені де өшірмейді,

²¹ барлық ұлттар Оның атынан үмітке ие болады».

²² Сол кезде жын соққан, соқыр әрі мылқау бірадамды Исаға алып келді. Ол оны сауықтырып жіберді, ол сөйлеп, көретін болды.

²³ Сонда халықтың бәрі бұған қайран қалып: -Дәуіттің Ұлы Осы шығар!? - десті.

²⁴ Мұны естіген фарисейлер: -Ол жындарды солардың әміршісі Белзебүлдің күшімен ғана қуып шығарады, -деді.

²⁵ Олардың ойларын біліп қойған Иса былай деді: -Өзара бөлініп, бір -бірімен жауласқан әрбір патшалық жойылып, бос қалады, екіге бөлінген үй де, қала да берік болмайды.

²⁶ Егер шайтан шайтанды қуса, онда олардың өзара бөлінгені, сондықтан оның патшалығы қалай берік бола алады?

²⁷ Егер Мен жындарды Белзебүлдің күшімен қуып шығаратын болсам, онда сендердің ұлдарың кімнің күшімен қуып шығарып жүр? Ал осы әрекеттерің үшін, үкімді сендерге солар шығаратын болады.

²⁸ Егер де Мен жындарды Құдайдың Рухымен қуып шығарып жүрсем, онда Құдайдың Патшалығы сендерге келді.

²⁹ Күштінің үйіндегі заттарды тонау үшін, ең алдымен, оны байлап тастау керек, олай істемесе, кім оны тонай алады?.

³⁰ Кім Менімен бірге болмаса, сол Маған қарсы және кім Менімен бірге жинамаса, сол шашады.

³¹ Сол себепті сендерге айтарым: -Адамдардың барлық күнәлары мен қорлау сөздері кешіріледі, ал Рухты қорлауы кешірілмейді.

³² Егер де біреу Адамның Ұлына қарсы сөз айтса, оған кешірім болады, ал біреу Киелі Рухқа қарсы сөзайтса, осы заманда да, болашақта да оған кешірім болмайды.

³³ Жақсы ағаштың жемісі де жақсы болады, жаман ағаштың жемісі де жаман болады, өйткені ағаш жемісімен танылады.

³⁴ Улы жыланнан туған ұрпақ, өздерің зұлым болсаңдар қалай жақсылық жайлы айта аласыңдар? Өйткені жүрек неге толы болса, ауыз соны айтады.

³⁵ Жақсы адам жақсылықтың қазынасынан жақсылық алып шығады, зұлым адам зұлымдықтың қазынасынан зұлымдық алып шығады.

³⁶ Сендерге айтарым: -Адам айтқан әрбір мәнсіз бос сөздері үшін, сот болатын күні жауап береді.

³⁷ Себебі өз сөздеріңмен ақталып, өз сөздеріңмен сотталатын боласыңдар, - деді.

³⁸ Сонда кейбір Таурат заңын зерттеушілер мен фарисейлер Оған: -Ұстаз, Сенің бір кереметтер жасағаныңды қалап тұрмыз, - деді.

³⁹ Иса оларға былай жауап берді: -Зұлым әрі азғын ұрпақ керемет іздейді, оларға Жүніс пайғамбардың кереметінен басқа керемет берілмейді.

⁴⁰ Жүніс ең үлкен балықтың құрсағында үш күн, үш түн қалай болған болса, Адам Ұлы да жер қойнында үш күн, үш түн болады.

⁴¹ Ниневиялық ер адамдар сотта тұрып, осы ұрпақты айыптайтын болады, себебі олар Жүністің уағызы арқылы тәубе еткен болатын. Ал осында Жүністен де жоғары Біреу тұр.

⁴² Оңтүстіктің патшайымы да сотта тұрып, осы ұрпақты айыптайтын болады, себебі ол сонау жердің қиыр шетінен Сүлейменнің даналығын тыңдау үшінкелген болатын. Осында сол Сүлейменнен де ұлы Біреу тұр.

⁴³ Зұлым рух адамнан шығып кеткеннен кейін, сусыз шөл жерді кезіп, тыныштық іздейді, бірақ оны таппайды.

⁴⁴ Сонда ол өзіне: «Қой, өзім шыққан үйге қайта оралайын», -дейтін болады. Ол қайтып келгенде, үйдің бос және сыпырылып тап -таза жиналып тұрғанын көреді.

⁴⁵ Сонда ол зұлымдығы өзінен өткен жеті рухты сол жерге алып келіп, орналасады. Содан кейін әлгі адамға алғашқыдан да жаман ауыртпашылық келеді. Осы жауыз ұрпақпен де дәл солай болады.

⁴⁶ Иса әлі де халыққа сөйлеп тұрғанда, Онымен сөйлеспек болып, анасы бауырларымен бірге іздеп келіп, сыртта күтіп тұрады.

⁴⁷ Сонда әлдекім Исаға: -Анаң мен бауырларың Сенімен сөйлесу үшін сыртта күтіп тұр, - дейді.

⁴⁸ Иса сол адамға: -Менің анам кім? Бауырларым кім? -деді.

⁴⁹ Содан кейін қолын созып, шәкірттерін нұсқап: -Міне, Менің анам мен бауырларым, - деді.

⁵⁰ Кім Менің Көктегі Әкемнің еркін орындаса, сол Менің бауырым, қарындасым және анам болады, - деді.