Матай 11 - Zhana Osiet

¹ Иса он екі шәкіртіне тәлім беріп болған соң, сол маңайдағы қалаларға барып, уағыз айтып жүрді.

² Абақтыда отырған Жақия Мәсіхтің істеп жүрген істері жайлы естіп, өзінің шәкірттерін жіберіп:

³ -Келуге тиісті Сенбісің? Әлде біз басқа біреуді күтуіміз керек пе? - деп сұратты.

⁴ Сонда Иса оларға былай деп жауап қатты: -Жақияға барып, не естіп, не көргендеріңді айтып беріңдер.

⁵ Зағиптар көріп, ақсақтар жүріп, алапестер тазарып, саңыраулар естіп, өлгендер тіріліп, жарлыларға Ізгі хабар айтылуда.

⁶ Маған сенімсіздік танытпаған әркім бақытты, - деді.

⁷ Оларды жіберген соң, Иса халыққа Жақия туралы былай деді: -Сендер айдалаға нені көруге бардыңдар? Жел тербеткен қамысты ма?

⁸ Сендер сонда не көруге бардыңдар? Әдемі, сәндікиім киген адамды ма? Әдемі, сәнді киім киетіндер патшалардың үйінде тұрады.

⁹ Сонымен, сендер не көруге бардыңдар? Пайғамбарды ма? Иә, сендерге айтарым: ол- пайғамбардан да жоғары.

¹⁰ Себебі жазбада: «Міне, Мен алдын ала Өзімнің хабаршымды жіберемін, ол Сенен бұрын барып, жолыңды дайындап қояды», - деп жазылған адам осы болатын.

¹¹ Сендерге шындығын айтамын: -Әйел затынан туғандардың арасынан суға батырып шомылдырушы Жақиядан ұлы ешкім болған емес. Бірақ кім кішіпейіл болса, Көктегі Патшалықтағы жолы үлкен болады

¹² Суға батырып шомылдырушы Жақияның күндерінен осы уақытқа дейін, Көктегі Патшалық күшпен алынуда, оған күш салғандар Оны иеленіп жатыр.

¹³ Жақияға дейінгі барлық пайғамбарлар да, Таурат заңы да осы жайлы алдын ала айтып кеткен.

¹⁴ Сондықтан қабылдағыларың келсе, ол келуге тиісті Ілияс пайғамбар болатын.

¹⁵ Құлағы барлар осыны тыңдап алсын!

¹⁶ Осы ұрпақты кімге ұқсатуға болады? Олар сауда орталығында отырып алып, басқаларға былай деп айқайлайтын балаларға ұқсайды:

¹⁷ «Біз сендер үшін сыбызғы ойнадық, сендер билемедіңдер, біз сендерге жоқтау әнін айттық, сендер қайғырып, жыламадыңдар».

¹⁸ Кәдімгі тамақтарды ішіп-жемейтін Жақия келгенде: «Оның бойында жын бар», - деді.

¹⁹ Ал кәдімгі тамақтарды ішіп-жейтін Адам Ұлыкелгенде: «Ол тамақ жеп, шарап ішуді жақсы көреді және салық жинаушылар мен күнәкарлардың досы», -десті. Алайда Жаратқан Иенің даналығы әділетті ісімен ақталады, -деді.

²⁰ Содан кейін Иса Өзінің құдіретті күшімен көп кереметтер жасалған қалаларды айыптай бастады, себебі олар әлі де тәубе етпеген болатын.

²¹ -Қасірет, саған Хоразин! Қасірет, саған Бетсайда! Егер де сендерде жасалған кереметтер Тир мен Сидонда жасалған болса, олар әлдеқашан азалы киімге оранып, бастарына күл шашып, тәубе етер еді.

²² Бірақ сендерге айтарым: -Сот болатын күні сендерге қарағанда, Тир мен Сидонға едәуір жеңілірек болады.

²³ Қапарнаум, сен де көкке көтерілмей, тозаққа кетесің. Өйткені сенде істелген кереметтер Содомда жасалған болса, ол осы күнге дейін аман қалар еді.

²⁴ Бірақ сендерге айтарым: -Сот болатын күні сенен гөрі, сол Содомның жеріне жеңілірек болады.

²⁵ Одан кейін Иса сөзін жалғастырып: -Жер мен Көктің Иесі Әке, Сенің сүйіспеншілігіңді білемін, Сен осыны ақылдылар мен данышпандардан жасырып, оны сәбилерге ашып бердің.

²⁶ Иә, Әке, өйткені Сенің ізгі ниетің де осы болған.

²⁷ Маған бәрі Әкемнен берілген. Ұлын тек Әкеден басқа ешкім де білмейді, егер де тек Ұлы қалап, ашып бермесе, Әкені де Ұлынан басқа ешкім білмейді.

²⁸ Маған келіңдер, шаршап-шалдығып, еңселерін ауыр жүк басқандар, Мен сендерді тыныштыққа бөлеймін.

²⁹ Менің қамытымды киіп, Менен үйреніңдер, өйткені Менің жүрегімде ізгілік пен кішіпейілділік бар,жандарыңа қажетті тыныштықты содан табасыңдар.

³⁰ Менің қамытым ыңғайлы әрі артатын ауыртпалығым да жеңіл.