Матай 10 - Zhana Osiet

¹ Иса Өзінің он екі шәкіртін шақырып алып, оларға таза емес рухтарды қуып шығарып, кез-келген ауру мен барлық әлсіздікті сауықтыра алатын билік берді.

² Сол он екі елшінің есімдері мынадай еді: Петір деп аталып жүрген Шимон мен оның бауыры Әндір; Зебедейұлы Жақып пен бауыры Жохан;

³ Філіп пен Бартолмай; Тома мен салықшы Матай;Әлпейұлы Жақып пен Таддей;

⁴ Шимон Қананит пен Исаны сатып кететін Яһуда Исқариот.

⁵ Осы он екі шәкіртіне Иса мынандай бұйрық берді: -Өзге ұлттың өкілдері жүрген жолмен жүрмеңдер, самариялықтар тұратын қалаға да кірмеңдер,

⁶ керісінше, Исраил үйіндегі жоғалып кеткен қойларына барыңдар.

⁷ Барған соң: -Көктегі Патшалық жақындап қалды, -деп жариялаңдар.

⁸ Сөйтіп, ауырғандарды сауықтырып, өлгендерді тірілтіп, алапестерді тазартып, жындарды қуып шығыңдар. Тегін алдыңдар, тегін беріңдер.

⁹ Белбеулеріңе алтын, күміс, мыс ақша орап алмаңдар,

¹⁰ дорба, артық көйлек, аяқ киім де, таяқ та алмаңдар. Өйткені еңбек еткен ішер тамағына лайықты ғой.

¹¹ Қандай да бір қалаға не бір ауылға кірген кездеріңде, сол жерден лайықты адамды тауып алыңдар да, келесі жолға шыққанша, сонда қалыңдар.

¹² Ал оның үйіне кірген кезде: «Тыныштық болсын!», -деп сәлем беріңдер.

¹³ Егер сол үй соған лайықты болса, сендер тілеген тыныштық келеді, егер лайықсыз болса, сендер тілеген тыныштық өздеріңе қайта оралады.

¹⁴ Егер сендерді қабылдамаса әрі сөздеріңді тыңдамаса, сол үйден немесе сол қаладан шығып бара жатып, аяқтарыңның шаңын сол жерге қағып тастаңдар.

¹⁵ Сендерге шындығын айтайын: сот болатын күні сол қалаға қарағанда, Содом мен Ғомораға жеңілірек болады.

¹⁶ Міне, Мен сендерді қасқырлардың арасына жіберген қойлар секілді жіберіп тұрмын. Сондықтан жыландай ақылды, көгершіндей таза ниетті болыңдар.

¹⁷ Адамдардан сақтанып жүріңдер, өйткені олар сендерді жоғарғы кеңестегі алқалар сотына (синедерионға) ұстап беріп, өздерінің синагогаларында ұрып-соғатын болады.

¹⁸ Мен үшін сендерді әміршілер мен патшалардың алдына алып баратын болады. Сонда сендер оларға да, өзге ұлт өкілдеріне де куәлік ететін боласыңдар.

¹⁹ Сендерді оларға ұстап бергенде, не айтамыз деп уайымдамаңдар. Өйткені айтатын сөздерің сол сәтте-ақ сендерге беріледі.

²⁰ Алайда сол кезде сөйлейтін сендер емес, сендер арқылы Әкелеріңнің Рухы сөйлейтін болады.

²¹ Сонда бауыры өз бауырын, әкесі өз баласын өлімге итермелеп, балалар әке-шешелеріне қарсы шығып, оларды, тіпті, өлімге душар етеді.

²² Сөйтіп, сендер Менің атыма бола жек көрінішті боласыңдар. Тек соңына дейін шыдағандар ғана құтқарылатын болады.

²³ Сендерді бір қаладан қудаласа, басқасына қашып барыңдар. Шындығын айтамын: өйткені сендер Адам Ұлының келетін кезіне дейін, Исраилдегі қалалардың бәрін аралап бітіре алмайсыңдар.

²⁴ Шәкірті ұстазынан, құлы қожайынынан жоғары бола алмайды.

²⁵ Тегінде, шәкірті ұстазындай, құлы қожайынындай болса, жеткілікті. Егер үйдің қожайынын Белзебүл деп атаса, онда оның үйіндегілерге одан да жаман ат тағатын болады.

²⁶ Сондықтан олардан қорықпаңдар, себебі ашылмайтын ешбір сыр, білінбейтін ешбір құпия жоқ.

²⁷ Өздеріңе қараңғыда айтқанымды жарықта айтыңдар, құлақтарыңа сыбырлап айтқанымды төбеге шығып жариялаңдар.

²⁸ Тәнді өлтіріп, жанды өлтіре алмайтыннан қорықпаңдар. Одан да жанды да, тәнді де тозақ отында құрта алатын Ұлы күштен қорқыңдар.

²⁹ Екі торғай бір ассарийге сатылмай ма? Бірақ олардың бірде-біреуі сендердің Әкелеріңнің еркінсіз жерге құлап түспейді.

³⁰ Сендердің бастарыңдағы шаштарыңа дейін саналып қойылған.

³¹ Сондықтан қорықпаңдар, өйткені сендер сол торғайлардан әлдеқайда артықсыңдар.

³² Сонымен, Мені адамдар алдында мойындаған әркімді Көктегі Әкемнің алдында Мен де мойындайтын боламын.

³³ Кімде-кім адамдар алдында Менен бас тартса, Көктегі Әкемнің алдында Мен де одан бас тартатын боламын.

³⁴ Мені жер бетіне тыныштық әкелді деп ойламаңдар. Мен тыныштық емес, керісінше, семсер әкелдім.

³⁵ Өйткені Мен ұлды әкесінен, қызын анасынан, келінін енесінен айыру үшін келдім,

³⁶ үй ішіндегілердің арасында бір-біріне деген жек көрушілік пайда болады.

³⁷ Кім өз әкесін немесе анасын Менен артық сүйсе, сол Маған лайықты емес және кім өз ұлын немесе қызын Менен артық сүйсе, ол Маған лайықты емес,

³⁸ кім өз айқыш ағашын көтеріп, Менің соңымнан Зермесе, сол Маған лайықты емес.

³⁹ Өз өмірін сақтағысы келген оны жоғалтады, кім Мен үшін өмірін қиса, ол соған ие болады.

⁴⁰ Егер де сендерді қабылдаса, Мені де қабылдағаны, Мені қабылдаса, Мені жібергенді де қабылдағаны.

⁴¹ Пайғамбарды пайғамбар ретінде қабылдаған пайғамбардың сыйын алады. Әділді әділдігі үшін қабылдаған әділдің сыйына ие болады.

⁴² Кім осы кішкентайлардың біреуіне Маған шәкірт болғаны үшін бір кесе суық су берсе, сендерге шындығын айтайын, оның алатын сыйы жоғалмайды.