Матай 1 - Zhana Osiet

¹ Ыбырайымның ұрпағы Дәуіттің Ұлы Иса Мәсіхтің шежіресіне арналған жазба.

² Ыбырайымнан Ысқақ туылды, Ысқақтан Жақып туылды, Жақыптан Яһуда мен оның бауырлары туылды.

³ Яһудадан Парес пен Зарах туылды, олардың анасы Тамар болатын. Парестен Хесрон туылды, Хесроннан Рам туылды.

⁴ Рамнан Әминадап туылды, Әминадаптан Нағосон туылды, Нағосоннан Салмон туылды.

⁵ Салмоннан Боғоз туылды, ал Боғоздың анасы Рахаб болатын, Боғоздан Ғабит туылды, Ғабиттің анасы Рут болатын, Ғабиттен Есей туылды.

⁶ Есейден Дәуіт патша туылды, Дәуіттен Сүлеймен туылды, Сүлейменнің шешесі Үрияның әйелі болған.

⁷ Сүлейменнен Рохабоғам туылды, Рохабоғамнан Абиях туылды, Абияхтан Аса туылды.

⁸ Асадан Жосапат туылды, Жосапаттан Жорам туылды, Жорамнан Озиях туылды.

⁹ Озияхтан Жотам, Жотамнан Ахаз туылды, Ахаздан Езекия туылды.

¹⁰ Езекиядан Манасса туылды, Манассадан Амон туылды, Амоннан Жосия туылды.

¹¹ Жосиядан Ехониях туылды әрі сол кезден Бабылға жер аударылатын кезге дейін оның бауырлары туылды.

¹² Бабылға жер аударылғаннан кейін Ехонияхтан Салатиел туылды, Салатиелден Зоробабел туылды.

¹³ Зоробабелден Әбиуд туылды, Әбиудтен Елиәкім туылды, Елиәкімнен Азор туылды.

¹⁴ Азордан Садық туылды, Садықтан Әкім туылды, Әкімнен Елиуд туылды.

¹⁵ Елиудтен Елезар туылды, Елезардан Маттан, Маттаннан Жақып туылды.

¹⁶ Жақыптан Жүсіп туылды, ал Жүсіп Мәсіх деп аталған Исаны дүниеге әкелген Мәриямның күйеуі болатын.

¹⁷ Сөйтіп, Ыбырайымнан Дәуітке дейін он төрт ұрпақ, Дәуіттен Бабылға жер аударылған кезге дейін де он төрт ұрпақ, Бабылға жер аударылған кезден Мәсіхке дейін де он төрт ұрпақ болды.

¹⁸ Иса Мәсіхтің дүниеге келген тарихы былай еді: Оның шешесі Мәриям Жүсіпке айттырылып қойылған болатын, алайда олар үйленбей тұрып, Мәриямның аяғы ауыр екені мәлім болды. Оның құрсағындағы Нәресте Киелі Рухтан болатын.

¹⁹ Оның күйеуі әділ адам болғандықтан, қалыңдығын ұятқа қалдырғысы келмей, жасырын түрде жібере салуға шешім қабылдады.

²⁰ Сөйтіп, ол осылай жоспарлай бастағанда, Жаратқан Иенің періштесі оның түсінде аян беріп: «Дәуіттің ұлы Жүсіп, Мәриямды өз әйелің етіп алуға қорықпа, себебі одан туылатын Нәресте Киелі Рухтан пайда болды.

²¹ Сол туылған Ұлға Иса деп ат қоясың, өйткені Ол өз халқын күнәларынан құтқаратын болады», - деді.

²² Осының бәрі Жаратқан Иемізден болғандықтан, орындалуы да пайғамбарлар арқылы айтылғанға сай болды. Өйткені онда:

²³ «Міне, пәк қыз құрсақ көтеріп, Ұл туады, Оған «Имануил» деп ат қояды, мұның мағынасы «Құдай бізбен бірге» дегенді білдіреді», - делінген.

²⁴ Жүсіп ұйқыдан оянған соң, бәрін Иеміздің періштесі бұйырғандай істеп, Мәриямды әйелі ретінде қабылдады.

²⁵ Мәриям Ұлын туғанға дейін күйеуімен жақындасқан жоқ. Олар Нәрестенің атын Иса деп қойды.