Марқа 9 - Zhana Osiet

¹ -Сендерге шындықты айтайын: осы жерде тұрғандардың кейбіреуі Құдай Патшалығының өз күшінде келгенін көрмей өлмейді, - деді Иса.

² Алты күн өткеннен кейін Иса Петірді, Жақып пен Жоханды өзімен бірге ертіп алып, биік тауға көтерілді. Сол уақытта Оның бейнесі олардың көз алдында өзгеріске түсті.

³ Оның киімдері жарқырап, жер бетіндегі бірде-бір ағартушы ағарта алмайтындай, аппақ болды.

⁴ Сол кезде олар Ілияс пен Мұсаның Исамен сөйлесіп тұрғанын көрді.

⁵ Сонда Петір Исаға тіл қатып: -Ұстаз, (Равви) біздің осында болғанымыз қандай жақсы болды! Сондықтан осы жерге үш күрке құрайық, біреуін Саған және Мұсаға, біреуін Ілиясқа, - деді.

⁶ Сол кезде оны қатты үрей билегендіктен, не айтып тұрғанын өзі де білмеді.

⁷ Сонда бұлт пайда болып, оларды өзінің көлеңкесімен жапты, сол бұлттан: -Бұл-Менің сүйікті Ұлым, сендер Оны тыңдаңдар! - деген дауыс шықты.

⁸ Олар жан-жағына қарады, бірақ сол жерден тек Исадан басқа ешкімді де көре алмады.

⁹ Таудан түсіп келе жатқанда, Иса оларға Адам Ұлы өлімнен қайта тірілетін уақыт келгенше, осы көрген көріністері туралы ешкімге айтпауын ескертті.

¹⁰ Олар осы сөзді естеріне сақтап қалды, дегенмен, «өлімнен қайта тірілу дегеннің» нені білдіретінін өзара талқыға салды.

¹¹ Содан кейін олар Исадан: -Таурат Заңын зерттеушілер неге алдымен Ілияс келуі тиіс деп айтып жүр? -деп сұрады.

¹² Иса оларға: -Негізі Ілияс алдымен келіп, бәрін қалпына келтіруі керек болған. Ал Адам Ұлына байланысты былай деп жазылған: «Ол көп қорлық көріп, азапталуы тиіс».

¹³ Сендерге айтар болсам, Ілияс әлдеқашан келіп қойған, алайда олар оған қатыгездік жасап, өз қалағандарын іске асырды, - деді.

¹⁴ Олар төменде қалған шәкірттеріне қайта оралғанда, оларды көптеген адамдардың қоршап алғанын және олармен Таурат заңын зерттеушілердің дауласып тұрғанын көрді.

¹⁵ Барлық адамдар Исаны сол сәтте көре салып, таңдана жүгіріп келіп, Онымен амандасты.

¹⁶ -Олармен не жайында дауластыңдар? -деп сұрады Иса олардан.

¹⁷ Қалың топтың арасынан Оған біреу: -Ұстаз, менің ұлымда мылқаудың рухы бар, оны Өзіңе алып келдім.

¹⁸ Рух қай жерде ұстаса, оны сол жерге құлатады, сонда оның аузынан ақ көбік ағып, тісін қайрап, ес-түсін білмей серейіп қалады. Сенің шәкірттеріңе онықуып шығаруын сұрап едім, алайда олардың қолдарынан келмеді, - деді.

¹⁹ -О, сенбейтін ұрпақ! Қашанға дейін сендермен бірге боламын? Қашанға дейін сендерге төзуге тиіспін? Оны Маған алып келіңдер, - деді Иса оларға.

²⁰ Жаңағы баланы Исаға алып келді. Мылқау рух Исаны көре салып, сол сәтте оның ұстамасын ұстатып, құрыстырып тастады, сонда бала жерге құлап түсті, аузынан ақ көбік ағып, жерде ары-бері аунай бастады.

²¹ Иса оның әкесінен: -Осы жағдайдың болғанына қанша уақыт болды? -деп сұрады. -Бала кезінен, -деп жауап берді әкесі.

²² -Рух оны құрту үшін, жиі -жиі осылай отқа да түсіреді, суға да салады. Егер шамаң келсе, бізге жаның ашыса, көмектесші, - деді.

²³ Иса оған: -«Егер шамаң келсе», -деп сен ғана айтып тұрсың. Сенетін адамға бәрі де мүмкін, - деді.

²⁴ Сол сәтте баланың әкесі: -Мен сенемін! Сенімсіз болсам, маған көмектесші, - деп айғай салды.

²⁵ Сол кезде халықтың жүгіріп келіп жатқанын көрген Иса таза емес рухқа тыйым салып: -Мылқау және керең рух, Мен саған бұйырамын, одан шық! Бұдан кейін енді қайтып оған кірме! - деп бұйырды.

²⁶ Сонда рух қатты шыңғырып, баланы қатты сілкілеп, шығып кетті, бала өліп қалғандай серейіп қалды. Сонда көптеген адам: - Ол өліп қалды, - деді.

²⁷ Иса оны қолынан алып көтергенде, ол орнынан тұрды.

²⁸ Кейінірек Иса үйге кірген кезде, Оның шәкірттері жеке жерде: -Біз неге оны қуып шығара алмадық? -деп сұрады.

²⁹ Иса оларға: -Рухтың осы түрі тек мінәжат пен ораза арқылы ғана қуып шығарылады, - деді.

³⁰ Сол жерден шыққаннан кейін олар Ғалилея арқылы өтті, алайда бұл туралы басқалардың білгенін қаламады,

³¹ өйткені Ол өзінің шәкірттерімен үйретумен болды. -Адамның Ұлын өлім жазасына кесіп, Оны адамдардың қолына тапсырады. Алайда Оны өлтірген соң, Ол үшінші күні қайта тірілетін болады, - деді оларға.

³² Бірақ олар бұл сөздің мәнін түсінбеді және осы жөнінде Одан сұрауға қорықты.

³³ Олар Капарнаумға келді. Үйге кірген соң, Иса олардан: -Жолда нені талқыладыңдар? - деп сұрады.

³⁴ Олар үндемеді. Өйткені олар жолда араларында ең үлкені кім болатыны туралы бір-бірімен айтысқан болатын.

³⁵ Жайғасып отырғаннан кейін, Иса он екісін шақырып алып, оларға: -Егер де кім бірінші болғысы келсе, сол барлығының соңы болсын және ол бәріне қызмет етсін, -деді.

³⁶ Бір баланы олардың ортасына тұрғызып қойды да, оны құшақтап тұрып, былай деді:

³⁷ -Кім осындай балалардың біреуін Менің атымнан қабылдайтын болса, ол Мені де қабылдайды, ал кім Мені қабылдаса, тек Мені ғана емес, Мені Жібергенді де қабылдағаны, - деді.

³⁸ Сонда Жохан Оған: -Ұстаз! Біз біреулердің Сенің атыңмен жындарды қуып жүргенін көріп, оған тыйым салдық, өйткені ол бізбен еріп жүрген жоқ қой, - деді.

³⁹ -Оған тыйым салмаңдар, өйткені кім Менің атымдағы күшті пайдаланып, кереметтер жасаған болса, ол дәл қазір Мен туралы жаман айтпайды,

⁴⁰ өйткені кім бізге қарсы болмаса, сол бізбен бірге болады.

⁴¹ Сондықтан кімде-кім сендерді Мәсіхтің ізбасарлары (шәкірттері) болғандарың үшін сендерге бір тостаған су беретін болса, сендерге шындықты айтайын, ол алатын сыйын еш жоғалтпайды.

⁴² Егер кімде-кім Маған сеніп жүрген осы бір кішкентайлардың біреуін күнәға азғыратын болса, онда оның мойнына диірменнің тасы байланып, теңіздің түбіне тасталғаны ол үшін жақсы болар еді.

⁴³ Егер де сенің қолың сені күнәға азғыратын болса, онда оны шауып таста. Екі қолыңмен мәңгі азап шегетін тозаққа түскеннен гөрі, сенің өмірге жарымжан болып кіргенің саған жақсы болар еді.

⁴⁴ Ол жердің оты өшпейді.

⁴⁵ Егер сенің аяғың сені азғыратын болса, оны шауып алып таста. Екі аяғыңмен мәңгі азап шегетін тозаққа түскеніңнен гөрі, сенің ақсақ болып өмірге кіргенің жақсы болар еді.

⁴⁶ Ол жердің оты өшпейді.

⁴⁷ Егер сенің көзің сені азғыратын болса, онда оны ойып алып таста. Екі көзіңмен тозақтың мәңгілік азабына тасталғаныңнан гөрі, сенің бір көзіңмен Құдайдың Патшалығына кіргенің саған жақсы болар еді,

⁴⁸ өйткені ол жердің тәнді кеміретін құрттары да өлмейді және жалындаған оты да сөнбейді.

⁴⁹ Өйткені әркім отпен тұздалады.

⁵⁰ Тұздың болғаны жақсы. Егер тұздан дәм кетсе, оның дәмін немен келтіруге болады? Сондықтан өздерің сол тұз сияқты болыңдар, өзара тату -тәтті өмір сүріңдер, -деді Иса.